ଉଠବସର ପ୍ରତିବାଦରେ ଉଠବସ

ଭୁବନେଶ୍ୱର(ଓଡ଼ିଶା ରିପୋର୍ଟର): ଉତ୍ତର ଓଡ଼ିଶା ବିଶ୍ୱବିଦ୍ୟାଳୟ ଛାତ୍ର ନେତା ତୁଷାର ନାୟକଙ୍କୁ ବିଜେଡି ବିଧାୟକ ଉଠାବସା କରାଇଥିଲେ। ଏହାର ପ୍ରତିବାଦରେ ଆଜି ଉଠବସ ହୋଇଛନ୍ତି ଛାତ୍ର କଂଗ୍ରେସ ଓ ଯୁବ ବିଜେପି। ବାରିପଦାରେ ଜଳିଥିବା ଏହି ନିଆଁ ଭୁବନେଶ୍ୱର ପର୍ଯ୍ୟନ୍ତ ବ୍ୟାପିଛି। ବିଧାୟକ ଅରୁଣ ସାହୁ କ୍ଷମା ମାଗନ୍ତୁ ବୋଲି ସେମାନେ ଦାବି କରିଛନ୍ତି।  ଏପରି ସମୟରେ ଅରୁଣଙ୍କ ସମର୍ଥନରେ ଓକିଲାତି କରିବାକୁ ବାହାରିଛି ଛାତ୍ର ବିଜେଡି।

ପୂରା ଘଟଣାଟି ଏମିତି। ଛାତ୍ର ନେତା ତୁଷାର ଉତ୍ତର ଓଡ଼ିଶା ବିଶ୍ୱବିଦ୍ୟାଳୟର ୧୧ଟି ବିଭାଗକୁ ରେଗୁଲାର କୋର୍ସ କରିବା ପାଇଁ ଦାବି କରିଆସୁଥିଲେ। ଏସମ୍ପର୍କରେ ଦାବି ଜଣାଇବା ପାଇଁ ସେ ଗତକାଲି ମୟୂରଭଞ୍ଜ ଜିଲ୍ଲା ପର୍ଯ୍ୟବେକ୍ଷକ ତଥା ବିଜେଡି ବିଧାୟକ ଅରୁଣ ସାହୁଙ୍କ ପାଖକୁ ଆସିଥିଲେ। ଅରୁଣ ଦାବି ଶୁଣିବା ପରିବର୍ତ୍ତେ ଗାଳି ଦେଇ ବାହାରିଯିବାକୁ କହିଥିଲେ। ଅପମାନିତ ହୋଇ ତୁଷାର ବାହାରକୁ ଚାଲି ଆସିଥିଲେ। ପରେ ଆଉଥରେ ତାଙ୍କୁ ଡାକି ୭୦ ଥର ଉଠବସ୍‌ କରାଇଥିଲେ। ତା’ପରେ ଏ ସମ୍ପର୍କରେ ତୁଷାର ନିଜ ଫେସ୍‌ବୁକ୍‌ରେ ଲେଖିଥିଲେ। ତା’ପରେ ଏହାକୁ ନେଇ ରାଜ୍ୟରାଜନୀତି ଉଷ୍ମ ହୋଇଥିଲା ।

ଅରୁଣ ସାହୁଙ୍କ ବିରୋଧରେ ଛାତ୍ର କଂଗ୍ରେସ ଆଜି ମୟୂରଭଞ୍ଜ ଜିଲ୍ଲାପାଙ୍କ ଅଫିସ ଆଗରେ ପ୍ରତିବାଦ କରିଥିଲା। ଏପରିକି ଉଠ୍‌ବସ୍‌ ହୋଇଥିଲେ। ଅରୁଣଙ୍କ ଇସ୍ତଫା ବି ଦାବି କରିଥିଲା ଛାତ୍ର କଂଗ୍ରେସ। ଅରୁଣଙ୍କ ଏପରି କାର୍ଯ୍ୟକୁ ଏବିଭିପି ନାପସନ୍ଦ କରିଛି। ଏହାର ପ୍ରତିବାଦରେ ବାରିପଦା, ରାଇରଙ୍ଗପୁର ଓ ଭୁବନେଶ୍ୱରରେ ମଧ୍ୟରାସ୍ତାକୁ ଓହ୍ଲାଇଛି। ମୟୂରଭଞ୍ଜ ଜିଲ୍ଲା ବିଜେପି କହିଛି ଅରୁଣ କ୍ଷମା ନମାଗିଲେ ତାଙ୍କୁ ଅଣ୍ଡା ମାଡ଼ କରାଯିବ।

