ବନ୍ଧୁକ ଦେଖାଇ ବ୍ୟାଙ୍କରୁ ଟଙ୍କା ଓ ଅଳଙ୍କାର ଲୁଟ୍‌

ଅନୁଗୋଳ (ବିରଜା ପ୍ରସାଦ ଦାଶ): ଅନୁଗୋଳରେ ପୁଣି ବ୍ୟାଙ୍କରୁ ଲୁଟ୍। ଆଜି ଅନୁଗୋଳ ହରିମହୁରି ଛକରେ ଥିବା ଇଣ୍ଡିଆନ ବ୍ୟାଙ୍କ ଶାଖାରେ ଲୁଟ୍‌ ହୋଇଛି। ଆଜି ବ୍ୟାଙ୍କ ଖୋଲିବା ପରେ  କିଛି ଦୁର୍ବୃତ୍ତ କର୍ମଚାରୀ ଓ ଗ୍ରାହକଙ୍କୁ ବନ୍ଧୁକ ଦେଖାଇ ଟଙ୍କା ଓ ଅଳଙ୍କାର ଲୁଟ୍ କରିଥିଲେ। ୪ରୁ ୫ ଦୁର୍ବୃତ୍ତ ବ୍ୟାଙ୍କ ଭିତରେ ପଶି ଲୁଟ୍ କରିଥିବା ସୂଚନା ମିଳିଛି।  ୫ରୁ ୬ ଲକ୍ଷ ଟଙ୍କା ଲୁଟ୍ ହୋଇଥିବା କୁହାଯାଉଛି। ଲୁଟ୍‌ ସୁନାର ମୂଲ୍ୟ କେତେ ହେବ, ସେ ନେଇ କିଛି କୁହାଯାଇ ନାହିଁ।

ବ୍ୟାଙ୍କର ଜଣେ କର୍ମଚାରୀ ଅନ୍ତର୍ଯ୍ୟାମୀ ସେଠୀ କହିଛନ୍ତି,“ବ୍ୟାଙ୍କ ଖୋଲୁ ଖୋଲୁ ୪ରୁ ୫ ଜଣ ଦୁର୍ବୃତ୍ତ ପଶି ଆସିଥିଲେ। ଆମକୁ ମାଡ଼ ମାରି ବନ୍ଧୁକ ଦେଖାଇ ପ୍ରାୟ ୬ ଲକ୍ଷ ଟଙ୍କା ଓ ଅଳଙ୍କାର ସବୁ ନେଇଗଲେ। ଏହି ସମୟରେ ୧୦ରୁ ୧୨ ଜଣ ଗ୍ରାହକ ମଧ୍ୟ ବ୍ୟାଙ୍କରେ ଥିଲେ।”

ସୂଚନାଯୋଗ୍ୟ, ଏପ୍ରିଲ ୬ ତାରିଖରେ ଅନୁଗୋଳର ବଜାର ଛକ ଆନ୍ଧ୍ରବ୍ୟାଙ୍କ ଶାଖାରୁ ୭୦ ଲକ୍ଷ ଟଙ୍କା ଓ ଅଳଙ୍କାର ଲୁଟ୍ ହୋଇଥିଲା।