କଟକ-ଭୁବନେଶ୍ୱରରେ ଚକା ଜାମ୍‌

ଭୁବନେଶ୍ୱର (ଓଡ଼ିଶା ରିପୋର୍ଟର): ବଢ଼ିଛି ପେଟ୍ରୋଲ ଓ ଡିଜେଲ ଦର। ଗ୍ୟାସ ଦର ମଧ୍ୟ ବଢ଼ିଛି। ଏହାର ପ୍ରଭାବ ସାଧାରଣ ଖାଉଟିଙ୍କ ଉପରେ ପଡ଼ିଛି। ଏହାର ପ୍ରତିବାଦରେ କଂଗ୍ରେସ ଆଜି ୬ ଘଣ୍ଟିଆ କଟକ-ଭୁବନେଶ୍ୱରରେ ଚକା ଜାମ୍‌ ଡାକରା ଦେଇଛି। ସକାଳ ୬ଟାରୁ କଂଗ୍ରେସ କର୍ମୀମାନେ ବିଭିନ୍ନ ସ୍ଥାନରେ ପିକେଟିଂ କରୁଛନ୍ତି। ଟାୟାର ଜାଳି ଗାଡ଼ି ଅଟକାଉଛନ୍ତି। ଆଜି ସକାଳ ୬ରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଗାଡ଼ି ନଚଳାଇବାକୁ କଂଗ୍ରେସ କର୍ମୀମାନେ ପରାମର୍ଶ ଦେଉଛନ୍ତି। ଫଳରେ ଗାଡ଼ି ଚଳାଚଳ ଏକ ରକମର ଠପ୍‌ ହୋଇ ଯାଇଛି। କଟକ ବାଦାମବାଡିରୁ କୌଣସି ବସ୍‌ ବାହାରକୁ ଯାଇପାରୁ ନାହିଁ। ରାଜଧାନୀ ଭୁବନେଶ୍ୱରରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିଛି। ଏଥିପାଇଁ କମିଶନରେଟ୍‌ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ସହରରେ ବିଭିନ୍ନ ସ୍ଥାନରେ ୨୦ରୁ ୨୫ ପ୍ଲାଟୁନ୍‌ ପୋଲିସ ମୁତୟନ କରାଯାଇଛି।

କଟକରେ କଂଗ୍ରେସ କର୍ମୀମାନେ ଟାୟାର ଜାଳି ପ୍ରତିବାଦ କରୁଛନ୍ତି

କଂଗ୍ରେସର ବନ୍ଦର ପ୍ରଭାବ କଟକରେ ଦେଖିବାକୁ ମିଳିଛି। ମଧୁପାଟଣା, ଜଗତପୁର, ଶିଖରପୁର, ପ୍ରେସଛକ ଓ ବାଦାମବାଡ଼ିରେ କଂଗ୍ରେସ କର୍ମୀମାନେ ପିକେଟିଂ କରୁଛନ୍ତି। ରାସ୍ତାରେ ଟାୟାର ଜାଳି ଗାଡ଼ି ଅଟକାଉଛନ୍ତି। ଯାତ୍ରୀବାହୀ ବସ୍‌ ଗୁଡ଼ିକ ଯାଇ ନପାରି ଅଟକି ରହିଛନ୍ତି।

କଟକରେ ବସ୍‌ ଅଟକି ରହିଛି

ଜଣେ କଂଗ୍ରେସ କର୍ମୀ କହିଛନ୍ତି-“ତେଲ ଦର ଭାଇ ଆମକୁ ବାଧେ, ବିଜେପି ଓ ବିଜେଡି ମିଛରେ କାନ୍ଦେ। କର୍ଣ୍ଣାଟକ ନିର୍ବାଚଳ ଫଳ ପ୍ରକାଶ ପାଇବା ପରେ ଅହେତୁକ ତେଲ ଦର ବୃଦ୍ଧି ପାଇଛି। ଏହାର ପ୍ରଭାବ ଶିଖାସଳଖ ଖାଉଟିଙ୍କ ଉପରେ ପଡ଼ିଛି। ସାଧାରଣ ଜନତା ନୈତିକତା ଦୃଷ୍ଟିରୁ କଂଗ୍ରେସର ଏହି ଆନ୍ଦୋଳନରେ ସାମିଲ ହୋଇଛନ୍ତି।”

ବନ୍ଦ ଯୋଗୁଁ ଉତ୍କଳ ବିଶ୍ୱବିଦ୍ୟାଳୟ ସମ୍ମୁଖ ଏନ୍‌ଏଚ୍‌ରେ ଗାଡ଼ି ଗୁଡ଼ିକ ଛିଡ଼ା ହୋଇଛନ୍ତି

ରାଜଧାନୀ ଭୁବନେଶ୍ୱରରେ ମଧ୍ୟ କଂଗ୍ରେସର ଆନ୍ଦୋଳନର ପ୍ରଭାବ ଦେଖିବାକୁ ମିଳିଛି। ଉତ୍କଳ ବିଶ୍ୱବିଦ୍ୟାଳୟର ଲ’ କଲେଜ ଛକରେ ରାସ୍ତା ରୋକ କରି ପ୍ରତିବାଦ କରୁଛନ୍ତି। ଫଳରେ ଜାତୀୟ ରାଜପଥରେ ଗାଡ଼ି ଗୁଡ଼ିକ ଠିଆ ହୋଇଛି।

ଭୁବନେଶ୍ୱରରେ ପିସିସି ସଭାପତି ନିରଞ୍ଜନ ପଟ୍ଟନାୟକ କର୍ମୀଙ୍କ ସହିତ ବନ୍ଦରେ ସାମିଲ ହୋଇଛନ୍ତି

ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି-“ତେଲ ଓ ଗ୍ୟାସ ଦର ଅହେତୁକ ଭାବେ ବୃଦ୍ଧି ପାଇଛି। କେନ୍ଦ୍ର ସରକାର ଚାହିଁରେ ଏହାକୁ ଆୟତ୍ତ କରିପାରିବେ। ଏକ୍‌ସାଇଜ୍‌ ଡ୍ୟୁଟିକୁ କମାଇବା ସହିତ ପେଟ୍ରୋଲ ଓ ଡିଜେଲ୍‌କୁ ଜିଏସ୍‌ଟିରେ ପରିସର ଭୁକ୍ତ କରିପାରିବେ। ମାତ୍ର କେନ୍ଦ୍ର ସରକାର ତାହା ନକରି କେତେକ ବଡ଼ବଡ଼ ବ୍ୟବସାୟୀଙ୍କୁ ସୁରକ୍ଷା ଦେବା ପାଇଁ ସାଧାରଣ ଜନତାଙ୍କ ପେଟକୁ ନାତ ମାରୁଛନ୍ତି। ରାଜ୍ୟ ସରକାର ଚାହିଁଲେ ଭାଟ୍‌କୁ କମାଇ ପାରନ୍ତେ। ମାତ୍ର ତାହା କରୁନାହାନ୍ତି। ସାଧାରଣ ଲୋକଙ୍କ ରକ୍ତକୁ ଶୋଷୁଛନ୍ତି। ଆମେ ଏ ସମ୍ପର୍କରେ ସାଧାରଣ ଜନତାଙ୍କୁ ଜଣାଇବା ପାଇଁ ଆଜି ଏହି ବନ୍ଦ ଡାକରା ଦେଇଛି।”

This website uses cookies to improve your experience. We'll assume you're ok with this, but you can opt-out if you wish. AcceptRead More