ମେଡ଼ିକାଲରେ ମାଆ, ଜେଲ୍‌ରେ ବାପା: ବଡ଼ ମାଆ କୋଳରେ କାନ୍ଦୁଛି କଅଁଳା ଛୁଆ

<p>ବାଲେଶ୍ୱର(ଓଡ଼ିଶା ରିପୋର୍ଟର): ୭ ଦିନ ହେଲାଣି। ମାଆ କୋଳ ଦେଖିନି। ଏପରିକି ମାଆ ଖିର ପାଇନି ୭ରୁ ୮ ମାସର ଶିଶୁ। ମାଆକୁ ଖୋଜି କେତେବେଳେ ପପୁ ବୋତଲ ଚୁଚୁମି ପକାଉଛି ତ ପୁଣି କେତେବେଳେ ବଡ଼ମାଆ କୋଳରେ ରାହା ଧରି କାନ୍ଦୁଛି ଯେ କାନ୍ଦୁଛି। ଏହି କାହାଣୀ ମୁଖ୍ୟମନ୍ତ୍ରୀଙ୍କ ମଞ୍ଚକୁ ଅଣ୍ଡାମାଡ଼ ଘଟଣାର ଅଭିଯୁକ୍ତ ଥିବା ମହିଳା ରାଜେଶ୍ୱରୀଙ୍କ କୁନି ପୁଅର। ଏହି ମାମଲାରେ ଜେଲ୍&zwnj;ରେ ଥାଇ ଅସୁସ୍ଥ ହୋଇପଡ଼ିବା ପରେ ରାଜେଶ୍ୱରୀ ଗତକାଲିଠୁ କଟକ ବଡ଼ ମେଡିକାଲ୍&zwnj;ରେ ଭର୍ତ୍ତି ହୋଇଛନ୍ତି। ତାଙ୍କ ସ୍ୱାସ୍ଥ୍ୟ ଅବସ୍ଥା ଏବେ ସ୍ଥିର ଥିବା ଡାକ୍ତର କହୁଛନ୍ତି। ଏତିକି ବେଳେ ବାପା ବି ପାଖରେ ନାହାନ୍ତି। ମୁଖ୍ୟମନ୍ତ୍ରୀଙ୍କ ସଭାମଞ୍ଚକୁ ଅଣ୍ଡାମାଡ଼ ଷଡ଼ଯନ୍ତ୍ର ଘଟଣାରେ ସେ ବି ଜେଲ୍&zwnj;ରେ ରହିଛନ୍ତି। ରାଜେଶ୍ୱରୀଙ୍କ ଝିଅ ଦ୍ୱିତୀୟ ଶ୍ରେଣୀରେ ପଢୁଛି। ସେ ମଧ୍ୟ ଜାଣିନି ୭ ଦିନ ହେଲା ବାପା ଓ ମାଆ କୁଆଡ଼େ ଗଲେ ଓ କାହିଁକି ଘରେ ନାହାନ୍ତି?</p> <p>ଏପଟେ ନିଜ ଝିଅ ଓ କଅଁଳା ନାତି ପାଇଁ ନ୍ୟାୟ ଭିକ୍ଷା କରି ରାଜ୍ୟ ମାନବାଧିକାର କମିଶନଙ୍କ ଦ୍ୱାରସ୍ଥ ହୋଇଛନ୍ତି ରାଜେଶ୍ୱରୀଙ୍କ ମାଆ ଜୟନ୍ତୀ। ବିଜେପିର ପ୍ରତିନିଧି ଦଳଙ୍କ ସହ ମାନବାଧିକାର କମିଶନଙ୍କୁ ଭେଟି ସେ ଅଭିଯୋଗ କରିଛନ୍ତି, ଚିକିତ୍ସାଧୀନ ଅବସ୍ଥାରେ ଝିଅକୁ ପୋଲିସ୍ ଜବରଦସ୍ତି ଜେଲ୍ ପଠାଇଦେଇଛି। ଏପରିକି ସେଠାରେ ଶାରୀରିକ ନିର୍ଯାତନା ଦିଆଯାଉଥିବା କାରଣରୁ ତାର ଅବସ୍ଥା ସଂକଟାପନ୍ନ ହୋଇଛି। ତେଣୁ ଘଟଣାର ତଦନ୍ତ କରି ଦୋଷୀଙ୍କୁ କଠୋର ଦଣ୍ଡ ଦାବି କରିଛନ୍ତି ଜୟନ୍ତୀ।</p> <p>ରାଜେଶ୍ୱରୀଙ୍କର ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ଗତକାଲି କଟକ ବଡ଼ ମେଡିକାଲ ସ୍ଥାନାନ୍ତରିତ କରାଯାଇଥିଲା। ୮ ଜଣିଆ ଡାକ୍ତରୀ ଟିମ୍ ତାଙ୍କୁ ଚିକିତ୍ସା କରୁଛନ୍ତି। ତାଙ୍କ ସ୍ୱାସ୍ଥ୍ୟ ଅବସ୍ଥା ଏବେ ସ୍ଥିରଥିବା ମେଡିକାଲ୍ କର୍ତ୍ତୃପକ୍ଷ କହିଛନ୍ତି।</p> <p>ବାଲେଶ୍ୱର ତାଳସାରୀରେ ଗତ ୩୧ ତାରିଖରେ ମୁଖ୍ୟମନ୍ତ୍ରୀଙ୍କ ସଭାମଞ୍ଚକୁ ଅଣ୍ଡାମାଡ଼ ଘଟଣାରେ ପ୍ରଥମେ ରାଜେଶ୍ୱରୀଙ୍କ ବିରୋଧରେ ଲାଗିଥିଲା ଦଫା ୩୦୭ ହେଲେ ପରେ ଏଇ ଦଫାକୁ ପୋଲିସ୍ ଉଠାଇ ଦେଇଥିଲା।</p>