ଏଣିକି ଜଣେ ନୁହେଁ, ୫ ଜଣ କେନ୍ଦ୍ରୀୟ ନେତା ସମ୍ଭାଳିବେ ରାଜ୍ୟ କଂଗ୍ରେସକୁ

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ପ୍ରଭାରୀ ହରିପ୍ରସାଦଙ୍କ ପରେ ହଟିଛନ୍ତି ଓଡ଼ିଶାରେ କଂଗ୍ରେସର ସହପ୍ରଭାରୀ ଶୁଭଙ୍କର ସରକାର। ଓଡ଼ିଶା ବ୍ୟାପାର ବୁଝିବା ଲାଗି କଂଗ୍ରେସ ସଭାପତି ରାହୁଲ ଗାନ୍ଧୀ ଆଜି ଆଉ ୫ ଜଣ କେନ୍ଦ୍ରୀୟ ନେତାଙ୍କୁ ଦାୟିତ୍ୱ ଦେଇଛନ୍ତି। ଏବେ ଆଉ ଜଣେ ନୁହେଁ, ୫ ଜଣ କେନ୍ଦ୍ରୀୟ ନେତା ରାଜ୍ୟ କଂଗ୍ରେସକୁ ସମ୍ଭାଳିବେ।</p> <p>ପ୍ରଦେଶ କଂଗ୍ରେସ କମିଟିର ନବକଳେବର ହେବ ବୋଲି ଦୁଇଦିନ ତଳେ ପିସିସି ସଭାପତି ପ୍ରସାଦ ହରିଚନ୍ଦନ ଇଙ୍ଗିତ ଦେଇଥିଲେ। ଆଜି ଓଡ଼ିଶା ଦାୟିତ୍ୱରେ ଥିବା କେନ୍ଦ୍ରୀୟ ନେତାଙ୍କ ପରିବର୍ତ୍ତନ ପରେ ପିସିସିର ନବକଳେବର ଉପରେ ଏବେ ସମସ୍ତଙ୍କ ନଜର ରହିଛି। ଏହି ପରିବର୍ତ୍ତନ ଭିତରେ ପ୍ରସାଦଙ୍କ ପାଳି ପଡିବ କି ନାହିଁ, ତାକୁ ନେଇ କଳ୍ପନାଜଳ୍ପନା ଲାଗି ରହିଛି।</p> <p>ନୂଆ ଦାୟିତ୍ୱ ପାଇଥିବା ୪ କେନ୍ଦ୍ରୀୟ ନେତା ହେଲେ ଆନ୍ଧ୍ରପ୍ରଦେଶର ପୂର୍ବତନ ବିଧାୟକ ରୁଦ୍ର ରାଜୁ ଓ ଶେଖ୍ ମସ୍ତାନ ୱାଲି, ଦିଲ୍ଲୀର ପୂର୍ବତନ ବିଧାୟକ ଅନିଲ କୁମାର ଚୌଧୁରୀ ଓ ଉତ୍ତରପ୍ରଦେଶର ବରିଷ୍ଠ ନେତା ଆଦିତ୍ୟ ଶର୍ମା। ରୁଦ୍ର, ମସ୍ତାନ ୱାଲି ଓ ଅନୀଲଙ୍କୁ ଏଆଇସିସି ସମ୍ପାଦକ ଭାବେ ନିଯୁକ୍ତ ଦିଆଯାଇଥିବା ବେଳେ ଆଦିତ୍ୟଙ୍କୁ ଯୁଗ୍ମ ସଂପାଦକ କରାଯାଇଛି। ଏମାନେ ପ୍ରଭାରୀ ଜିତେନ୍ଦ୍ର ସିଂହଙ୍କୁ ସହଯୋଗ କରିବେ। ସେପଟେ ଦୁଇ ଜଣଙ୍କ ସ୍ଥାନରେ ୫ ଜଣିଆ ଟିମ୍&zwnj;କୁ ଦାୟିତ୍ୱ ଦିଆଯାଉଥିବାରୁ ଏଆଇସିସି ଓଡ଼ିଶା ପ୍ରତି ସ୍ୱତନ୍ତ୍ର ଧ୍ୟାନ ଦେଉଥିବା ଚର୍ଚ୍ଚା ହେଉଛି।</p> <p>କେନ୍ଦ୍ରୀୟ ଟିମ୍&zwnj;ରେ ପରିବର୍ତ୍ତନ ପରେ କେବେ ପ୍ରଦେଶ କଂଗ୍ରେସର ନବକଳେବର ହେବ ତାଙ୍କୁ ନେଇ ଚର୍ଚ୍ଚା ଲାଗି ରହିଛି। ପିସିସି ସଭାପତି ପ୍ରସାଦ ହରିଚନ୍ଦନ ଖୁବ୍ ଶୀଘ୍ର ରାଜ୍ୟ ଟିମ୍ ବଦଳିବ ବୋଲି ଗତକାଲି କହିଥିଲେ। ତେବେ ପ୍ରସାଦ ନିଜେ ବଦଳିବେ ନା ନାହିଁ ତାହା ଏବେ ବି ବଡ଼ ପ୍ରଶ୍ନ। ପ୍ରସାଦଙ୍କୁ ନେଇ ପିସିସି ଓ ବିଧାୟକ ଦଳ ଦୁଇ ଭାଗରେ ବିଭକ୍ତ ହୋଇଥିବାରୁ ରାହୁଲ କି ନିଷ୍ପତ୍ତି ନେଉଛନ୍ତି ଏବେ ତାକୁ ସମସ୍ତଙ୍କର ଅପେକ୍ଷା।</p> <p>ସୂଚନାଯୋଗ୍ୟ, ପ୍ରଦେଶ କଂଗ୍ରେସର ସାଂଗଠନିକ ନିର୍ବାଚନ ଶେଷ ହୋଇଥିବା ବେଳେ ଆସନ୍ତା କିଛିଦିନ ଭିତରେ ବ୍ଲକ୍ ଓ ଜିଲ୍ଲା ସଭାପତିଙ୍କ ନାଁ ଘୋଷଣା ହେବ। ତେଣୁ ତା&rsquo; ପୂର୍ବରୁ ପିସିସି ମଙ୍ଗୁଆଳ ବଦଳୁଛନ୍ତି ନା ନାହିଁ ତା ଉପରେ ନଜର ରହିଛି।</p>