ଭୁବନେଶ୍ୱର(ଓଡ଼ିଶା ରିପୋର୍ଟର): କରୋନା ସଂକ୍ରମଣ ରୋକିବା ପାଇଁ ଲକଡାଉନ୍ ମାଧ୍ୟମରେ ସାମାଜିକ ଦୂରତ୍ୱ ଉପରେ ଉଭୟ କେନ୍ଦ୍ର ଓ ରାଜ୍ୟ ସରକାର ଗୁରୁତ୍ୱ ଦେଉଥିବାବେଳେ କରୋନା ଶିକାରରୁ ଦୂରେଇ ରହିବା ପାଇଁ ନାନାଦି ଚର୍ଚ୍ଚା ଲୋକମାନଙ୍କ ମଧ୍ୟରେ ହେଉଛି। ତେବେ ଏସବୁ ଚର୍ଚ୍ଚା କେବଳ ଲୋକମାନଙ୍କ ମନରେ ଭ୍ରାନ୍ତ ଧାରଣା ଓ ଏହାର ବିଜ୍ଞାନସମ୍ମତ ସେଭଳି କୌଣସି ପ୍ରମାଣ ନାହିଁ ବୋଲି ରାଜ୍ୟ ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି।
ରାଜ୍ୟ ସରକାରଙ୍କ ମୁଖପାତ୍ର ସୁବ୍ରତୋ ବାଗଚୀ ଆଜି ଲୋକଙ୍କ ମଧ୍ୟରେ ହେଉଥିବା ଏଭଳି ୧୨ଟି ଚର୍ଚ୍ଚା(ଭ୍ରାନ୍ତ ଧାରଣା)କୁ ଅମୂଳକ ବୋଲି ସୂଚନା ଦେଇଛନ୍ତି।
ପ୍ରଥମ- ନାକରେ ଲୁଣପାଣି ଦେଲେ କରୋନା ଭଲ ହୁଏ ନାହିଁ । ଅବଶ୍ୟ ଲୁଣପାଣି ନାକରେ ଥଣ୍ଡା କିଛି ପରିମାଣରେ କମିଥାଏ । ତେଣୁ ନାକରେ ଲୁଣପାଣି ଦେବା ସମାଧାନ ନୁହେଁ, ବରଂ ମାସ୍କକୁ ସଠିକ୍ ଭାବେ ପିନ୍ଧିବା ହିଁ ଏହାର ସମାଧାନ । ନାକ କି ପାଟି ପାଖକୁ ହାତ ନେବେ ନାହିଁ ।
ଦ୍ୱିତୀୟ- କରୋନା ଭୂତାଣୁ ଗରମ ଦିନରେ ଆପେଆପେ ମରିଯିବ । ୨୫ଡିଗ୍ରୀ ସେଲସିୟସ ତାପମାତ୍ରା ହେଲେ କରୋନା ଭାଇରସ ମରିଯିବ । ତେବେ ଏହା ବିଜ୍ଞାନସମ୍ମତ କଥା ନୁହେଁ ।
ତୃତୀୟ- କରୋନା ଥରେ ଧରିଲେ ସାରା ଜୀବନ ଗୋଡ଼ାଇବ । ଏହା ବି ଏକ ଭ୍ରାନ୍ତ ଧାରଣା । କାରଣ ଯେମିତି ହାଡ଼ଫୁଟି, ମିଳିମିଳ ଥରେ ହେଲେ ଆଉ ହୁଏନି । ଶରୀରରେ ରୋଗ ପ୍ରତିଷେଧକ ଶକ୍ତି ଆସିଯାଏ । ଠିକ୍ ସେମିତି କରୋନା ଥରେ ହେଲେ ତାକୁ ପ୍ରତିହତ କରିବାକୁ ଶରୀରରେ ରୋଗ ପ୍ରତିରୋଧକ ଶକ୍ତି ଆସିଯାଇଥାଏ । ସାରା ଜୀବନ ତାକୁ ହେବନି ।
ଚତୁର୍ଥ- ପ୍ରଶ୍ୱାସକୁ ୧୦ ସେକେଣ୍ଡ ରଖିପାରିଲେ କରୋନା ହୋଇନି ବୋଲି କିଛି ଲୋକ ଭାବୁଛନ୍ତି । କିନ୍ତୁ ତା’ର କୌଣସି ସତ୍ୟତା ନାହିଁ । ଥଣ୍ଡା,ଜ୍ୱର, କାଶ ଓ ନିଶ୍ୱାସ-ପ୍ରଶ୍ୱାସରେ ସମସ୍ୟା ଥିଲେ ହିଁ ଏହା କରୋନାର ଲକ୍ଷଣ ବୋଲି ପ୍ରାଥମିକ ଭାବେ କୁହାଯାଇଥାଏ ।
