ଏମିତି ବି ଦାଉ ସାଜେ ଦଇବ: ହସପିଟାଲ ବେଡରୁ ଉଠି ସ୍ୱାମୀଙ୍କୁ ଖୋଜୁଛି ପତ୍ନୀ, ଦେଖନ୍ତୁ ଭିଡିଓ

ବଲାଙ୍ଗିର:(ଓଡ଼ିଶା ରିପୋର୍ଟର):ଓଡ଼ିଆ ଫିଲ୍ମରେ ଗୋଟିଏ ଗୀତ ଅଛି “ଦଇବ ଦଉଡ଼ି ମଣିଷ ଗାଈ, ଯେଣିକି ଟାଣଇ ସେଣିକି ଯାଇ”। ସତରେ ଏମିତି ଦାଉ ସାଜେ ଦଇବ । ସ୍ୱାମୀ ଚାଲିଯାଏ ଅଥଚ ସ୍ତ୍ରୀ ଜାଣିପାରେନି। ଶେଷରେ ନିଜ ସ୍ୱାମୀଙ୍କ  ମୃତ୍ୟୁ ଖବର ଜାଣିଲେ ପାଟଣାଗଡ଼ ପାର୍ସଲ୍ ବୋମା ବିସ୍ଫୋରଣରେ ଆହତ ନବବିବାହିତା ରୀମା ସାହୁ। ଏସ୍‌ବିବି ମେଡିକାଲରେ ଚିକିତ୍ସାଧୀନ ଅବସ୍ଥାରେ ତାଙ୍କୁ ୨୫ ଦିନ ହେଲା ଯେଉଁ ଦୁଃଖଦ ଖବର ପରିବାର ଲୋକେ ଲୁଚାଇ ରଖିଥିଲେ ଏକ ପୁରୁଣା ଖବର କାଗଜ ଦେଖି ସବୁକଥା ଜାଣିଗଲେ ରୀମା ।

ସ୍ୱାମୀ ସୌମ୍ୟଶେଖର ଯେ, ଆଉ ଦୁନିଆରେ ନାହାନ୍ତି ସେ କଥା ଜାଣି ଦୀର୍ଘ ୫ ଘଣ୍ଟା ଧରି କାନ୍ଦିଥିଲେ ରୀମା । ପରିବାର ଲୋକେ ବୁଝାସୁଝା କରିବା ପରେ ସେ ବୁଝିଥିଲେ । ଗତ ମାସ ୨୩ ତାରିଖରେ ପାର୍ସଲ ବୋମା ବିସ୍ଫୋରଣରେ ପ୍ରାଣ ହରାଇଥିଲେ ରୀମାଙ୍କ ସ୍ୱାମୀ ସୌମ୍ୟଶେଖର ଓ ତାଙ୍କ ଜେଜେ ମା’।  ଏପଟେ ପାର୍ସଲ ବୋମା ବିସ୍ଫୋରଣ ଘଟଣାରେ ମୃତ ସୌମ୍ୟଶେଖରଙ୍କ ମା’ ଓ ରୀମାରାଣୀଙ୍କ ବାପା ଆଜି ମୁଖ୍ୟମନ୍ତ୍ରୀଙ୍କୁ ଭେଟିଛନ୍ତି । ଏହି ଅବସରରେ ତଦନ୍ତକୁ ତ୍ୱରାନିତ କରାଯିବ ବୋଲି ମୁଖ୍ୟମନ୍ତ୍ରୀ ଉଭୟଙ୍କୁ ଆଶ୍ୱସନା ଦେଇଛନ୍ତି।

ସ୍ୱାମୀର ମୃତ୍ୟୁ ଖବର ଜାଣିବା ନିଜ କୋହକୁ ସମ୍ଭାଳିପାରି ନଥିଲେ ରିମା।  ସ୍ୱାମୀ ଯଦି ମରିଯାଇଛନ୍ତି, ତାଙ୍କୁ କାହିଁକି ବଞ୍ଚେଇ ରଖିଲେ ବୋଲି କାନ୍ଦିକାନ୍ଦି ତାଙ୍କ ପରିବାର ଲୋକଙ୍କୁ କହିଥିଲେ। ସ୍ୱାମୀଙ୍କୁ ଝୁରି ଝୁରି କୌଣସି ଖାଦ୍ୟ ଗ୍ରହଣ କରି ନଥିଲେ କି ପାଣି ମଧ୍ୟ ପିଇ ନ ଥିଲେ। ତେବେ ବହୁ ବୁଝାସୁଝା ପରେ ସେ ଅଳ୍ପ କିଛି ଖାଦ୍ୟ ଖାଇଥିଲେ। ସୂଚନା ଅନୁଯାୟୀ ଗତ ଫେବୃଆରୀ ୧୮ ତାରିଖରେ ବ୍ରହ୍ମପଡ଼ାର ସୌମ୍ୟ ଶେଖରଙ୍କ ବିବାହ ହୋଇଥିଲା। ୨୦ ତାରିଖରେ ଆଭ୍ୟର୍ଥନା ଭୋଜି ହୋଇଥିଲା।

ସେହିଦିନ ମିଳିଥିବା ଉପହାରକୁ ଖୋଲୁଥିବା ବେଳେ ହଠାତ ବିସ୍ଫୋରଣ ଘଟିଲା। ଫଳରେ ସୌମ୍ୟ ଶେଖର, ତାଙ୍କ ପତ୍ନୀ ଓ ଜେଜେ ମାଆ ଗୁରୁତର ଆହତ ହୋଇଥିଲେ। ସେମାନଙ୍କୁ ପ୍ରଥମେ ପାଟଣାଗଡ଼ ମେଡ଼ିକାଲରେ ଭର୍ତ୍ତି କରିଥିଲେ। ସେମାନଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ସୌମ୍ୟ ଶେଖର ଓ ତାଙ୍କ ଜେଜେ ମା’ଙ୍କ ମୃତ୍ୟୁ ଘଟିଥିଲା।

https://youtu.be/NJkESkuFGVo

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।