ରୋଜା ଭାଙ୍ଗି ପ୍ରସୂତି ମହିଳାଙ୍କୁ ରକ୍ତ ଦେଲେ ଶେଖ୍ ସାକିର

ଫୁଲବାଣୀ(ତ୍ରିନାଥ ସାହୁ): ରମଜାନ ମାସରେ ରୋଜା ଭାଙ୍ଗି ପ୍ରସୂତି ମହିଳାଙ୍କୁ ରକ୍ତ ଦେଲେ ଜଣେ ମୁସଲିମ ଯୁବକ। ଏହି ଦୃଶ୍ୟ ଦେଖିବାକୁ ମିଳିଛି ଫୁଲବାଣୀ ଡାକ୍ତରଖାନାରେ। ଯୁବକଙ୍କ ନାଁ ହେଉଛି ଶେଖ୍ ସାକିର। ତାଙ୍କ ଘର ଫୁଲବାଣୀ ସହରର ପିଅନପଡ଼ାରେ।

ସୂଚନା ଅନୁସାରେ ୩ ଦିନ ତଳେ ଫୁଲବାଣୀ ଡାକ୍ତରଖାନାରେ ଡଗୁପଦର ଗାଁର ଧର୍ମେନ୍ଦ୍ର ପ୍ରଧାନଙ୍କ ସ୍ତ୍ରୀ  ଅଞ୍ଜଳି ମଲ୍ଲିକ ସ୍ତ୍ରୀ ଏବଂ ପ୍ରସୂତି ବିଭାଗରେ ଚିକିତ୍ସିତ ହେଉଥିଲେ। ହେଲେ ତାଙ୍କ ଦେହରେ  ହିମଗ୍ଲୋବିନ୍ ପରିମାଣ ବହୁତ କମ୍ ଥିବାରୁ  ଡାକ୍ତର ତାଙ୍କ ସ୍ୱାମୀଙ୍କୁ ରକ୍ତ ଦେବା ପାଇଁ କହିଥିଲେ। ହେଲେ  ସ୍ତ୍ରୀ ବ୍ଲଡ୍‌ ଗ୍ରୁପ୍‌ AB + ହୋଇଥିବାରୁ ସେ ରକ୍ତ ଯୋଗାଡ଼ କରିପାରିନଥିଲେ। ଏହି ଖବର ଜାଣିବା ପରେ ଶେଖ୍‌ ସାକିର ଫୁଲବାଣୀ ରକ୍ତ ଭଣ୍ଡାରକୁ ଯାଇ ସ୍ୱେଚ୍ଛାକୃତ ଭାବେ ପ୍ରସୂତି ମହିଳାଙ୍କ ପାଇଁ ରକ୍ତ ଦାନ କରିଥିଲେ।

ସାକିର ଜଣେ ମୁସଲିମ୍ ସମ୍ପ୍ରଦାୟର ଯୁବକ ହୋଇଥିବାରୁ ଏବେ ତାଙ୍କର ରମଜାନ୍‌ ପର୍ବ ଚାଲିଛି। ତେଣୁ ସେ ଦିନ ବେଳେ  ରୋଜା ବା ଉପବାସ କରୁଥିଲେ। ସେ ପଣିଷପଣିଆ ଦେଖାଇ ନିଜ ରୋଜା ଭାଙ୍ଗି କିଛି ଖାଦ୍ୟ ଖାଇବା ପରେ  ରକ୍ତଦାନ କରିଥିଲେ। ସାକିରଙ୍କ ରକ୍ତ ପ୍ରସୂତି ମହିଳାଙ୍କୁ ଦିଆଯାଇଛି। ଏବେ ପ୍ରସୂତି ମହିଳା ସୁସ୍ଥ ଅଛନ୍ତି। ତେବେ ସାକିରଙ୍କ ଏହି ମହାନତା ପାଇଁ ତାଙ୍କୁ ବିଭିନ୍ନ ମହଲରୁ ପ୍ରଶଂସା କରାଯାଇଛି।