ବୋର୍ଡ ଅଫିସରେ ଏବିଭିପି କର୍ମୀଙ୍କ ଲଙ୍କାକାଣ୍ଡ

କଟକ (ଓଡ଼ିଶା ରିପୋର୍ଟର): ମାଟ୍ରିକ ପ୍ରଶ୍ନପତ୍ର ଭାଇରାଲ ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ମାଧ୍ୟମିକ ଶିକ୍ଷା ବୋର୍ଡ ଆଗରେ ଏବିଭିପି କର୍ମୀମାନେ ବିକ୍ଷୋଭ ପ୍ରଦର୍ଶନ କରିଥିଲେ। ପରେ ଗେଟ ଭାଙ୍ଗି ଅଫିସ ଭିତରେ ଧସେଇ ପସିବାକୁ ଉଦ୍ୟମ କରିଥିଲେ। ତେବେ ବୋର୍ଡ଼ କର୍ମଚାରୀମାନେ ସେମାନଙ୍କୁ ବିରୋଧ କରିଥିଲେ। ଫଳରେ ଉଭୟଙ୍କ ମଧ୍ୟରେ ଠେଲାପେଲା ହୋଇଥିଲା। ଖବର ପାଇ ପୋଲିସ ବୋର୍ଡ଼ କାର୍ଯ୍ୟାଳୟରେ ଏବିଭିପି କର୍ମୀଙ୍କୁ ବାହାର କରିଥିଲେ। ଏପରିକି ଘଉଡାଇବା ପାଇଁ ଲାଠି ଚାର୍ଜ କରିଥିଲା। କହିବାକୁ ଗଲେ କିଛି ସମୟ ପାଇଁ ବୋର୍ଡ଼ ଅଫିସ୍‌ ପରିସର ରଣକ୍ଷେତ୍ରରେ ପରିଣତ ହୋଇଥିଲା। ପରିସ୍ଥିତି ଉତ୍ତେଜନା ରହିଥିବାରୁ ଏବେ ମଧ୍ୟ ବୋର୍ଡ଼ କାର୍ଯ୍ୟାଳୟ ପରିସରରେ ପୋଲିସ ମୁତୟନ ହୋଇଛନ୍ତି।

ସୂଚନାକୁ ପ୍ରକାଶ, ଏବିଭିପି କର୍ମୀଙ୍କ ସହିତ ବୋର୍ଡ଼ ସଭାପତି ଜାହାନାର ବେଗମ ସେମାନ ଆଲୋଚନା କରିଥିଲେ। ମାତ୍ର ଆଲୋଚନାରୁ କିଛି ସୁଫଳ ବାହାନପାରିବାରୁ ଏବିଭିପି କର୍ମୀମାନେ ବୋର୍ଡ଼ କାର୍ଯ୍ୟାଳୟରେ ଧସେଇ ପସିଥିଲେ। ଯାହାଫଳରେ ଉତ୍ତେଜନା ପ୍ରକାଶ ପାଇଥିଲା।

ଗତ ୨୩ ତାରିଖରେ ମାଟ୍ରିକ ପରୀକ୍ଷା ଆରମ୍ଭ ହେବାର ଘଣ୍ଟାଏ ପରେ ମାତୃଭାଷା ଓଡ଼ିଆ ପଶ୍ନପତ୍ର ଭାଇରାଲ୍‌ ହୋଇଥିଲା। କେନ୍ଦ୍ରାପଡ଼ା ଜିଲ୍ଲା ଆଳି ବଜାର ଅଞ୍ଚଳରେ ହ୍ୱାଟ୍‌ସ ଆପ୍‌ରେ ମାତୃଭାଷାର ପ୍ରଶ୍ନପତ୍ର ବୁଲୁ ଥିବା ନେଇ ଅଭିଯୋଗ ହୋଇଥିଲା। ମାତ୍ର ଏପରି ଅଭିଯୋଗକୁ ଶିକ୍ଷା ସଚିବ ଓ ବୋର୍ଡ଼ କର୍ତ୍ତୃପକ୍ଷ ଖଣ୍ଡନ କରିଥିଲେ। ଗତକାଲି ପୁଣି ଥରେ ଇଂରାଜୀ ପ୍ରଶ୍ନପତ୍ର ଲିକ୍‌ ହୋଇଥିବା ଅଭିଯୋଗ ହୋଇଛି।