ବ୍ୟାଙ୍କରେ ପଶିଲେ, କର୍ମଚାରୀ ଓ ଗ୍ରାହକଙ୍କୁ ଅଣ୍ଠେଇ ଦେଲେ; ୪୨ ଲକ୍ଷ ନେଇ ଚମ୍ପଟ ମାରିଲେ

ରାଉରକେଲା(ସତ୍ୟାନନ୍ଦ ମହାନ୍ତି): ରାଉରକେଲାରେ ମାତ୍ର କିଛି ଘଣ୍ଟାର ବ୍ୟବଧାନରେ ଏକ ବଡ଼ ଧରଣର ବ୍ୟାଙ୍କ ଡକାୟତି ହୋଇଛି। ବନ୍ଧୁକ ମୁନରେ ଲୁଟିନେଲେ ୪୨ ଲକ୍ଷରୁ ଅଧିକ ଟଙ୍କା। ଆଜି ବ୍ୟାଙ୍କ ଖୋଲୁ ଖୋଲୁ ୭ରୁ୮ଜଣା ଡକାୟତ ବ୍ୟାଙ୍କ ଭିତରେ ପଶି ଲୁଟ୍ କରିବା ସହ ସିସିଟିଭି ହାର୍ଡ ଡିସ୍କକୁ ନେଇ ଯାଇଛନ୍ତି। ତେବେ ବ୍ୟାଙ୍କ ନିକଟରେ ଅନ୍ୟ ଦୋକାନରେ ଲାଗିଥିବା ସିସିଟିଭିରେ ତିନି ଲୁଟେରାଙ୍କ ଫଟୋ କଏଦ୍ ହୋଇଛି।

ଆଜି ସକାଳ ପ୍ରାୟ ୯ଟା ୪୫ ହେବ। ସବୁଦିନ ପରି ଆଜି ମଧ୍ୟ ନିର୍ଦ୍ଧାରିତ ସମୟରେ ଖୋଲିଥିଲା ରାଉରକେଲା ମଧୁସୂଦନନଗର ବଜାରରେ ଥିବା ଇଣ୍ଡିଆନ ଓଭରସିଜ୍ ବ୍ୟାଙ୍କ ଶାଖା। ତେବେ କାମ ଆରମ୍ଭ ହେବାର କିଛି ସମୟ ପରେ ହଠାତ ବ୍ୟାଙ୍କ ଭିତରକୁ ପଶି ଥିଲେ ୭ରୁ ୮ ଜଣ ଯୁବକ। ଜଣଙ୍କ ମୁଣ୍ଡରେ ହେଲମେଟ, ଅନ୍ୟ ଜଣଙ୍କ ମୁଣ୍ଡରେ ଟୋପି ଥିଲା। ଅନ୍ୟମାନେ ସାଧାରଣ ଗ୍ରାହକ ଭଳି ବ୍ୟାଙ୍କରେ ପ୍ରବେଶ କରିଥିଲେ। ତେବେ କେହି କିଛି ବୁଝିବା ଆଗରୁ ବନ୍ଧୁକ କାଢି ସମସ୍ତଙ୍କୁ ଡରାଇବାକୁ ଲାଗିଲେ। ବନ୍ଧୁକ ମୂନରେ କର୍ମଚାରୀଙ୍କୁ ଗୋଟିଏ କୋଣରେ ଆଣ୍ଠେଇ ଦେଇଥିଲେ। ଏହି ସମୟରେ  ବ୍ୟାଙ୍କକୁ ଆସୁଥିବା ଗ୍ରାହକଙ୍କୁ ମଧ୍ୟ କର୍ମକାରୀଙ୍କ ସହ ଆଣ୍ଠେଇ ଦେଇଥିଲେ। ବନ୍ଧୁକଧାରୀ ତା’ପରେ ଚାବି ଦେବା ପାଇଁ ମ୍ୟାନେଜରଙ୍କୁ ଧମକାଇଥିଲେ। ତେବେ ସେ ରାଜି ନହେବାରୁ ତାଙ୍କୁ ମାଡ଼ ମାରି ଚାବି ଛଡାଇ ନେଇଥିଲେ। ଏହା ପରେ ଲକର ଖୋଲି ୪୨ ଲକ୍ଷରୁ ଅଧିକ ଟଙ୍କା ଧରି ଚମ୍ପଟ ମାରିଥିଲେ ଲୁଟେରା। ଗଲାବେଳେ ସିସିଟିଭି ହାର୍ଡଡିସ୍କକୁ ମଧ୍ୟ  ନେଇଯାଇଥିଲେ। ୩୦ରୁ ୪୦ ମିନିଟ୍ ଧରି ବ୍ୟାଙ୍କ ଭିତରେ ଆତଙ୍କରାଜ୍ ଚଳାଇଥିଲେ ଲୁଟେରା।

ବ୍ୟାଙ୍କ ଲୁଟ୍‌ ସମୟରେ କଏଦ ହୋଇଛି ଲୁଟେରାଙ୍କ ଫଟୋ

ଲୁଟେରା ଚମ୍ପଟ ମାରିବା ପରେ ପହଞ୍ଚିଥିଲେ ପୋଲିସ ଡିଆଇଜିଙ୍କ ସମେତ ଅନ୍ୟ ବରିଷ୍ଠ ଅଧିକାରୀ। ଘଟମାସ୍ଥଳରେ ପହଞ୍ଚି ସେମାନେ ତନାଘନା ଆରମ୍ଭ  କରିଛନ୍ତି। ଲୁଟେରାମାନେ ହିନ୍ଦୀରେ କଥା ହେଉଥିବାରୁ ସେମାନେ ବିହାର କିମ୍ବା ଝାଡଖଣ୍ଡର ହୋଇଥାଇପାରନ୍ତି ବୋଲି ଅନୁମାନ କରାଯାଉଛି। ସେଥିପାଇଁ ପୋଲିସ ତତ୍‌କାଳ ସୀମା ସିଲ୍ କରି ଯାଞ୍ଚ ଆରମ୍ଭ କରିଛି।  ଲୁଟେରା ସିସିଟିଭି ହାର୍ଡ ଡିସ୍କ ନେଇଯାଇଥିଲେ ମଧ୍ୟ ଏକ ବାଇକ୍‌ ଥିବା ତିନି ଲୁଟେରାଙ୍କ ଫଟୋ ବ୍ୟାଙ୍କ ନିକଟରେ ଲାଗିଥିବା ଏକ ସିସିଟିଭିରେ କଏଦ୍ ହୋଇଛି। ଏହା ପୋଲିସକୁ ଡକାୟତଙ୍କ ପାଖରେ ପହଞ୍ଚିବାରେ ସହାୟତା କରିପାରେ ବୋଲି ପୋଲିସ କହିଛି।