ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
<p>ବାରିପଦା/ଉଦଳା: ପିଲା ଚୋର ସନ୍ଦେହରେ ଦୁଇ ଜଣଙ୍କୁ ନିସ୍ତୁକ ମାଡ଼। ଲୋକେ ଗାଁ ଦାଣ୍ଡରେ ସେମାନଙ୍କୁ ଗୋଡ଼ା ଗୋଡ଼ାଇ ପିଟିଲେ। ମାତ୍ର କେହି ପ୍ରତିବାଦ କରିନଥିଲେ। ବରଂ ପିଟୁଥିବା ଲୋକଙ୍କୁ ଉସ୍‌କାଉଥିବା ଅଭିଯୋଗ ହେଉଛି। ଏପରି ଅଭାବନୀୟ ଘଟଣା ଆଦିବାସୀ ଅଧ୍ୟୁଷିତ ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ଅଞ୍ଚଳରେ ଘଟିଛି। ପୋଲିସ ସେମାନଙ୍କୁ ଉଦ୍ଧାର କରି ଘଟଣାର ତଦନ୍ତ ଚଳାଇଛି।</p> <p>ଆଜି ମଧ୍ୟାହ୍ନରେ ଜଣେ ବୟସ୍କ ଓ ଅନ୍ୟ ଜଣେ ଯୁବକ କୁଲଡିହି ଗାଁରେ ପହଞ୍ଚିଥିଲେ। ସେମାନେ ଦୁଇ ଜଣ ପିଲାଙ୍କୁ ୧୦୦ ଟଙ୍କା ଲେଖାଏଁ ଦେଇ ବିଲ ରାସ୍ତାରେ ନିକଟସ୍ଥ ହାଟକୁ ଯିବା ପାଇଁ କହିଥିବା ଅଭିଯୋଗ ହୋଇଥିଲା। ଏ ସମ୍ପର୍କରେ ଗାଁ ଲୋକେ ଜାଣିପାରି ସମ୍ପୃକ୍ତ ବ୍ୟକ୍ତି ଦୁଇ ଜଣଙ୍କୁ ଅଟକାଇ ଘଟଣା ସମ୍ପର୍କରେ ପଚାରିଥିଲେ। ମାତ୍ର ସେମାନେ ସନ୍ତୋଷଜନକ ଉତ୍ତର ଦେଇପାରିନଥିଲେ। ଏଥିରେ ଉତ୍‌କ୍ଷିପ୍ତ ହୋଇ ଗାଁ ଲୋକେ ସେମାନଙ୍କୁ ନିସ୍ତୁକ ମାଡ଼ ମାରିଥିଲେ। ଏପରିକି ମହିଳାମାନେ ସେମାନଙ୍କୁ ଧରି ପ୍ରବଳ ମାଡ଼ ମାରିଥିଲେ। ଏ ସମ୍ପର୍କରେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଉଦ୍ଧାର କରି ଥାନାରେ ଅଟକ ରଖିଛି। ମାତ୍ର ମାଡ଼ ଖାଇଥିବା ବ୍ୟକ୍ତିମାନେ ପିଲା ଚୋରି ଘଟଣାକୁ ଖଣ୍ଡନ କରିଛନ୍ତି।</p> <p>ପିଲା ଚୋର ସନ୍ଦେହରେ ପୂର୍ବରୁ ହାତୀଗଡ଼ା ଗାଁ ଲୋକେ ଏହି ଦୁଇ ଜଣଙ୍କୁ ଅଟକାଇ ଥିଲେ। ବୁଝଶୁଝା ପରେ ଗାଁ ଲୋକ ସେମାନଙ୍କୁ ଛାଡ଼ିଥିଲେ। ସେହିପରି ପିଲା ଚୋର ସନ୍ଦେହରେ ବେଲଗଡ଼ିଆ ଗାଁ ଲୋକେ ସେମାନଙ୍କୁ ମଧ୍ୟ ମାଡ଼ ମାରିଥିଲେ ବୋଲି ଅଭିଯୋଗ ହେଉଛି।</p> <p>ମୟୂରଭଞ୍ଜ ଏକ ଆଦିବାସି ଅଧ୍ୟୁଷିତ ଜିଲ୍ଲା। ଏହି ଅଞ୍ଚଳରେ ଦିନକୁ ଦିନ ପିଲା ଚୋରି ସନ୍ଦେହରେ ଆକ୍ରମ ବଢ଼ିବାରେ ଲାଗିଛି। ଗାଁ ଲୋକେ ଆଇନ୍‌କୁ ଖାତିର ନକରି ନିଜେ ନିଷ୍ପତ୍ତି ନେଉଛନ୍ତି। ଯାହା ଉପରକୁ ସନ୍ଦେହ ହେଲା ତାକୁ ଗୋରୁ ଗାଈଙ୍କ ପରି ବାନ୍ଧି ନିସ୍ତୁକ ମାଡ଼ ମାରୁଛନ୍ତି। ଏହି ଜିଲ୍ଲାରେ ଏପରି ଘଟଣା ନିତି ଦିନିଆରେ ପରିଣତ ହେଲାଣି। ପୋଲିସ ପ୍ରଶାସନର ବାରଣ ସତ୍ତ୍ୱେ ଲୋକଙ୍କ ମଧ୍ୟରେ ଚେତା ପସୁନାହିଁ। ଯାହାକୁ ନେଇ ଜିଲ୍ଲା ପ୍ରଶାସନ ଚିନ୍ତାରେ ପଡ଼ିଯାଇଛି।</p>
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
