ପରୀକ୍ଷା ଖାତା ମୂଲ୍ୟାୟନ ବର୍ଜନ କଲେ ବ୍ଳକ ଗ୍ରାଣ୍ଟ ଶିକ୍ଷକ

ଫୁଲବାଣୀ(ଓଡ଼ିଶା ରିପୋର୍ଟର): ଆସନ୍ତା କାଲିଠାରୁ ମ୍ୟାଟ୍ରିକ ପରୀକ୍ଷାଖାତା ମୂଲ୍ୟାୟନ କରାଯିବ। ତେଣୁ ଆଜି ମୂଲ୍ୟାୟନ କେନ୍ଦ୍ରଗୁଡିକରେ ଦାୟିତ୍ୱରେ ଥିବା ଶିକ୍ଷକଶିକ୍ଷୟତ୍ରୀ ଜଏନ୍‌ କରିବା କଥା। କିନ୍ତୁ ବିଭିନ୍ନ ଦାବି ନେଇ ପରୀକ୍ଷା ଖାତା ମୂଲ୍ୟାୟନକୁ ବିରୋଧ କରିଛନ୍ତି ବ୍ଲକ ଗ୍ରାଣ୍ଟ ଶିକ୍ଷକ । ଫଳରେ ଆଜି ସକାଳ ୯ଟାରୁ ବଲାଙ୍ଗିର ଜିଲାର ମୂଲ୍ୟାୟନ କେନ୍ଦ୍ରଗୁଡିକ ସମ୍ମୁଖରେ ଶିକ୍ଷକମାନେ ଧାରଣାରେ ବସିଥିବା ଦେଖିବାକୁ ମିଳିଥିଲା। ବଲାଙ୍ଗିର ସରକାରୀ ବାଳିକା ଉଚ୍ଚ ବିଦ୍ୟାଳୟ ସମ୍ମୁଖରେ ଧାରଣାରତ ଶିକ୍ଷକଙ୍କୁ ଦେଖିବାକୁ ମିଳିଛି। ୧୬ଟି ଜୋନ ପାଇଁ ୩୫୪ ଜଣ ଶିକ୍ଷକଙ୍କୁ ପରୀକ୍ଷାଖାତା ମୂଲ୍ୟାୟନ ପାଇଁ ଦାୟିତ୍ୱ ଦିଆଯାଇଛି।  କିନ୍ତୁ ଏମାନଙ୍କ ମଧ୍ୟରୁ ଅଧିକାଂଶ ବ୍ଲକଗ୍ରାଣ୍ଟ ଶିକ୍ଷକ ରହିଛନ୍ତି ।

ଆନ୍ଦୋଳନ କରୁଥିବା ଶିକ୍ଷକମାନେ ରେଗୁଲାର ଶିକ୍ଷକମାନଙ୍କୁ ମଧ୍ୟ ମୂଲ୍ୟାୟନ ନ କରିବା ପାଇଁ ଅନୁରୋଧ କରି ମୂଲ୍ୟାୟନ କେନ୍ଦ୍ର ବାହାରେ ଅଟକ ରଖିଥିଲେ । ଫଳରେ ଆସନ୍ତାକାଲି ହେବାକୁ ଥିବା ମୂଲ୍ୟାୟନକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଦୀର୍ଘ ଦିନରୁ ବ୍ଳକ ଗ୍ରାଣ୍ଟ ଶିକ୍ଷକମାନେ ଏହି ପ୍ରଥା ଉଚ୍ଛେଦ ପାଇଁ ଦାବି କରୁଥିଲେ ମଧ୍ୟ ରାଜ୍ୟସରକାର ବାରମ୍ବାର ପ୍ରତିଶ୍ରୁତି ଦେଇ ପୂରଣ କରୁନାହାନ୍ତି । ତେଣୁ ଆନ୍ଦୋଳନ କରିବାକୁ ବାଧ୍ୟ ହୋଇଥିବା ଆନ୍ଦୋଳନକାରୀ ଶିକ୍ଷକ କହିଛନ୍ତି ।

ଏହା ସହିତ  ଓଡିଶା ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚ ଏହି ଆନ୍ଦୋଳନ ଡାକରା ଦେଇଥିବାରୁ ଅଧ୍ୟାପକମାନେ ମଧ୍ୟ ଏଥିରେ ସାମିଲ ହୋଇଛନ୍ତି।  ଏପ୍ରିଲ ୧ ତାରିଖରେ ହେବାକୁ ଥିବା ଯୁକ୍ତ ଦୁଇ ଖାତା ଦେଖା ମଧ୍ୟ ବର୍ଜନ କରିବାକୁ ଅଧ୍ୟାପକମାନେ ନିଷ୍ପତ୍ତି ନେଇଛନ୍ତି ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।