ଯୌତୁକ ଲୋଭ: ବୋହୂ ଉପରକୁ ଏସିଡ୍ ଫିଙ୍ଗିଲା ଶାଶୂ

ବାଲେଶ୍ୱର: ଯୌତୁକ ପାଇଁ ଜଣେ ମହିଳାଙ୍କ ଉପରକୁ ତାଙ୍କ ଶାଶୂ ଏସିଡ୍‌ ମାଡ଼ କରିଛନ୍ତି। ଏପରି ଅଭିଯୋଗ ଆସିଛି ବାଲେଶ୍ୱର ଜିଲ୍ଲା ଭୋଗରାଇ ଥାନା ଦେଉଳା ଗାଁରୁ। ଗୁରୁତର ଅବସ୍ଥାରେ ବୋହୂକୁ ବାଲେଶ୍ୱର ମେଡ଼ିକାଲରେ ଭର୍ତ୍ତି କରାଯାଇଛି। ମହିଳାଙ୍କ ପେଟ ଓ ଅଣ୍ଟା ତଳକୁ ପୋଡ଼ି ଯାଇଛି।

ବିବାହ ପରଠାରୁ ଅଧିକ ଯୌତୁକ ଆଣିବା କହି ଶାଶୂ  ଓ ସ୍ୱାମୀ ବିଭିନ୍ନ ସମୟରେ ତାଙ୍କୁ ମାଡ଼ ମାରୁଥିବା ଅଭିଯୋଗ ହୋଇଛି। ଗତକାଲି ଏହି ଘଟଣାକୁ ନେଇ ସ୍ୱାମୀ ତାଙ୍କୁ ପ୍ରବଳ ମାଡ ମାରିଥିଲେ। ଏନେଇ ମହିଳା ଜଣଙ୍କ ତାଙ୍କ ବାପଘରକୁ ଫୋନ୍‌ କରି ଥାନାରେ ଅଭିଯୋଗ କରିବା ନେଇ କଥା ହୋଇଥିଲେ। ଏକଥା ତାଙ୍କ ଶାଶୂଙ୍କ କାନରେ ବାଜି ଥିଲା। ଉତ୍ତ୍ୟକ୍ତ ଶାଶୂ ବୋହୂ  ଉପରକୁ ଏସିଡ୍‌ ଫିଙ୍ଗି ଦେଇଥିବା ଅଭିଯୋଗ ହୋଇଛି।

ବାପଘର ଲୋକେ ସୂଚନା ପାଇ ତାଙ୍କୁ ପ୍ରଥମେ ଜଳେଶ୍ୱର ଡ଼ାକ୍ତରଖାନାକୁ ନେଇଥିଲେ। ସେଠାରୁ ତାଙ୍କୁ ବାଲେଶ୍ୱର ମେଡ଼ିକାଲକୁ ସ୍ଥାନାନ୍ତର କରାଯାଇଛି।  ଏନେଇ ମହିଳାଙ୍କ ଶ୍ୱଶୁର ଘର ଲୋକଙ୍କ ପ୍ରତିକ୍ରିୟା ମିଳିପାରିନି।