କଟକ(ଓଡ଼ିଶା ରିପୋର୍ଟର): ଏକ ବାଇକ୍ ଚୋରି ମାମଲାରେ ଜଣଙ୍କୁ ଧରି ପଚରାଉଚରା କରିବାରୁ ଧରାପଡ଼ିଲା ପୁରା ଗ୍ୟାଙ୍ଗ। ଶେଷରେ ୨୨ଟି ଗାଡ଼ି ଜବତ ସହ ଏହି ଗ୍ୟାଙ୍ଗର ୫ଜଣଙ୍କୁ ଗିରଫ କରିଛି ପୁଲିସ୍। ଏହିପରି ଭାବେ ଏକ ଆନ୍ତଃ ଜିଲ୍ଲା ବାଇକ ଲୁଟେରା ଗ୍ୟାଙ୍ଗର ପର୍ଦାଫାଶ କରିଛି କଟକ ବାଦାମବାଡି ଥାନା ପୁଲିସ୍।
ଏହି ଲୁଟେରାମାନେ କଟକ, କେନ୍ଦ୍ରାପଡ଼ା, ଖୋର୍ଦ୍ଧା ଓ ଜଗତସିଂହପୁର ଆଦି ଜିଲ୍ଲାରୁ ବାଇକ୍ ଚୋରି କରି ବିଭିନ୍ନ ସ୍ଥାନରେ ବିକ୍ରି କରୁଥିଲେ । କିଛି ଗାଡ଼ି ନିଜେ ମଧ୍ୟ ବ୍ୟବହାର କରୁଥିଲେ।
ବାଦାମବାଡ଼ି ଥାନା ଅଞ୍ଚଳରୁ ଏକ ବାଇକ୍ ଚୋରି ପରେ ଖୋଳତାଡ଼ ଆରମ୍ଭ କରିଥିଲା ବାଦାମବାଡ଼ି ଥାନା ପୁଲିସ୍। ଏନେଇ ଥାନାରେ ମାମଲା ରୁଜୁ ହେବା ପରେ ଜଣେ ଅଭିଯୁକ୍ତକୁ ଗିରଫ କରି ପଚରାଉଚରା ପରେ ପୁରା ଗ୍ୟାଙ୍ଗକୁ ଧରିଥିଲା ପୁଲିସ୍।
କଟକ ସହରର ବିଭିନ୍ନ ଥାନା ଅଞ୍ଚଳ ସମେତ ଅନ୍ୟାନ୍ୟ ଜିଲ୍ଲାରୁ ମଧ୍ୟ ଏମାନେ ଚୋରି କରୁଥିଲେ । ଗିରଫ ସମସ୍ତେ ପେଶାଦାର ବାଇକ୍ ଲୁଟେରା ହୋଇଥିବା ବେଳେ ପୂର୍ବରୁ ବିଭିନ୍ନ ଥାନାରେ ଏକାଧିକ ମାମଲା ରହିଥିବା ସୂଚନା ଦେଇଛନ୍ତି କଟକ ଡିସିପି ।