ବ୍ରହ୍ମପୁର (ଓଡ଼ିଶା ରିପୋର୍ଟର): ଗଞ୍ଜାମ ଏସ୍ପିଙ୍କ କାର୍ଯ୍ୟାଳୟ ସମ୍ମୁଖରେ ଆତ୍ମାହୁତି ଉଦ୍ୟମ। ହୁତୁ ହୁତୁ ହୋଇ ଜଳି ଗଲେ ଜଣେ ଯୁବକ। ତାଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି।
ଏହି ଯୁବକଙ୍କ ନାଁ ବାଦଲ ସାହୁ। ତାଙ୍କ ଘର ରମ୍ଭା ଥାନା ଅନ୍ତର୍ଗତ ବୋରିଗାଁରେ। ତାଙ୍କ ଶରୀରର ଅଧିକାଂଶ ଭାଗ ଜଳି ଯାଇଛି। ତାଙ୍କ ଅବସ୍ଥା ଗୁରୁତର ରହିଛି।
ବାଦଲଙ୍କୁ ପ୍ରଥମେ ଛତ୍ରପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତାଙ୍କୁ ସେଠାରୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
ସୂଚନା ଅନୁଯାୟୀ, ବାଦଲ ଆଜି ଅପରାହ୍ଣରେ ଏସ୍ପିଙ୍କ ଅଫିସ୍ ଅଞ୍ଚଳକୁ ଆସିଥିଲେ। ପରେ ହଠାତ୍ ଦେହରେ ପେଟ୍ରୋଲ ଢାଳି ସେ ନିଆଁ ଲଗାଇ ଦେଇଥିଲେ।
ବାଦଲଙ୍କ କାହିଁକି ଏଭଳି ପଦକ୍ଷେପ ନେଲେ, ତାହା ଜଣାପଡ଼ିନି। ତାଙ୍କର ସମସ୍ୟା ନେଇ ଏସ୍ପିଙ୍କୁ ଭେଟି କଥା ମଧ୍ୟ ହୋଇନାହାନ୍ତି ବୋଲି ଜଣାପଡ଼ିଛି। ଏ ଘଟଣା ନେଇ ଏସ୍ପି କିମ୍ବା ପୁଲିସ୍ ବିଭାଗ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇ ନାହିଁ।