ଦାବି ପୂରଣ ପାଇଁ ଅହୋରାତ୍ର ଧାରଣାରେ ବସିଛନ୍ତି ଅଙ୍ଗନବାଡ଼ି କର୍ମୀ

ଭୁବନେଶ୍ୱର: ଚାରିଆଡ଼େ ପାର୍ବଣର ମହକ। ଚାଲିଛି ଜଗଦ୍ ଜନନୀ ମା’ ଦୁର୍ଗାଙ୍କ ପୂଜାର୍ଚ୍ଚନା। ହେଲେ ଅଙ୍ଗନବାଡି କର୍ମୀମାନେ ନିଜ ଦାବି ପୂରଣ ପାଇଁ ବସିଛନ୍ତି ଅହୋରାତ୍ର ଧାରଣାରେ। ମାସିକ ୧୮ ହଜାର ଦରମା, ଅବସରକାଳୀନ ସୁବିଧା, ଚାକିରି କାଳରେ ମୃତ୍ୟୁ ଘଟିଲେ ଉପଯୁକ୍ତ କ୍ଷତିପୂରଣ ଓ ସମସ୍ତ ସରକାରୀ ସହାୟତା ପ୍ରଦାନ ଭଳି ବିଭିନ୍ନ ଦାବି କରିଛି ଅଲ୍‌ ଓଡ଼ିଶା ଅଙ୍ଗନବାଡ଼ି ଲେଡିଜ୍ ଓ୍ୱାର୍କର୍ସ ଆସୋସିଏସନ୍‌।

ଗତ ୧୨ ତାରିଖରେ ବିଧାନସଭା ସମ୍ମୁଖରେ ବିକ୍ଷୋଭ କରିବା ପରେ ୧୪ ତାରିଖରୁ ଲୋୟର ପିଏମଜିରେ ଅହୋରାତ୍ର ଧାରଣାରେ ବସିଛନ୍ତି ଶହ ଶହ କର୍ମୀ। ଗତ ମେ’ ମାସରେ ସରକାରଙ୍କ ସହିତ ଆଲୋଚନା ପରେ ସରକାର ୨ ମାସ ସମୟ ନେଇଥିଲେ।  କିନ୍ତୁ ୩ ମାସ ବିତିଯାଇଥିଲେ ମଧ୍ୟ ଦାବି ପୂରଣ ନ ହେବାରୁ କାର୍ଯ୍ୟବନ୍ଦ ଆନ୍ଦୋଳନ କରିଛି ସଂଘ।  ପ୍ରତ୍ୟେକ ଦିନ ଗୋଟିଏ ଗୋଟିଏ ଜିଲ୍ଲାର ଅଙ୍ଗନବାଡ଼ି କର୍ମୀମାନେ ଧାରଣା ଦେଉଛନ୍ତି।