ଗଛରେ ପିଟି ହୋଇଗଲା ବୋଲେରୋ: ଦାଦା,ଖୁଡ଼ିଙ୍କ ସହ ପୁତୁରା ଗୁରୁତର  

ଟିଟିଲାଗଡ଼(ମାନସ ରଞ୍ଜନ ମହାନ୍ତି): ବଙ୍ଗୋମୁଣ୍ଡା ଥାନା ଅନ୍ତର୍ଗତ ଗନ୍ଧରାବନ୍ଧ ନିକଟରେ ଆଜି ସକାଳୁ ସକାଳୁ ଘଟିଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା। ସମ୍ପର୍କୀୟଙ୍କ ଦଶାହ କର୍ମ ପାଇଁ ଗୋଟିଏ ପରିବାରର ୩ ସଦସ୍ୟ ଯାଉଥିବା ବେଳେ ରାସ୍ତାରେ ଦୁର୍ଘଟଣା ହୋଇ ୩ ଜଣଯାକ ଗୁରୁତର ହୋଇଛନ୍ତି। ସେମାନଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି।

ସେମାନେ ବସି ଯାଉଥିବା  ବୋଲେରୋଟି ଭାରସାମ୍ୟ ହରାଇ ଗଛରେ ପିଟି ହୋଇଯିବାରୁ ଏହି ଦୁର୍ଘଟଣା ଘଟିଥିଲା। ଦୁର୍ଘଟଣା ପରେ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଛନ୍ତି।

ସୂଚନାଯୋଗ୍ୟ, ବଙ୍ଗୋମୁଣ୍ଡା ଥାନା ଅନ୍ତର୍ଗତ ଛତ୍ରଙ୍ଗ ଗ୍ରାମରୁ କଳାହାଣ୍ଡି ଜିଲା ବିଶ୍ୱନାଥପୁରକୁ ଏକ ଦଶାହ କାର୍ଯ୍ୟରେ ଯୋଗ ଦେବାକୁ ଗ୍ରାମର କୃଷ୍ଣଚନ୍ଦ୍ର ଦସ, ତାଙ୍କ ସ୍ତ୍ରୀ କେମତକୀ ଓ ପୁତୁରା ପ୍ରୀତମ ଏହି ଗାଡିରେ ବସି ଯାଉଥିବା ବେଳେ ଦୁର୍ଘଟଣା ଘଟିଥିଲା ।