ପଛୁଆ ଗାଁରେ ବିକାଶର ଚିତ୍ର ଆଙ୍କିବା ଦେଲା କାମ: ବଦଳିଗଲା ବିଜେପୁର ଭୋଟରଙ୍କ ବିଶ୍ୱାସ

<p>ଭୁବନେଶ୍ୱର(ଓଡ଼ିଶା ରିପୋର୍ଟର): ବିଜେପୁରରେ ବିଜେଡିର ବୃହତ ବିଜୟ ପଛରେ କାମ କଲା ଇଲେକସନ ତ୍ରୁଟିଶୂନ୍ୟ ଇଂଜନିୟରିଂ। ଏଥିପାଇଁ ନିର୍ବାଚନ ଘୋଷଣାର ବହୁ ପୂର୍ବରୁ ଦଳ ପ୍ରସ୍ତୁତ କରିଥିଲା ସୁଚିନ୍ତିତ ରଣନୀତି। ପଛୁଆ ଗାଁରେ ବିକାଶର ଚିତ୍ର ଆଙ୍କି ଭୋଟରଙ୍କ ମନରେ ବିଶ୍ୱାସ ଜନ୍ମେଇବାର କଳା ଶେଷରେ କାମ ଦେଲା। ଆଉ ଏଥିରେ ଟ୍ରମ୍ପ କାର୍ଡ ସାଜିଲେ ସୁବଳ ସାହୁଙ୍କ ପତ୍ନୀ ରିତା ସାହୁ। ଆସନ୍ତୁ ଦେଖିବା କେମିତି ଥିଲା ବିଜେଡିର ଇଲେକସନ ମ୍ୟାନେଜମେଣ୍ଟ ଓ ବିଜେପିକୁ ମାତ ଦେବାରେ ଏହା କେମିତି ସଫଳ ହେଲା।</p><p>&lt;a href=&quot;&quot;&gt;(image) &lt;/a&gt;ସୁବଳଙ୍କ ପତ୍ନୀ ରୀତାଙ୍କୁ ବିଜେଡି ଆଣିବା ଥିଲା ବିଜେପୁର କବ୍&zwnj;ଜା ପାଇଁ ପ୍ରସ୍ତୁତ ହୋଇଥିବା ରଣନୀତିର ପ୍ରଥମ ସଫଳ ଫର୍ଦ୍ଦ।&nbsp; ରିତାଙ୍କ ଆଖିରୁ ଲୁହ ଯେତିକି ଝରିଲା ବିଜେଡି ଖାତାକୁ ଅନୁକମ୍ପାର ଭୋଟ ସେତିକି ଚଢିଲା। ରୀତାଙ୍କୁ ଆଣିବା ଆଗରୁ ବିଜେପୁର ବାଜିରେ ଏକ ଗୋଟି ବି ଚଳାଇଥିଲା ବିଜେଡି। ପଶ୍ଚିମ ଓଡିଶାରେ ଦଳର ଚେହେରା କୁହାଯାଉଥିବା ନେତାଙ୍କ ଜରିଆରେ ଲୋକଙ୍କ ସମସ୍ୟାର କାରଣ ଖୋଜିଥିଲା ଦଳ। କେଉଁ ଗାଁରେ କଣ କାମ ଦରକାର ତାର ତାଲିକା ପ୍ରସ୍ତୁତ ହେଲା ଓ ସେହି ଅନୁସାରେ ତରବରିଆ କାମ ବି ହେଲା।&nbsp; ଏହାକୁ ବଳ ଯୋଗାଇଲେ ମୁଖ୍ୟମନ୍ତ୍ରୀଙ୍କର ଗୋଟିକ ପରେ ଗୋଟିଏ ଘୋଷଣା। ଯେମିତିକି ବିଜେପୁରରକୁ ଏନ୍&zwnj;ଏସି, ସବରେଜିଷ୍ଟ୍ରାର ଅଫିସ ଓ ସର୍ବୋପରି ଗଙ୍ଗାଧର ମେହେରଙ୍କ ନାଁରେ ୧୨୫୦ କୋଟିର ଜଳସେଚନ ପ୍ରକଳ୍ପ। ୧୪ ବର୍ଷ ଧରି ସରକାରୀ ଦଳଠାରୁ ଦୂରରେ ରହି ବନବାସର ଦଣ୍ଡ ଭୋଗୁଥିବା ଭୋଟରଙ୍କୁ ଲାଗିଲା ସରକାରୀ ଦଳ ସହ ରହିଲେ ହିଁ ବିକାଶ ହେବ। ଭୋଟରଙ୍କ ମନରେ ଏହି ବିଶ୍ୱାସ ଜନ୍ମାଇବା ଥିଲା ବିଜେଡିର ବିଜେପୁର ରଣନୀତିର