ଉଠ୍‌ବସ୍‌କୁ ନେଇ ରାଜନୀତି ବଢ଼ୁଥିବା ବେଳେ ଅରୁଣ କିନ୍ତୁ ମୁହଁ ଖୋଲୁ ନାହାନ୍ତି। ଦିନକୁ ଦିନ ତାଙ୍କ ବିରୋଧରେ ଅସନ୍ତୋଷ ପଢ଼ୁଛି। ଏପରିସ୍ଥିତିରେ ତାଙ୍କ ସପକ୍ଷରେ ବାହାରିଛି ଛାତ୍ର ବିଜେଡି।

କିଏ କ’ଣ କହୁଛି

ମୟୂରଭଞ୍ଜ ଜିଲ୍ଲା ଯୁବ ବିଜେପି ସଭାପତି କୁମାର ମଙ୍ଗଳମ କହିଛନ୍ତି-“ଦଳମତ ନିର୍ବିଶେଷରେ ଏହା ମୟୂରଭଞ୍ଜ ଜିଲ୍ଲାବାସୀଙ୍କ ପ୍ରତି ଅପମାନ। ଏହାକୁ ବିଜେପି ଜିଲ୍ଲା ଯୁବ ମୋର୍ଚ୍ଚା କେବେ ହେଲେ ବରଦାସ୍ତ କରିବ ନାହିଁ। ଆଗକୁ ଅରୁଣଙ୍କୁ ଜିଲ୍ଲା ଭିତରକୁ ପସେଇବାକୁ ଦିଆଯିବ ନାହିଁ। ଯଦି ସେ ଆସନ୍ତି, ଅଣ୍ଡା ମାଡ଼ କରାଯିବା ସହ କଳା ପତାକା ପ୍ରଦର୍ଶନ କରାଯିବ। ଅରୁଣ ସାହୁ ଯଥାଶୀଘ୍ର ଭୁଲ ମାଗନ୍ତୁ।”

ମୟୂରଭଞ୍ଜ ଜିଲ୍ଲା ଯୁବ କଂଗ୍ରେସ ସଭାପତି ରାକେଶ ସିଂ କହିଛନ୍ତି-“୭ ଦିନ ଭିତରେ ଅରୁଣ ସାହୁଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାନଗଲେ ମୟୂରଭଞ୍ଜ ବନ୍ଦ ଡାକରା ଦିଆଯିବ। କାରଣ ସେ ଛାତ୍ର ସମାଜକୁ ଅପମାନିତ କରିଛନ୍ତି। ଏହାକୁ କୌଣସି ଛାତ୍ର ସହିବେ ନାହିଁ।”

ଛାତ୍ର ବିଜେଡି ସଭାପତି ରାଣା ପ୍ରତାପ କହିଛନ୍ତି-“ଅରୁଣ ସାହୁଙ୍କ ବିରୋଧରେ ଯାହା ପ୍ରଚାର ହେଉଛି ତାହା ସମ୍ପୂର୍ଣ୍ଣ ସତ୍ୟ ନୁହେଁ। କୌଣସି ବିଜେଡି ନେତା ଛାତ୍ର ନେତାଙ୍କୁ ଟାଣକରି କଥା ପଦେ କୁହନ୍ତି ନାହିଁ। ଯେଉଁଥିପାଇଁ ନେତାଙ୍କ ସହିତ ଛାତ୍ରମାନେ ଯୋଡ଼ି ହୋଇ ରହିଥାଆନ୍ତି।”