ଭୁବନେଶ୍ୱର(ଓଡ଼ିଶା ରିପୋର୍ଟର): ବିଜେପୁର ଉପନିର୍ବାଚନ ପାଇଁ ଆଜି ସର୍ବଦଳୀୟ ବୈଠକ ଅନୁଷ୍ଠିତ ହୋଇଯାଇଛି । ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ(ସିଇଓ) ସୁରେନ୍ଦ୍ର କୁମାରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ନିର୍ବାଚନ ପ୍ରକ୍ରିୟାକୁ ଶାନ୍ତିଶୃଙ୍ଖଳାର ପରିଚାଳନା ଉପରେ ଗୁରୁତ୍ୱ ଦିଆଯାଇଥିଲା।
ଏହି ବୈଠକରେ ସମସ୍ତ ରାଜନୀତିକ ଦଳର ସହଯୋଗ ଲୋଡ଼ି ସିଇଓ ଶ୍ରୀ କୁମାର କହିଥିଲେ ଯେ, ନାମାଙ୍କନ ପତ୍ର ଦାଖଲବେଳେ ପ୍ରାର୍ଥୀମାନେ ଫର୍ମ ନ-୨୬ରେ ସମ୍ପୂର୍ଣ୍ଣ ବିବରଣୀ ପ୍ରଦାନ କରିବେ। ସତ୍ୟପାଠ ଫର୍ମର କୌଣସି ସ୍ତମ୍ଭ କିମ୍ବା କୌଣସି ଧାଡ଼ି ଖାଲି ରହିବ ନାହିଁ। ଯଦି କୌଣସି ପ୍ରାର୍ଥୀଙ୍କ ବିରୁଦ୍ଧରେ ଅପରାଧ ମାମଲା ଥାଏ, ତେବେ ସେମାନେ ନିର୍ବାଚନ ପ୍ରଚାର ସମୟରେ ଅନ୍ତତଃ ୩ଥର ଗଣମାଧ୍ୟମରେ ତାହା ପ୍ରଚାରପ୍ରସାର କରାଇବେ। ସର୍ବସାଧାରଣ କୋଠାମାନଙ୍କରେ ନିର୍ବାଚନ ସଂକ୍ରାନ୍ତ ବ୍ୟାନର, ହୋର୍ଡିଂ ଓ ପୋଷ୍ଟରଗୁଡ଼ିକୁ ନଲଗାଇବା ପାଇଁ ସେ ରାଜନୀତିକ ଦଳର ପ୍ରତିନିଧିମାନଙ୍କୁ ଅନୁରୋଧ କରିଥିଲେ। ପ୍ରଥମଥର ପାଇଁ ବିଜେପୁର
ଉପନିର୍ବାଚନରେ ଏମ-୩ ଭର୍ସନ ଇଭିଏମ୍ ମେସିନର ଉପଯୋଗ କରାଯିବ।
ଏହି ସର୍ବଦଳୀୟ ବୈଠକରେ ବିଜେପି ପକ୍ଷରୁ ରାଜ୍ୟ ଉପସଭାପତି ସମୀର ମହାନ୍ତି,ଗୋଲକ ମହାପାତ୍ର ଓ ଅଶୋକ କୁମାର ତ୍ରିପାଠୀ, ବିଜେଡିର ସାଧାରଣ ସମ୍ପାଦକ ଅନନ୍ତ ନାରାୟଣ ଜେନା ଓ ସଞ୍ଜୟ କୁମାର ସେଠୀଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।