କାଶୀପୁରରେ ଆଖି ବୁଜିଲେ ଆଉ ଜଣେ ହଇଜା ଆକ୍ରାନ୍ତ, ମୃତ୍ୟୁ ସଂଖ୍ୟା ୮ ଛୁଇଁଲା

ରାୟଗଡ଼ା(ମାଉଡି ବାରିକ): ରାୟଗଡ଼ା ଜିଲ୍ଲା କାଶୀପୁରରେ ଝାଡ଼ାବାନ୍ତି ସ୍ଥିତି ଉଦବେଗଜନକ ରହିଛି। ପ୍ରଶାସନର ବହୁ ଚେଷ୍ଟା ସତ୍ତ୍ୱେ ପୁଣି ଜଣେ ଝାଡ଼ାବାନ୍ତି ଆକ୍ରାନ୍ତ ଆଖି ବୁଜିଛନ୍ତି। ଫଳରେ ମୃତ୍ୟୁ ସଂଖ୍ୟା ୮ରେ ପହଞ୍ଚିଛି। ମୃତକ ହେଲେ ଅର୍ଜୁନ ଜାନି । ତାଙ୍କ ଘର ଦୁଡ଼ୁକାବାହାଲ ପଞ୍ଚାୟତ ଡେଙ୍ଗାଗୁଡ଼ାରେ । କାଶୀପୁର ସ୍ଥିତିକୁ ନେଇ ଗୃହ ସରଗରମ ରହୁଥିବା ବେଳେ ଆଜି ସ୍ୱାସ୍ଥ୍ୟ ମନ୍ତ୍ରୀ ନବ ଦାସ ଉକ୍ତ ବ୍ଲକକୁ ଯିବାର କାର୍ଯ୍ୟକ୍ରମ ରହିଛି।

ଗତ ୧୮ ତାରିଖରେ ହଇଜାରେ ଆକ୍ରାନ୍ତ ହୋଇଥିବା ଅର୍ଜୁନ ଚିକିତ୍ସିତ ପରେ ଘରକୁ ଫେରିଥିଲେ। ଏହାପରେ ପୁଣି ଥରେ ତାଙ୍କ ନିକଟରେ ସମାନ ଲକ୍ଷଣ ଦେଖାଯାଇଥିବା ବେଳେ ଆଜି ସକାଳେ ସେ ଆଖି ବୁଜିଛନ୍ତି। ଝାଡ଼ାବାନ୍ତି ଯୋଗୁ  ଅର୍ଜୁନଙ୍କ ମୃତ୍ୟୁ ହୋଇଥିବା ପରିବାର ପକ୍ଷରୁ କୁହାଯାଇଥିବା ବେଳେ  ପ୍ରଶାସନ ପକ୍ଷରୁ ଏ ନେଇ କିନ୍ତୁ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ।

ଦୂଷିତ ଝରଣା ପାଣି ହିଁ ରାୟଗଡ଼ା ଜିଲ୍ଲାର କାଶୀପୁରରେ ବ୍ୟାପିଥିବା ଝାଡ଼ାବାନ୍ତିର କାରଣ । ସେଠାରେ ଭିବ୍ରିଓ କଲେରା ବିଜାଣୁ ଠାବ ହୋଇଥିବା ବେଳେ ଏହାର ମୂଳ ସଂକ୍ରମଣ ପାଣି ଉତ୍ସରୁ ହିଁ ଆରମ୍ଭ ହୋଇଛି ବୋଲି କହିସାରିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର। ଏହାସତ୍ତ୍ୱେ ଲୋକଙ୍କୁ ବିଶୁଦ୍ଧ ଜଳ ଯୋଗାଣ ପାଇଁ ପ୍ରଶାସନ ପକ୍ଷରୁ ସେପରି ତତ୍ପରତା ପ୍ରକାଶ ପାଉ ନ ଥିବା ଅଭିଯୋଗ ହେଉଛି। ଏବେ ପ୍ରଶାସନ ପକ୍ଷରୁ କାଶୀପୁର ବ୍ଲକର ବିଭିନ୍ନ ଗ୍ରାମକୁ ଟ୍ୟାଙ୍କର ଯୋଗେ ଜଳ ଯୋଗାଇ ହେଉଥିଲେ ବି ତାହା ପର୍ଯ୍ୟାପ୍ତ ହେଉ ନାହିଁ । ଫଳରେ ଲୋକେ ପୁଣି ଥରେ ଝରଣାର ଦୂଷିତ ଜଳ ସଂଗ୍ରହ କରି ବ୍ୟବହାର କରୁଛନ୍ତି।

ଏହାବାଦ କାଶୀପୁର ବ୍ଲକରେ ହଇଜା ବ୍ୟାପିଥିବା ବେଳେ ପ୍ରଶାସନ ପକ୍ଷରୁ ଉକ୍ତ ବ୍ଲକର ଟିକିରିରୁ ହିଁ ବୋରୱେଲରୁ ପାଣି ସଂଗ୍ରହ କରି ଟ୍ୟାଙ୍କର ଯୋଗେ ଲୋକଙ୍କୁ ଦିଆଯାଉଛି। ମାତ୍ର ତାହା କେତେ ବିଶୁଦ୍ଧ ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। କାରଣ କାଶୀପୁରରେ ଝାଡ଼ାବାନ୍ତି ବ୍ୟାପିଥିବାରୁ ପୁଣି ଉକ୍ତ ଅଞ୍ଚଳରୁ ଜଳ ସଂଗ୍ରହ କରି ଲୋକଙ୍କୁ ଦେଲେ ଏହି ଚେନ୍‌ କିପରି ବ୍ରେକ୍‌ କରିବ ତାହା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି।

ହଇଜା ଆକ୍ରାନ୍ତଙ୍କ ସଂଖ୍ୟାକୁ ନିୟନ୍ତ୍ରଣକୁ ଆଣିବାକୁ  କାଶୀପୁରରେ ୨ଟି ଅସ୍ଥାୟୀ ସ୍ୱାସ୍ଥ୍ୟକେନ୍ଦ୍ର ଖୋଲାଯାଇଛି ।  ଗାଁକୁ ଗାଁ ବୁଲୁଛନ୍ତି ସ୍ୱାସ୍ଥ୍ୟକର୍ମୀ ଏବଂ ଆଶାକର୍ମୀ । ମେଡ଼ିକାଲ୍ ଟିମ୍ ବି ମୁତୟନ ହୋଇଛନ୍ତି । ଏହାସତ୍ତ୍ୱେ ଆକ୍ରାନ୍ତଙ୍କ ମୃତ୍ୟୁ ହେବା ଯୋଗୁ ଲୋକେ ଛାନିଆ ହୋଇ ପଡ଼ିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।