ଜଳେଶ୍ୱର(ଅଜିତ ଦାସ): ଗଣେଶ ମୂର୍ତ୍ତି ବିସର୍ଜନ କରିବାକୁ ଯାଇ ଭାସିଗଲେ ନାବାଳକ। ଏପରି ଦୁଃଖଦ ଘଟଣା ଆଜି ବାଲେଶ୍ଵର ଜିଲ୍ଲା ରାଜଘାଟଠାରେ ଥିବା ବାରୁଣୀ ମନ୍ଦିର ସୁବର୍ଣ୍ଣରେଖା ନଦୀ ଘାଟ ଠାରେ ଘଟିଛି। ନିଖୋଜ ଛାତ୍ରଜଣକ ହେଲେ ରାମଚନ୍ଦ୍ରପୁର ଗ୍ରାମର ଗୁରୁପ୍ରସାଦ ସାମଲ ।
ଗୁରୁ ପ୍ରସାଦ ଆଜି ନିଜ ସାହି ପିଲାଙ୍କ ସହ ଗଣେଶ ମୂର୍ତ୍ତି ବିସର୍ଜନ କରିବାକୁ ସୁବର୍ଣ୍ଣରେଖା ନଦୀକୁ ଯାଇଥିଲେ। ଅନ୍ୟ ପିଲାମାନେ ଉପରେ ଥିବା ବେଳେ ଗୁରୁ ପ୍ରସାଦଙ୍କ ସମେତ ୩ ଜଣ ପାଣିକୁ ଓହ୍ଲାଇଥିଲେ। ମୂର୍ତ୍ତି ବିସର୍ଜନ କରୁ କରୁ ସମସ୍ତଙ୍କ ଗୋଡ଼ ଖସି ଯାଇଥିଲା। ହେଲେ ଅନ୍ୟ ୨ ଜଣ ପହିଁରି ପଳାଇ ଆସିଥିବା ବେଳେ ଗୁରୁ ପ୍ରସାଦ ପାଣିରେ ବୁଡ଼ି ଯାଇଥିଲେ।
ଖବର ପାଇ ଜଳେଶ୍ୱର ଅଗ୍ନିଶମ ବିଭାଗ ପହଞ୍ଚି ଖୋଜା ଖୋଜି କରୁଛନ୍ତି । ହେଲେ ୨ ଘଣ୍ଟା ପରେ ବି ଗୁରୁପ୍ରସାଦଙ୍କ ପତ୍ତା ମିଳିପାରି ନାହିଁ।