ଦ୍ୱିତୀୟ ଫର୍ଦ୍ଦ। ତୃତୀୟ ସଫଳ ଷ୍ଟ୍ରାଟେଜୀ ଥିଲା ନିର୍ବାଚନ ପରିଚାଳନାର ଅଭେଦ୍ୟ ଦୁର୍ଗ। ପ୍ରତି ପଞ୍ଚାୟତରେ ଦଳର ବିଧାୟକ ଓ ପୂର୍ବତନ ବିଧାୟକ ଡେରା ପକାଇଲେ। ବ୍ଲକ ଜଗିଲେ ପଶ୍ଚିମ ଓଡିଶାର ଚେହେରା ପ୍ରସନ୍ନ ଆଚାର୍ଯ୍ୟ, ସୁଶାନ୍ତ ସିଂ, ନିରଂଜନ ପୂଜାରୀ, ସ୍ନେହାଙ୍ଗୀନି ଛୁରିଆ, ଦେବେଶ ଆଚାର୍ଯ୍ୟଙ୍କ ପରି ନେତା। ଆଉ ପ୍ରଚ୍ଛଦପଟରେ ରହିଲେ ଉପକୂଳର ନେତା ଅରୁଣ ସାହୁ, ସଂଜୟ ଦାସବର୍ମା, ଅତନୁ ସବ୍ୟସାଚୀ ନାୟକ ଓ ପ୍ରଣବ ପ୍ରକାଶ ଦାସଙ୍କ ପରି ଯୁବ ନେତା ଓ ସଂଖ୍ୟାଧିକ ବିଧାୟକ। ଏହି ଦୁର୍ଗକୁ ଭେଦ କରିବା ପ୍ରତିପକ୍ଷ ପାଇଁ ଶେଷ ଯାଏଁ ସହଜ ହୋଇପାରିଲାନି।</p><p>ବିଜେପୁର ନିର୍ବାଚନ ମଣ୍ଡଳୀରେ ୯୧ ହଜାର ଭୋଟ ପାଇଥିବା ବିଜେପି ନିଜ ଭୋଟକୁ ଅକ୍ଷୁର୍ଣ ରଖିବା ପାଇଁ କରିଥିବା ରଣନୀତି ଫେଲ ମାରିଲା। ଦଳ ବାହାରୁ ପ୍ରାର୍ଥୀ ଆଣି ମଇଦାନକୁ ଓହ୍ଲାଇଥିବାରୁ ପୁରୁଣା ବିଜେପି କର୍ମୀ ଏହାକୁ ପୂର୍ଣ୍ଣ ପ୍ରାଣରେ ସମର୍ଥନ କଲେନି। ଜିଲ୍ଲା ସଭାପତି ଓ ଅନ୍ୟ କିଛି ନେତା ଦଳ ଛାଡିଲେ। ଯଦିଓ ବିଜେଡି ପରି ଦଳର ପଶ୍ଟିମ ଓଡିଶା ଚେହେରା କେଭି ସିଂଦେଓ, ପ୍ରଦୀପ ପୁରୋହିତ ଓ ବସନ୍ତ ପଣ୍ଡାଙ୍କ କାନ୍ଧରେ ପୁରା ଦାୟିତ୍ୱ ଥିଲା। ତଥାପି ନିର୍ବାଚନ ପରିଚାଳନା କେଉଁଠି କେଉଁଠି ଫେଲ ମାରିଲା ଓ କେଉଁ ଗାଁର କେଉଁ ଓ୍ୱାର୍ଡ ଏବଂ ପଞ୍ଚାୟତରେ ଦଳ ପାଇଥିବା ଭୋଟ ଭାଙ୍ଗି ବିଜେଡି ଆଡକୁ ଯାଉଛି ତାର ଟେର ପାଇଲେନି ନେତା। କୁମ୍ଭାରୀ ଓ ବନାବିରା ହିସାଂ ଦଳ ବିରୋଧରେ ହାଓ୍ୱା ତିଆରି କରିବାର ସୁଯୋଗ ସୃଷ୍ଟି କଲା।&nbsp; ବିଜେପୁରରେ ବିଜେପି ଦେଉଥିବା ଅବହେଳିତ ଅସୁରକ୍ଷିତ ଓ ଅପମାନିତର ନାରା ଭୋଟରଙ୍କ ମନକୁ ଛୁଇଁଲା ନାହିଁ। ସର୍ବୋପରି ପଞ୍ଚାୟତରେ ବିଭାଜିତ ହୋଇ ଦଳର ଖାତକୁ ଆସିଥିବା ଭୋଟକୁ ଦଳ ରଖିପାରିଲା ନାହିଁ।</p><p>https://youtu.be/V_cccZfIfoM</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।