ପେଟ୍ରୋଲ ରାଲି ବେଳେ ବାଇକ୍‌ ସହ ଓଲଟିଲା ଶଗଡ଼

ଭୁବନେଶ୍ୱର(ଓଡ଼ିଶା ରିପୋର୍ଟର): ହୁ ହୁ ହୋଇ ବଢୁଛି ତେଲ ଦର। ଲାଗୁଛି ଯେମିତି ଆଉ ଦିନ କେଇଟା ପରେ ଲିଟର ୧୦୦ ଛୁଇଁବ। ଏ କଥାଟି ଖାଉଟିଙ୍କୁ ବି ବାଧୁଛି। ଆଉ ଆମ ସାଧାରଣ ଲୋକଙ୍କ ସମସ୍ୟାକୁ ନେଇ ଆନ୍ଦୋଳନକୁ ଓହ୍ଲାଉଛନ୍ତି ବିଭିନ୍ନ ରାଜନୈତିକ ଦଳ। ନିକଟରେ ତୈଳ ଦର ବୃଦ୍ଧ ନେଇ କେନ୍ଦ୍ରର ଘୋଷଣା ପରେ ତାତିଥିଲା ଶାସକ ବିଜେଡି । ଆଉ ଆରମ୍ଭ ହୋଇଥିଲା, ବିରୋଧ, ପ୍ରତିବାଦ। ରାଜଧାନୀରେ ଏକାଠି ହୋଇଥିଲେ ଗାଁ ଗଣ୍ଡାରୁ ଆସିଥିବା ଦଳୀୟ ସମର୍ଥକ ।  ପାୱାର ହାଉସ୍‌ ଛକଠାରୁ ରାଜଭବନ ଯାଏଁ ରାସ୍ତାରେ ଉଡିଥିଲା ନୀଳ ପତାକା । ମୁଣ୍ଡରେ ଶଂଙ୍ଖ ଚିହ୍ନର ନୀଳ ପଟି ବାନ୍ଧି ଆନ୍ଦୋଳନ ଚଳାଇଥିଲେ ଦଳୀୟ ସମର୍ଥକ।

ଏତିକିବେଳେ ଅଭିନବ ଉପାୟରେ ଆନ୍ଦୋଳନ କରିବାକୁ ରାଜଧାନୀକୁ ଆସିଥିଲା ଶଗଡ଼। ଆଉ ତା ଉପରେ ଛିଡା ହୋଇଥିଲ ବାଇକ୍‌। ତେଲ ଦର ଏମିତି ବଢୁଛି ଯେ, ଗାଡି ଚଳାଇବାକୁ ଡର ମାଡୁଛି। ଏହି କଥାକୁ ପ୍ରମାଣିତ କରିବାକୁ ଯାଇ ଶଗଡ଼ ଉପରେ ବାଇକ୍‌ ରଖି ଆନ୍ଦୋଳନ କରାଯାଉଥିଲା। ଆଉ ଏଇ ଶଗଡ଼ ପଛରେ ବନ୍ଧା ହୋଇଥିଲା ବିଜେଡି ପତକା। ଦେଖୁ ଦେଖୁ ଶଗଡ଼ ଗଡିଲା । ହେଲେ କେଇ ହାତ ଗଡିଛି କି ନାହିଁ। ଓଲଟି ପଡିଲା । ଆଉ ତା ଉପରେ ନଦା ହୋଇଥିବା ବାଇକ୍‌ ଆଉ ବାଇକ୍‌ ଧରି ଛିଡା ହୋଇଥିବା ଭାଇ ବି ତଳକୁ ଗଳି ପଡିଲେ।

ଏମିତି କିଛି ଦୃଶ୍ୟ ସମ୍ବଳିତ ଭିଡିଓ ଏବେ ଭାଇରାଲ ହେବାରେ ଲାଗିଛି। ଯାହାକୁ ଦେଖି ଲୋକେ କହୁଛନ୍ତି ବିଜେଡି ଶଗଡ଼ ଏବେଠୁ ବ୍ରେକ୍‌ଫେଲ ହେଲାଣି। ଅଗକୁ କ’ଣ ହେବ କେଜାଣି ?