ବିଷ କାଢିବାକୁ ଗୁଣିଆ ହେଲେ ଡାକ୍ତର, ହସ୍ପିଟାଲରେ ପଶି ଏମିତି କଲେ ଚିକିତ୍ସା

ଅନୁଗୁଳ(ବିରଜା ପ୍ରସାଦ ଦାସ):  ‘‘ଡାକ୍ତରଖାନା ବେଡ୍‌ରେ ଶୋଇଛନ୍ତି ରୋଗୀ, ଆଉ ତାଙ୍କ ପାଖରେ ଛିଡା ହୋଇଛନ୍ତି ଜଣେ ବ୍ୟକ୍ତି। ସମସ୍ତେ ଅପେକ୍ଷା କରିଛନ୍ତି ତାଙ୍କ ହାତର କରିସ୍ମାକୁ । କଥାରେ ଅଛି ନା, ଜଣେ ଜଣେ ଡାକ୍ତରଙ୍କ ହାତରେ ଯାଦୁ ଥାଏ। ସିଏ ଥରେ ଛୁଇଁଦେଲେ ରୋଗ ଏକଦମ୍‌ ଖଲାସ୍‌ ହୋଇଯିବ। ହେଲେ ଏଠି ଯେଉଁ ବ୍ୟକ୍ତି ଜଣକ ଛିଡା ହୋଇଛନ୍ତି, ତାଙ୍କୁ ରୋଗୀକୁ ଛୁଇଁବାର ଆବଶ୍ୟକ ନାହିଁ। ସେ ଖାଲି ଫୁଙ୍କିଦେଲେ ହେଲା।

ଦେଖୁ ଦେଖୁ ଡାକ୍ତରଙ୍କ ସ୍ଥାନରେ ଥିବା ବାବୁ ଜଣକ ହାତ ଯୋଡିଲେ। ଷ୍ଟଥୋ ତାଙ୍କର ଲୋଡା ନାହିଁ। ଆଖି ବୁଜିଲେ, ଆଉ ହାତରେ ଧରିଥିବା ଠେଙ୍ଗାକୁ ଧରି ମୁଣ୍ଡିଆଟାଏ ମରିଲେ। ବାସ୍‌ ଏତିକି କରୁ କରୁ କ’ଣ ହେଲେ କେଜାଣି ପୀଡିତା ରୋଗୀଙ୍କୁ ଫୁଙ୍କିବାକୁ ଲାଗିଲେ।”

ଆପଣ ଭାବୁଥିବେ ଆମେ ଅଯଥା ଇଆଡୁ ସିଆଡୁ ଗପୁଛୁ ବୋଲି। ବାସ୍ତବରେ ଆମେ କୌଣସି ଇଆଡୁ ସିଆଡୁ କଥା ଆପଣଙ୍କୁ କହୁନୁ । ବାସ୍ତବରେ ଆଜି ସକାଳେ ଅନୁଗୁଳ ଡାକ୍ତରଖାନାରେ ଯାହା ଦୃଶ୍ୟ ଦେଖିଲୁ ସେ କଥା ବର୍ଣ୍ଣନା କରୁଛୁ। ଆଉ ଏଭଳି ଦୃଶ୍ୟ ଦେଖି ଆମକୁ ବଡ଼ ଆଶ୍ଚର୍ଯ୍ୟ ଲାଗିଥିଲା, ଠିକ୍‌ ଯେମିତି ଏ କଥା ପଢି ଆପଣଙ୍କୁ ଲାଗୁଛି। ଯୁଗ ଆସି କୋଉଠି ପହଞ୍ଚିଲାଣି। ହେଲେ ଆମ ଚିନ୍ତାଧାର ବଦଳୁନି। ଏବେ ବି ପୁରୁଣାକାଳିଆ ଚିନ୍ତାଧାରାକୁ ନେଇ ଆମେ ବଞ୍ଚୁଛେ। ଯାହାର ସଦ୍ୟତମ ଉଦାହରଣ ଦେଖିବାକୁ ମିଳିଛି ଏଠି।

ବାସ୍ତବ କଥାଟା ହେଲା ଏମିତି – ଗତକାଲି ରାତିରେ ଛେଣ୍ଡିପଦାର ସାବିତ୍ରୀ ଦେହୁରୀ ନାମକ ଜଣେ ମହିଳାଙ୍କୁ ସାପ କାମୁଡି ଦେଇଥିଲା। ତାଙ୍କ ସ୍ୱାମୀ ଡ଼ରରେ କାଳେ କିଛି ହୋଇଯିବ ବୋଲି ସାବିତ୍ରୀଙ୍କୁ ଅନୁଗୁଳ ଜିଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ। ହେଲେ ଡାକ୍ତରଙ୍କ ଉପରେ ତାଙ୍କ ବିଶ୍ୱାସ ନ ଥିବାରୁ ଛେଣ୍ଡିପଦା ଅଞ୍ଚଳରୁ ଜଣେ ଗୁଣିଆଙ୍କୁ ଆଣି ଝଡାଫୁଙ୍କା କରିବାକୁ ଯୋଜନା କଲେ। ଖାଲି ଯୋଜନା କଲେନି ଗୁଣିଆଙ୍କୁ ଡାକ୍ତରଖାନାକୁ ନେଇ ମଧ୍ୟ ଆସିଲେ। ଡାକ୍ତରଙ୍କ ଅଜାଣତରେ ଝଡାଫୁଙ୍କା କଲେ ଗୁଣିଆ। ଏ ସମ୍ପର୍କରେ ସ୍ଥାନୀୟ ଲୋକେ ଡାକ୍ତରଖାନା କର୍ତ୍ତୃପକ୍ଷଙ୍କୁ ଅବଗତ କରାଇବା ପରେ ବିହିତ ପଦକ୍ଷେପ ନେଇଥିଲେ ସିଡିଏମଓ। ଏବେ ପୀଡିତାଙ୍କ ଚିକିତ୍ସା ଡାକ୍ତରମାନେ କରୁଛନ୍ତି।