ଜିଲ୍ଲା ସଭାପତି ପଦରୁ ଇସ୍ତଫା ଦେଲେ କଂଗ୍ରେସ ବିଧାୟକ

କଟକ(ଓଡ଼ିଶା ରିପୋର୍ଟର): କଟକ ଜିଲ୍ଲା କଂଗ୍ରେସ ସଭାପତି ପଦରୁ ଇସ୍ତଫା ଦେଇଛନ୍ତି ସାଲେପୁର ବିଧାୟକ ପ୍ରକାଶ ବେହେରା। ସେ ତାଙ୍କ ଇସ୍ତଫା ପତ୍ର ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ନିକଟକୁ ପଠାଇ ଦେଇଛନ୍ତି। ନିଜ ନିର୍ବାଚନ ମଣ୍ଡଳୀରେ ଅଧିକ ସମୟ ଦେବା ପାଇଁ ଇସ୍ତଫା ଦେଇଥିବା ପ୍ରକାଶ କହିଛନ୍ତି। ମାତ୍ର ପ୍ରକୃତରେ ୱାନ୍ ମ୍ୟାନ୍ ୱାନ୍ ପୋଷ୍ଟ ପାଇଁ ସେ ଇସ୍ତଫା ଦେଇଥିବା କୁହାଯାଉଛି।

ପ୍ରକାଶ କହିଛନ୍ତି, “ଆଗକୁ ନିର୍ବାଚନ ଆଉ କମ୍‌ ସମୟ ରହିଛି। ସେଥିପାଇଁ ଇସ୍ତଫା ଦେଇ ନିର୍ବାଚନମଣ୍ଡଳୀ ଓ ଲୋକଙ୍କ ସହିତ ରହିବାକୁ ଚାହୁଁଛି। ଯଦି ଜିଲ୍ଲା ଦାୟତ୍ୱରେ ରହିବି, ତାହାହେଲେ ନିର୍ବାଚନମଣ୍ଡଳୀ ପ୍ରତି ବେଶୀ ସମୟ ଦେଇପାରିବି ନାହିଁ। ସେଥିପାଇଁ ଇସ୍ତଫା ଦେଲି। ଏଥିପାଇଁ ମୋ ଉପରେ କୌଣସି ପ୍ରକାର ଚାପ ନାହିଁ। ନୂଆ ଦାୟିତ୍ୱ ଯିଏ ନେବେ ତାଙ୍କୁ ସହଯୋଗ କରିବି।”

ପ୍ରକାଶଙ୍କ ଇସ୍ତଫା ନେଇ ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି-“ନିର୍ବାଚନକୁ ଆଉ କମ୍ ଦିନ ରହିଛି। ତେଣୁ ବିଧାୟକମାନଙ୍କୁ ସେମାନଙ୍କ ଅଞ୍ଚଳରେ ସଂଗଠନ ମଜଭୁତ କରିବା ପାଇଁ କୁହାଯାଇଛି। ଯାହାର ନିର୍ବାଚନରେ ପ୍ରାର୍ଥୀ ହେବାର ସମ୍ଭାବନା ନାହିଁ ସେମାନଙ୍କୁ ହିଁ ଜିଲ୍ଲା ସଭାପତି କରାଯିବ।”