ସକାଳୁ ସକାଳୁ ଲାଗିଲା କଳି; ନଦୀକୁ ଡେଇଁ ପଡ଼ିଲେ ମହିଳା

ରାଉରକେଲା(ସତ୍ୟାନନ୍ଦ ମହାନ୍ତି): ଘରୋଇ କଳିରେ ଅତିଷ୍ଠ ହୋଇ ଚରମ ପଦକ୍ଷେପ ନେଲେ ମହିଳା। ଏପରିକି ଆଜି ସକାଳୁ ବ୍ରାହ୍ମଣୀ ନଦୀରୁ ଡେଇଁ ଜୀବନ ହାରିବାକୁ ଉଦ୍ୟମ କରିଥିବା ମହିଳାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି । ଏପରି  ଅଭାବନୀୟ ଘଟଣା ଆଜି ସକାଳୁ ରାଉରକେଲାରେ ଘଟି ଯାଇଛି। ଗୁରୁତର ଥିବା ମହିଳାଜଣକ ହେଲେ ସୁଧା ଲୋହାର।

ସୂଚନା ଅନୁଯାୟୀ, ସୁଧା ଲୋହାର ନିଜ ସ୍ୱାମୀ ମନୋଜ ଲୋହାରଙ୍କ ସହ ବ୍ରହ୍ମଣୀ ତରଙ୍ଗ ଥାନା ସିଂଟୋଲାରେ ରୁହନ୍ତି ।  ଗୁରୁବାର ସକାଳେ  କୌଣସି କାରଣରୁ ଘରେ କଳି ଲାଗିବାରୁ ସୁଧା ଘରୁ ବାହାରି ପଳାଇ ଆସିଥିଲେ। ଏହାପରେ ଉତ୍ତ୍ୟକ୍ତ ମହିଳାଜଣକ ରାଉରକେଲା ବ୍ରାହ୍ମଣୀ ବ୍ରିଜରୁ ନଦୀକୁ ଡେଇଁ ଆତ୍ମହତ୍ୟା ଉଦ୍ୟମ କରିଥିଲେ ।   ସ୍ଥାନୀୟ ଲୋକଙ୍କଠାରୁ ଖବର ପାଇ ରଘୁନାଥପାଲି ଥାନା ପୁଲିସ୍‌ ଓ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଉକ୍ତ ମହିଳାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସରକାରୀ ହସ୍ପିଟାଲରେ ଭର୍ତ୍ତି କରିଛନ୍ତି। ସେଠାରେ ତାଙ୍କ ଅବସ୍ଥା ଗୁରୁତର  ଥିବା ଜଣାଯାଇଛି।

Ambulance
ଆମ୍ବୁଲାନ୍ସରେ ଗୁରୁତର ମହିଳାଙ୍କୂ ହସ୍ପିଟାଲ ନିଆଯାଉଛି।

ପରିବାର ଲୋକ ସୁଧାଙ୍କୁ  ନ ପାଇ ଖୋଜାଖୋଜି  ଆରମ୍ଭ କରିଥିଲେ। ଏହାପରେ ଖବର ପାଇ ମେଡିକାଲରେ ପହଞ୍ଚିଥିବା ଜଣାଯାଇଛି। ପୁଲିସ୍‌ ସୁଧାଙ୍କ ସମେତ ପରିବାର ଲୋକଙ୍କୁ ପଚରାଉଚରା କରୁଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।