ଅନୁଗୁଳ: ଅନୁଗୁଳ ଜିଲ୍ଲା ନିଶା ଥାନା ମହିତଳା ଗାଁ ପୋଖରୀରୁ ୩ ଇଂଜିନିୟରଙ୍କ ମୃତ୍ୟୁର ରହସ୍ୟ ଉପରୁ ଏଯାଏଁ ପରଦା ଉଠିନି। ପୋଲିସ ଘଟଣାର ତନାଘନା ଜାରି ରହିଛି। କେଉଁ ପରିସ୍ଥିତିରେ ଏଭଳି ଅଭାବନୀୟ ଘଟଣା ଘଟିଲା ? ପୋଖରୀରରେ ବୁଡି ଏମାନଙ୍କ ମୃତ୍ୟୁ ହୋଇଛି ନା ଅନ୍ୟ କିଛି କାରଣ ରହିଛି ? ବିଳମ୍ୱିତ ରାତିରେ କେଉଁ ପରିସ୍ଥିତିରେ ଏମାନେ ବାହାରକୁ ଆସିଥିଲେ ? ଏସବୁ ଦିଗକୁ ନେଇ ପୋଲିସ ଖୋଳତାଡ଼ ଜାରି ରଖିବା ସହ ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା କରିଛି। ମୃତକ ମାନେ ହେଲେ ପଞ୍ଜ।ବ ପଟିୟାଲାର ଅବତାର ସିଂ, ଉତ୍ତରପ୍ରଦେଶ ଇନ୍ଦ୍ରନଗରର ସମୀର ନିଗମ୍ ଏବଂ ରାଜସ୍ଥାନ ଅଲୱାରର ମନୋଜ ଯାଦବ। ଏହି ୩ଜଣଙ୍କ ପରିବାରକୁ ଏ ସଂପର୍କରେ ଖବର ଦିଆଯାଇଛି।
ସେପଟେ ଜିନ୍ଦଲ ଷ୍ଟିଲ ଆଣ୍ଡ ପାୱାର ଲିମିଟେଡର ପ୍ରେସ ରିଲିଜରେ ପୋଖରୀରେ ବୁଡି ୩ ଜଣଙ୍କ ମୃତ୍ୟୁ ହୋଇଥିବା ଦର୍ଶାଯାଇଛି। ଏମାନଙ୍କ ମୃତ୍ୟୁରେ କଂପାନୀ ପକ୍ଷରୁ ଶୋକପ୍ରକାଶ କରାଯିବା ସହ ପୋଲିସକୁ ସହଯୋଗ କରାଯାଉଥିବା କୁହାଯାଇଛି।