‘ପ୍ରଣବ ପିଲା ଲୋକ, ଚଙ୍ଗଚଙ୍ଗ ହେଉଛନ୍ତି; ରାଜନୀତି ଅଳ୍ପ ବୁଝିଛନ୍ତି, ବ୍ୟବସାୟରେ ଅଧିକ’

ଭୁବନେଶ୍ୱର (ଓଡ଼ିଶା ରିପୋର୍ଟର): ସର୍ବ ଭାରତୀୟ ଦଳରେ ହାଇକମାଣ୍ଡ ଓ ପ୍ରଭାରୀ ଥାଆନ୍ତି। ମାତ୍ର ବିଜେଡି ଏକ ଆଞ୍ଚଳିକ ଦଳ। ଏଠି ଆମର ‘ଏକା ମାଧିଆ ଷାଠିଏ ପଳ’। ଆମର ମୁଖ୍ୟମନ୍ତ୍ରୀ ହେଉଛନ୍ତି ସର୍ବେସର୍ବା। ସେ ଦଳର ସଭାପତି ଓ ମୁଖ୍ୟମନ୍ତ୍ରୀ। ତେଣୁ ବୈଜୟନ୍ତ ପଣ୍ଡାଙ୍କ ଇସ୍ତଫା ସମ୍ପର୍କରେ ସେ ନିଷ୍ପତ୍ତି ନନେବା ପର୍ଯ୍ୟନ୍ତ ଆଉ କାହାର କିଛି ମନ୍ତବ୍ୟ ଦେବାର ନାହିଁ ବୋଲି କହିଛନ୍ତି ବିଜେଡି ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ଦାମୋଦର ରାଉତ।

ସାଂସଦ ବୈଜୟନ୍ତ ପଣ୍ଡାଙ୍କ ଇସ୍ତଫା ବିଜେଡି ପ୍ରତି ବୁମେରାଂ ହୋଇଛି କି ବୋଲି ପ୍ରଶ୍ନରେ ଦାମ କହିଛନ୍ତି-“ମୁଁ ଦଳ କଥା ବୁଝିବା ଦାୟିତ୍ୱରେ ନାହିଁ। ସେ କଥା ମୁଁ କେମିତି କହିବି? ସେକଥା ପ୍ରଣବ ପ୍ରକାଶ ଦାସଙ୍କୁ ପଚାରିଲେ କହିପାରିବ। କାରଣ ସେ ବର୍ତ୍ତମାନ ଦଳର ମୁଖ୍ୟ ଭୂମିକାରେ ଅଛନ୍ତି।”

ପ୍ରଣବ ଦ୍ୱିତୀୟ କ୍ଷମତାକେନ୍ଦ୍ର କି ପ୍ରଶ୍ନରେ ଦାମ କହିଛନ୍ତି-“ପ୍ରଣବ ପିଲା ଲୋକ। ଟିକେ ଚଙ୍ଗଚଙ୍ଗ ହେଉଛନ୍ତି। ସେ ରାଜନୀତି ଅଳପ ବୁଝିଛନ୍ତି, ବ୍ୟବସାୟ ଅଧିକ କରୁଛନ୍ତି। ସେହି ହିସାବରେ ସେ ଚାଲିଛନ୍ତି। ତାଙ୍କୁ କେବେହେଲେ ଦ୍ୱିତୀୟ କ୍ଷମତା କେନ୍ଦ୍ର କୁହାଯାଇପାରିବ ନାହିଁ। ସେ କ୍ଷମତା କେନ୍ଦ୍ରର ଦୁଆରବନ୍ଧ ପର୍ଯ୍ୟନ୍ତ ଯାଇପାରି ନାହାନ୍ତି।”

dama

ଦାମ କହିଛନ୍ତି-“ପ୍ୟାରୀମୋହନ ମହାପାତ୍ର ବିଧାୟକ କି ସାଂସଦ ନଥିଲେ। ସେ ନବୀନ ପଟ୍ଟନାୟକଙ୍କ ପରାମର୍ଶରେ କାମ କରୁଥିଲେ। ସେତେବେଳେ ତାଙ୍କୁ କିଛି ଲୋକ ଦ୍ୱିତୀୟ କ୍ଷମତାକେନ୍ଦ୍ର ବୋଲି କହୁଥିଲେ। ମୁଁ ସେତେବେଳେ କହିଥିଲି ଏବଂ ଏବେ ମଧ୍ୟ କହୁଛି, ଆଞ୍ଚଳିକ ଦଳରେ ଗୋଟିଏ କ୍ଷମତାକେନ୍ଦ୍ର ରହିଛି। ସେଥିପାଇଁ ସେହି ସମୟରେ ମୁଁ ପ୍ୟାରୀବାବୁଙ୍କ ରୋଷରେ ଶିକାର ହୋଇଥିଲି। କିନ୍ତୁ ମୋର ଗୋଟିଏ କ୍ଷମତାକେନ୍ଦ୍ର। ସେ ହେଉଛନ୍ତି ନବୀନ ପଟ୍ଟନାୟକ। ସେ କାହାଠାରୁ ପରାମର୍ଶ ନେଇ ଭଲ କାମ କଲେ ପ୍ରଶଂସିତ ହେବେ ଓ ଖରାପ କାମ କଲେ ନିନ୍ଦିତ ହେବେ। ତେଣୁ ଏଠି ଗୋଟିଏ ଗୋଟିଏ କ୍ଷମତା କେନ୍ଦ୍ର। ସେ ହେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।”

ବୈଜୟନ୍ତଙ୍କ ଇସ୍ତଫା ପରେ ବିଜେଡି ବ୍ୟାକ୍‌ଫୁଟ୍‌ରେ କି?

