ନୟାଗଡ଼(ଆର୍ତ୍ତତ୍ରାଣ ପ୍ରଧାନ): ନୟାଗଡ଼ ଜିଲ୍ଲା ଓଡ଼ଗାଁ ଥାନା ବହାଡ଼ାଝୋଲା ଢିପିସାହିରେ ଗ୍ୟାସ୍ ଟାଙ୍କି ବିସ୍ଫୋରଣ ଘଟଣାରେ ଆଜି ଆଉ ଜଣଙ୍କର ମୃତ୍ୟୁ ଘଟିଛି। ତାଙ୍କ ନାଁ ବିଜୟ ଘଟୁଆଳ। ସେ କଟକ ବଡ଼ ମେଡିକାଲରେ ଚିକିତ୍ସାଧୀନ ଥିଲେ। ଏହା ସହିତ ଏହି ଘଟଣାରେ ମୃତ୍ୟୁ ସଂଖ୍ୟା ଦୁଇରେ ପହଞ୍ଚିଛି। ଗତ ସପ୍ତାହରେ ତାଙ୍କ ସାନ ପୁଅଙ୍କର ମୃତ୍ୟୁ ହୋଇଥିଲା। ଅନ୍ୟପକ୍ଷରେ ତାଙ୍କ ମଝିଆ ପୁଅଙ୍କ ଅବସ୍ଥା ଗୁରୁତର ରହିଛି।
ସୂଚନାଯୋଗ୍ୟ, ମେ’ ୨୫ ତାରିଖରେ ବିଜୟ ଘଟୁଆଙ୍କ ଘରେ ଗ୍ୟାସ୍ ଟାଙ୍କି ଲିକ୍ ହୋଇଥିଲା। ତେଣୁ ଜଗନ୍ନାଥ ସେନାପତି ନାମକ ଜଣେ ଗ୍ୟାସ୍ ମିସ୍ତ୍ରୀ ଟାଙ୍କି ସଜାଡ଼ିବାକୁ ଆସିଥିଲେ। ଟାଙ୍କି ସଜାଡ଼ିବା ପରେ ଜଗନ୍ନାଥ ଦିଆସିଲି ଲଗାଇ ଚେକ୍ କରୁଥିବା ବେଳେ ହଠାତ୍ ନିଆଁ ଲାଗିଯାଇଥିଲା। ଏହାପରେ ଚାରିଆଡ଼େ ନିଆଁ ବ୍ୟାପୀ ଯାଇଥିଲା। ସେତେବେଳେ ସେଠାରେ ଉପସ୍ଥିତ ବିଜୟ, ତାଙ୍କର ଦୁଇ ପୁଅ ଜିତେନ୍ଦ୍ର ଓ ବୁଲୁ ସହିତ ଗ୍ୟାସ୍ ମିସ୍ତ୍ରୀ ଜଗନ୍ନାଥ ପୋଡ଼ି ହୋଇ ଯାଇଥିଲେ।