ଓଟିଭି ବିରୋଧରେ ନିର୍ବାଚନ କମିଶନଙ୍କ ଦ୍ୱାରସ୍ଥ ହେଲା ବିଜେଡି, ଓଟିଭି କହିଲା- ନିରପେକ୍ଷ ଥିଲୁ, ରହିବୁ

ଭୁବନେଶ୍ୱର (ଓଡ଼ିଶା ରିପୋର୍ଟର): ଓଟିଭି ବିରୋଧରେ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛନ୍ତି ବିଜେଡି ନେତା। ଏ ନେଇ ନିର୍ବାଚନ କମିଶନ ନିକଟରେ ଏକ ପିଟିସନ ଦାଖଲ କରିଛି ବିଜେଡି। ସାମ୍ବାଦିକ ସମ୍ମିଳନୀରେ ବିଜେଡି ଉପସଭାପତି ସୂର୍ଯ୍ୟନାରାୟଣ ପାତ୍ର ଓ ମୁଖପାତ୍ର ପ୍ରତାପ ଦେବ ଓଟିଭି ବିରୋଧରେ ଆଣିଛନ୍ତି ସଙ୍ଗୀନ ଅଭିଯୋଗ। ସୂର୍ଯ୍ୟ ପାତ୍ର କହିଛନ୍ତି, “ବିଜେପୁର ଉପନିର୍ବାଚନରେ ଓଟିଭି ବିଜେପିକୁ ସୁହାଇଲା ଭଳି ଖବର ପରିବେଷଣ କରୁଛି। ଉପନିର୍ବାଚନରେ ବିଭିନ୍ନ ଦଳର ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଥିବା ବେଳେ ଓଟିଭି ବିଜେପିର କାର୍ଯ୍ୟକ୍ରମକୁ ବହୁଳ ଭାବରେ ପ୍ରସାରଣ କରୁଛି। ବିଜେପି ପ୍ରାର୍ଥୀଙ୍କୁ ଜିତାଇବା ଓ ବିଜେଡି ପ୍ରାର୍ଥୀଙ୍କୁ ହରାଇବା ପାଇଁ ଏଭଳି କାର୍ଯ୍ୟକ୍ରମ କରାଯାଉଛି। ଏଭଳି ପେଡ୍ ନ୍ୟୁଜ୍‌ର ଖର୍ଚ୍ଚ ପ୍ରାର୍ଥୀଙ୍କ ହିସାବରେ ଯୋଡାଯାଉ।”

ଏପରି ଅଭିଯୋଗକୁ ନେଇ ସୂର୍ଯ୍ୟ ପାତ୍ର କ’ଣ କହୁଛନ୍ତି, ଶୁଣନ୍ତୁ ଏହି ଭିଡିଓରୁ।

ଏପରି ଅଭିଯୋଗ ଆସିବା ପରେ ଓଟିଭି ପକ୍ଷରୁ ସ୍ପଷ୍ଟୀକରଣ ଦିଆଯାଇଛି। ଓଟିଭି ପକ୍ଷରୁ କୁହାଯାଇଛି, ୨ ଦଶନ୍ଧି ଧରି ନିରପେକ୍ଷ ଖବର ପ୍ରସାରଣ କରି ଆଦୃତ ହୋଇଛୁ, ବିଜେଡିର ଏପରି ଅଭିଯୋଗ ପଛରେ କୌଣସି ଆଧାର ନାହିଁ। ବିଜେପୁର ଉପନିର୍ବାଚନ ଖବରରେ ଯଥେଷ୍ଟ ନିରପେକ୍ଷତା ଅବଲମ୍ବନ କରାଯାଉଛି। ତାରିଖ ଘୋଷଣା, ନାମାଙ୍କନ, ପ୍ରଚାର ଯାଏଁ ସବୁ କିଛି ନିରପେକ୍ଷ ରହିଛି। ବିଜେପୁର ଉପନିର୍ବାଚନ ପାଇଁ ସବୁ ଦଳର ଟିକିନିଖି ଖବର ଦର୍ଶକଙ୍କ ପାଖରେ ପହଞ୍ଚାଇବାକୁ ପ୍ରୟାସ କରୁଛୁ। ଖବର, ଷ୍ଟୁଡିଓ ଆଲୋଚନା, ସ୍କ୍ରଲିଂ ନିର୍ଦ୍ଦିଷ୍ଟ କାହାକୁ ସୁହାଇଲା ଭଳି ନୁହେଁ। ସେ ସମୟର ଖବରର ଗୁରୁତ୍ୱ ହିଁ ଆମ ପାଇଁ ମାପକାଠି ରହିଥାଏ। ଓଟିଭି କଦାପି ପେଡ୍ ନ୍ୟୁଜ୍‌ ପରିବେଷଣ କରେ ନାହିଁ। ଓଟିଭି କଦାପି ପେଡ୍ ନ୍ୟୁଜ୍‌ ପରିବେଷଣ କରେ ନାହିଁ, ଓଟିଭି ଭଳି ଏକ ପ୍ରତିଷ୍ଠିତ ଗଣମାଧ୍ୟମକୁ ବଦନାମ କରିବାକୁ ପ୍ରୟାସ କରାଯାଇଛି। ରାଜନୈତିକ ଲଢ଼େଇରେ ଓଟିଭିକୁ ସଂପୃକ୍ତ କରାଯିବା ନିନ୍ଦନୀୟ।