ବୈଜୟନ୍ତ ପଣ୍ଡାଙ୍କ ଇସ୍ତଫା ପରେ ବିଜେଡି ବ୍ୟାକ୍‌ଫୁଟ୍‌ରେ ରହିଛି ବୋଲି କଂଗ୍ରେସ ଅଭିଯୋଗ କରୁଛି। ଏହାର ଜବାବରେ ଦାମ କହିଛନ୍ତି-“କେଜାଣି, ମୁଁ ଜାଣିନି। ୪୫ ବର୍ଷ ଭିତରେ ମୁଁ ଗୋଟିଏ ନେତା, ଗୋଟିଏ ଦଳ ଓ କଠୋର ଶୃଙ୍ଖଳା ଭିତରେ ରହିଛି। ମୁଁ ବର୍ତ୍ତମାନ ନିଜେ ଅଲୋଡ଼ା ରହିଛି। ଆଉ ଅନ୍ୟମାନଙ୍କ କଥା କହିବି କେମିତି? ଦଳର ନାଁ ରହିଛି ବିଜୁ ଜନତା ଦଳ। ମାତ୍ର ଯେଉଁମାନେ ତାଙ୍କ ଜୀବନ କାଳ ଭିତରେ ବିଜୁ ପଟ୍ଟନାୟକଙ୍କୁ ଦେଖିନଥିଲେ କି ତାଙ୍କ ସଂସ୍ପର୍ଶରେ ଆସିନଥିଲେ; ସେମାନେ ଆଜି ବିଜୁ ପଟ୍ଟନାୟକଙ୍କ ଆଦର୍ଶ ଓ ପ୍ରବକ୍ତା ସାଜୁଛନ୍ତି। ମୁଁ ବସି ଶୁଣୁଛି।”

ପ୍ରଣବ ଜାଣିଥିବେ ତାଙ୍କୁ ପଚାର

ପୂର୍ବରୁ ବିଜୟ ମହାପାତ୍ର ଓ ଦିଲୀପ ରାୟଙ୍କ କ୍ଷେତ୍ରରେ ଶୀଘ୍ର କାର୍ଯ୍ୟାନୁଷ୍ଠାନ ହୋଇଥିଲା। ମାତ୍ର ବୈଜୟନ୍ତ ପଣ୍ଡାଙ୍କ କ୍ଷେତ୍ରରେ ବିଳମ୍ୱ ନେଇ ସାମ୍ୱାଦିକଙ୍କ ପ୍ରଶ୍ନର ଉତ୍ତରରେ ଦାମ କହିଛନ୍ତି-“ବୈଜୟନ୍ତ ପଣ୍ଡାଙ୍କୁ ଆଗରୁ ସସ୍‌ପେଣ୍ଡ କରିଥିଲେ। ସସ୍‌ପେଣ୍ଡ ପରେ ବୈଜୟନ୍ତ କୈଫିୟତ ଦେବା କଥା। ମାତ୍ର ସେ ଇସ୍ତଫା ଦେଇ ଦଳ ଛାଡ଼ିଦେଲେ। ଆଉ ଦଳ ତାଙ୍କ ବିଷୟରେ କ’ଣ କରିବ।”

ବୈଜୟନ୍ତ ପଣ୍ଡା ନିଜ ଆଡ଼ୁ ଇସ୍ତଫା ଦେବାଟା ବିଜେଡି ପ୍ରତି ଚୋଟ ମାରିବା ଭଳି ହୋଇଛି କି ପ୍ରଶ୍ନର ଉତ୍ତରରେ ସେ କହିଛନ୍ତି-“ଯଦି ସେଇଟା ଚୋଟ ମାରିବା ଭଳି ହୋଇଥିବ, ଗତକାଲି ସନ୍ଧ୍ୟା ପର୍ଯ୍ୟନ୍ତ ଗାଳି ଦେଉଥିବା ବ୍ୟକ୍ତି ଆଜି ସକାଳ ୧୧ଟା ବେଳେ ରାଜ୍ୟସଭାକୁ ଯିବାଟା ବି ଏକ ଚୋଟ ମାରିବା ହୋଇଥିବ। ଏକଥା ମୁଁ କହୁନି ଜନସାଧାରଣ କରୁଛନ୍ତି।”