ପଞ୍ଚମ- ମଦ ପିଇଲେ କରୋନା ହେବନି । ଏହା ବି ସମ୍ପୂର୍ଣ୍ଣ ଭ୍ରାନ୍ତ ଧାରଣା । କାରଣ ମଦ ଓ ନିଶାଦ୍ରବ୍ୟ କେହି ବ୍ୟବହାର କରୁଥିଲେ ତାଙ୍କର ରୋଗ ପ୍ରତିରୋଧକ କ୍ଷମତା ହ୍ରାସ ପାଇଥାଏ । ମଦ ପିଇଲେ ସଂକ୍ରମଣର ଆଶଙ୍କା ବରଂ ଅଧିକ ହେବ, କମିବ ନାହିଁ ।
ଷଷ୍ଠ- ଗରମ ପାଣିରେ ଗାଧେଇଲେ କରୋନା ହେବନି । ତାହା ଠିକ୍ ନୁହେଁ । ଗରମ ପାଣିରେ ଗାଧେଇବାର ଥିଲେ ଗାଧାନ୍ତୁ କିନ୍ତୁ ଦିନକୁ ୬ରୁ ୭ଥର ହାତକୁ ସଫା କରନ୍ତୁ ।
ସପ୍ତମ- ମଶା କାମୁଡ଼ାରୁ କରୋନା ସଂକ୍ରମିତ ହୋଇପାରେ । ଏହା ବି ଭୁଲ୍ କଥା । କରୋନା ହେଉଛି କାଶ,ଛିଙ୍କରୁ ବାହାରୁ ଥିବା କଣିକା ମାଧ୍ୟମରେ ଶ୍ୱାସନଳୀକୁ ଯାଇ ସଂକ୍ରମଣ ହେଉଛି । ତେଣୁ ମଶା କାମୁଡ଼ିଲେ ମ୍ୟାଲେରିଆ ବା ଫାଇଲେରିଆ ହୁଏ କରୋନା ନୁହେଁ
÷ଅଷ୍ଟମ- ରସୁଣ ଖାଇଲେ କରୋନା ହେବନି । ରସୁଣ ଖାଇବାର ଥିଲେ ଖାଆନ୍ତୁ । କିନ୍ତୁ ରସୁଣ କରୋନାର ପ୍ରତିଷେଧକ ନୁହେଁ । ରସୁଣ ସାଙ୍ଗରେ କରୋନାର କୌଣସି ସମ୍ପର୍କ ନାହିଁ ।
ନବମ- ଛୁଆ ଓ ଯୁବକଙ୍କୁ କରୋନା ହେବନି । ଏହା ସତ କଥା ନୁହେଁ । ସବୁ ବୟସର ଲୋକଙ୍କୁ କରୋନାର ଭୟ ରହିଛି । ୭୦ବର୍ଷ ଅଧିକ ବୟସର ଲୋକଙ୍କୁ କରୋନା ଆଡ଼ୁ ଅଧିକ ବିପଦ ରହିଥାଏ ।
ଦଶମ- ଆଣ୍ଟିବାୟୋଟିକ୍ ଔଷଧ ଖାଇଲେ କରୋନା ହେବନି । ଏହା ଭ୍ରାନ୍ତଧାରଣା । ସାଙ୍ଗସାଥୀଙ୍କ ପରାମର୍ଶରେ ଏହା କରନ୍ତୁ ନାହିଁ । କାରଣ ଆଣ୍ଟିବାୟୋଟିକରେ ଜୀବାଣୁ ନାଶ ହୁଅନ୍ତୁ ଭୂତାଣୁ ନୁହେଁ । ତେଣୁ ଆଣ୍ଟିବାୟୋଟିକ୍ ଖାଇଲେ ଏହା କରୋନାକୁ ପ୍ରତିରୋଧ କରିପାରିବ ନାହିଁ ।
ଏକାଦଶ- କ୍ଲୋରିନ ପାଣିରେ କୁଳୁକୁଞ୍ଚା କଲେ କରୋନା ହେବନି । ଏହା ବି ଏକ ଭ୍ରାନ୍ତଧାରଣା । ଏପରି କଲେ ଅନ୍ୟାନ୍ୟ ସଙ୍ଗୀନ ସ୍ୱାସ୍ଥ୍ୟସମସ୍ୟା ଦେଖାଦେବ । ତେଣୁ କ୍ଲୋରିନ ପାଣିକୁ କଦାପି ପାଟିରେ ପୁରାଇବେ ନାର୍ହି ।
ଦ୍ୱାଦଶ- ପୋଷା କୁକୁର ଓ ବିଲେଇଙ୍କଠୁ କରୋନା ହୋଇପାରେ ବୋଲି ଭ୍ରାନ୍ତଧାରଣା ରହିଛି । ତେବେ ପୋଷା ଜନ୍ତୁଙ୍କଠୁ କରୋନା ସଂକ୍ରମଣ ହେବାର କୌଣସି ସମ୍ଭାବନା ନାହିଁ ।