ଲୋଭନୀୟ ଅଫର ଦେଇ ଅନ୍‌ଲାଇନ୍‌ରେ ଠକୁଥିଲା, ଧରାପଡ଼ିଲା

ଭୁବନେଶ୍ୱର (ଓଡ଼ିଶା ରିପୋର୍ଟର): ଶସ୍ତାରୁ ହିନସ୍ତା। ଅନ୍‌ଲାଇନ ମାର୍କେଟିଂ ନାଁରେ ଲକ୍ଷଲକ୍ଷ ଟଙ୍କା ଠକୁଥିଲା। ଦାମୀ ପୋଷାକରେ ଲୋଭନୀୟ ଅଫିର ଦେଖାଇ ସୋସିଆଲ୍‌ ମିଡିଆରେ ଠକେଇ ଅଭିଯୋଗରେ ଜଣେ ଅଭିଯୁକ୍ତକୁ ଗିରଫ କରିଛି ଭୁବନେଶ୍ୱର କମିଶରେଟ୍‌ ପୋଲିସ। ଗିରଫ ଅଭିଯୁକ୍ତ ହେଉଛନ୍ତି ରଶ୍ନୀ ରଂଜନ ପାଣି।

କେମିତି କରୁଥିଲେ ଠକେଇ?

ରଶ୍ମୀରଞ୍ଜନ ପ୍ରଥମେ ‘ଗେଟେଓ୍ୱ ଫାଉଣ୍ଡସେନ’ ନାଁରେ ଏକ ଫେସବୁକ ଆକାଉଣ୍ଟ ଖୋଲିଥିଲେ। ଏହାପରେ ଗ୍ରାହକଙ୍କୁ ଆକୃଷ୍ଟ କରିବା ପାଇଁ ନାମୀଦାମୀ କମ୍ପାନୀର ପୋଷାକ ଓ ଶାଢ଼ିକୁ ବଜାର ମୂଲ୍ୟଠାରୁ କମ୍‌ ଦାମରେ ବିଜ୍ଞାପନ ଦେଇଥିଲେ।  ଅନ୍‌ଲାଇନରେ ଗ୍ରାହକ ପୋଷାକ କିଣିବାକୁ ପସନ୍ଦ କଲେ ସେମାନଙ୍କୁ ଓ୍ୱାଟ୍ସ ଆପରେ ଯୋଗାଯୋଗ କରିବାକୁ ପରାମର୍ଶ ଦେଉଥିଲେ। ନିଜ ଆକାଉଣ୍ଟ ନମ୍ବରରେ ଗ୍ରାହକଙ୍କଠାରୁ ଅନ୍‌ଲାଇନ ମାଧ୍ୟମରେ ଟଙ୍କା ନେଉଥିଲେ। ତେବେ ଟଙ୍କା ପାଇବା ପରେ ପୋଷାକ ଡେଲିଭେରି କରିବେ କ’ଣ ଗ୍ରାହକଙ୍କ ଫେସବୁକ ଓ ଓ୍ୱାଟ୍ସ ଆପ୍‌ ଲିଙ୍କକୁ ବ୍ଲକ କରିଦେଉଥିଲେ। ନିକଟରେ ଚିରାଗ ଜୈନ ନାମକ ଜଣେ ବ୍ୟକ୍ତି ୧୫,୦୦୦ ଟଙ୍କା ଠକେଇର ଶିକାର ହେବାପରେ ପୋଲିସରେ ଏତଲା ଦେଇଥିଲେ।  ଏହାପରେ ପୋଲିସ ଖୋଳତାଡ କରି ଅଭିଯୁକ୍ତ ରଶ୍ମୀରଂଜନଙ୍କୁ ଗିରଫ କରିଛି।

ପ୍ରାୟ ୧୦ରୁ ଅଧିକ ଗ୍ରହକଙ୍କଠାରୁ ୯ଲକ୍ଷ ଟଙ୍କା ଏଭଳି ଠକିଥିଲେ। ଅନ୍ ଲାଇନରେ ଠକେଇ ନଜଣା ପଡିବା ପାଇଁ ରଶ୍ମୀ ରଂଜନ ଭୁଲ ଠିକଣା ଦେଇଥିଲେ। ପୋଲିସ ରଶ୍ମୀକୁ ରିମାଣ୍ଡରେ ନେଇ ଅଧିକ ପଚରାଉଚୁରା କରିବ।