କଳା ତାଲିକାଭୁକ୍ତ ହେବା ପରେ ବି କମିନି ପଣ୍ଡା ଇନଫ୍ରା ପ୍ରେମ

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ଦୁଇ ଦୁଇ ଥର ଦୁର୍ଘଟଣା ପରେ ଶେଷରେ ବମିଖାଲ ଓଭର ବ୍ରିଜ୍ କାମରୁ ହଟିଛି ପଣ୍ଡା ଇନଫ୍ରା। ହେଲେ କଳା ତାଲିକାଭୁକ୍ତ ପଣ୍ଡା ଇନଫ୍ରା ପ୍ରତି ରାଜ୍ୟ ସରକାରଙ୍କ ପ୍ରୀତି କମିଥିବା ଭଳି ମନେହେଉ ନାହିଁ।</p> <p>ବମିଖାଲରେ ଦୁଇଥର ଦୁର୍ଘଟଣା ଘଟିବା ପରେ ବିବାଦ ଓ ଅତ୍ୟଧିକ ଚାପ ଯୋଗୁଁ ଓଭରବ୍ରିଜ୍ ନିର୍ମାଣ କାର୍ଯ୍ୟରୁ ପଣ୍ଡା ଇନଫ୍ରାକୁ ହଟାଇ ଦିଆଯାଇଛି। ନାନା ବିବାଦ, ସମ୍ବଲପୁର ଓ ଜଟଣୀରେ ନିମ୍ନମାନର କାମ ହେଉଥିବା ଅଭିଯୋଗ ପରେ ବି ସେହି ପ୍ରୋଜେକ୍ଟରୁ କମ୍ପାନୀକୁ ବାଦ୍ ଦିଆଯାଇ ନଥିବାରୁ ପୂର୍ତ୍ତ ବିଭାଗର ଆନ୍ତରିକତା ନେଇ ବିରୋଧୀ ପ୍ରଶ୍ନ ଉଠାଇଛନ୍ତି।</p> <p>ସୂଚନାଯୋଗ୍ୟ ଯେ, ବମିଖାଲରେ ନିର୍ମାଣ ସମୟରେ ଓଭରବ୍ରିଜ ଦୁଇ ଦୁଇ ଥର ଭୁଶୁଡ଼ିଲା। ଦୁଇଟି ମୁଣ୍ଡ ଗଡ଼ିଲା। ସଂସ୍ଥା ମୁଖ୍ୟ ଜେଲ୍ ଗଲେ। ଏତେସବୁ ସତ୍ତ୍ୱେ ରାତି ଅଧିଆ କାମ କରି ନିର୍ମାଣ କାମ ତରବରିଭା ଭାବେ ଶେଷ କରିବାକୁ ପ୍ରୟାସ କରୁଛି ପଣ୍ଡା ଇନଫ୍ରା। ଗତ ୩ ତାରିଖର ଅଘଟଣ ପରେ ସରକାରଙ୍କ ଉପରେ ଚାପ ବଢ଼ିବାରୁ ପୂର୍ତ୍ତ ବିଭାଗ ନିଷ୍ପତ୍ତି ବଦଳାଇବା ସହ ବମିଖାଲ ଓଭରବ୍ରିଜ୍ କାମରୁ ପଣ୍ଡା ଇନଫ୍ରାକୁ ବାଦ ଦେଇଛି।</p> <p>ପୂର୍ତ୍ତ ବିଭାଗର ଏ ନିଷ୍ପତ୍ତି ଧର୍ମକୁ ଆଖି ଠାର ଭଳି ବୋଲି ଅଭିଯୋଗ ହେଉଛି। କାହିଁକି ନା ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ ଓଭରବ୍ରିଜ୍&zwnj;ର ଫିନିସିଂ ସହ ଆଉ ମାତ୍ର ଅଳ୍ପ କାମ ବାକି ଅଛି। ଦୁଇ ମାସ ଭିତରେ ଏହା ଶେଷ ହୋଇଯିବ। ଆଉ ଓଭରବ୍ରିଜ୍ ଉଦ୍&zwnj;ଘାଟନ ପୂର୍ବରୁ ତୃତୀୟ ପକ୍ଷ ଦ୍ୱାରା ନିରାପତ୍ତା ସର୍ଭେ ହେବ। ଏବେ ପ୍ରଶ୍ନ ଉଠୁଛି ପୂର୍ବରୁ ବଡ଼ ଦୁର୍ଘଟଣା ଘଟିଥିଲେ ବି କାହିଁକି ଦ୍ୱିତୀୟ ଦୁର୍ଘଟଣା ପରେ କାର୍ଯ୍ୟାନୁଷ୍ଠାନ ହେଲା ? ଆଉ ଅଳ୍ପ କାମ ଥିବାରୁ ଏହି ନିଷ୍ପତ୍ତି ହୋଇଛି କି ? କଳା ତାଲିକାଭୁକ୍ତ ହୋଇଥିବା ପଣ୍ଡା ଇନଫ୍ରା ବିରୋଧରେ ନିମ୍ନମାନର କାମ ଅଭିଯୋଗ ସତ୍ତ୍ୱେ ସମ୍ବଲପୁର ଓ ଜଟଣୀ ପ୍ରୋଜେକ୍ଟରୁ କାହିଁକି ବାଦ୍ ଦିଆଯାଇନାହିଁ ?</p> <p>ପୂର୍ତ୍ତ ବିଭାଗର ଏହି ନିଷ୍ପତ୍ତି ବିରୋଧୀଙ୍କୁ ସନ୍ତୁଷ୍ଟ କରି ପାରିନାହିଁ। ରାଜ୍ୟ ସରକାରଙ୍କ କଡା ସମାଲୋଚନା କରିଛନ୍ତି ବିରୋଧୀ କଂଗ୍ରେସ ଓ ବିଜେପି।</p> <p>କଳାତାଲିକାଭୁକ୍ତ ସତ୍ତ୍ୱେ ଫଣ୍ଡା ଇନଫ୍ରାକୁ ପୁଣି କାମ ମିଳିବା, ନାଁକୁ ମାତ୍ର କାର୍ଯ୍ୟାନୁଷ୍ଠାନ ହେବା ପଛରେ ଶାସକ ଦଳର ଜଣେ ପ୍ରଭାବଶାଳୀ ବିଧାୟକଙ୍କ ଭୂମିକା ଥିବା ଚର୍ଚ୍ଚା ହେଉଛି। ବିଜେଡିର ବରିଷ୍ଠ ନେତା ଦାମ ରାଉତ ବି ଦୁଇଦିନ ତଳେ ଏ ନେଇ ବାଣ ମାରି କହିଥିଲେ &lsquo;ନିଶ୍ଚୟ କାହାର ଚାପ ଥିବ, ଗଣମାଧ୍ୟମ ଖୋଜି ବାହାର କରୁ&rsquo;।</p>