ବଲାଙ୍ଗିର(ଓଡ଼ିଶା ରିପୋର୍ଟର): ମହାମାରୀବେଳେ ହୋଇଛି ମହାଲୁଟ୍ । ଲକଡାଉନ୍ ସମୟରେ ସରକାରୀ ଅର୍ଥ ଆତ୍ମସାତରେ ମାତିଥିଲେ ଅସାଧୁ ଅଫିସର କେମିତି-ବଲାଙ୍ଗୀରରୁ ଆସିଛି ସାଂଘାତିକ ଅଭିଯୋଗ ସାଙ୍ଗକୁ ତଥ୍ୟଗତ ପ୍ରମାଣ । ସହରର ବିଭିନ୍ନ ପଡ଼ାରେ କଣ୍ଟେନମେଣ୍ଟ ଜୋନ୍ ଘୋଷଣା ପରେ କେମିତି ବ୍ୟାରିକେଡ୍ ଲଗା ବାବଦରେ ହରିଲୁଟ୍ ହୋଇଛି ତାର ଦସ୍ତାବିଜ୍ ସାମ୍ନାକୁ ଆସିଛି । ୫ରୁ ୧୦ ଖଣ୍ଡ ଲେଖାଏଁ ବାଉଁଶ ବାନ୍ଧି ବିଲ୍ କରାଇ ଉଠାଇଛନ୍ତି ଲକ୍ଷାଧିକ ଟଙ୍କା ।
ପୂର୍ତ୍ତ ବିଭାଗର ତଥ୍ୟ କହୁଛି-୭ଟି ପଡ଼ାରେ ଏ ବାବଦରେ ଖର୍ଚ୍ଚ ହୋଇଛି ୪ଲକ୍ଷ ୩୩ ହଜାର ଟଙ୍କା । ଏଠି ପ୍ରଶ୍ନ ସତରେ କଣ ଏତେ ଟଙ୍କା ଖର୍ଚ୍ଚ ହୋଇଛି? ଜାଣିବା ପାଇଁ ଟିକେ ଲକ୍ଡାଉନ୍ ବେଳକୁ ଯିବା । ହାତୀଶାଳ ପଡ଼ାର ବସ୍ତି ଅଞ୍ଚଳରୁ ପ୍ରଥମ କରୋନା ପଜିଟିଭ୍ ଚିହ୍ନଟ ହୋଇଛି। ପରେ କଣ୍ଟେନମେଣ୍ଟ ଜୋନ୍ ଘୋଷଣା ହୋଇଥିଲା । ୫ରୁ ଦଶ ଖଣ୍ଡ ବାଉଁଶ ପକାଇ ଏଠାରେ ପ୍ରଶାସନ ଲଗାଇଥିଲା ବ୍ୟାରିକେଡ୍। କିନ୍ତୁ ସେ ବାବଦରେ କୁଆଡ଼େ ଖର୍ଚ୍ଚ ହୋଇଛି ୨ଲକ୍ଷ ୪୨ ହଜାର ୪୧୬ ଟଙ୍କା । ଠିକ୍ ସେମିତି ଠିକାଦାର ପଡ଼ାରେ ୫ରୁ ୭ଖଣ୍ଡ ବାଉଁଶରେ ବ୍ୟାରିକେଡ୍ ଲଗାଯାଇ ବିଲ୍ ହୋଇଛି ୩୯ ହଜାର ୪୫୬ଟଙ୍କା।
ରୁଗୁଡ଼ିପଡ଼ାର ବ୍ୟାରିକେଡ୍କୁ ବି ଟିକେ ଦେଖନ୍ତୁ। ଏଠି କୁଆଡ଼େ ୨୦ ହଜାର ୨୬ ଟଙ୍କାର ବାଉଁଶ ଲାଗିଛି । ସେମିତି ବେହେରାପାଲ୍ଲୀରେ ୨୩ ହଜାର ୬୦୩ଟଙ୍କା, ସୁଦପଡ଼ାରେ ୨୩ ହଜାର ୯୮୪, ରାଧାରାଣୀପଡ଼ାରେ ୧୧ ହଜାର ୭ଶହ ଟଙ୍କା ଖର୍ଚ୍ଚ ଦର୍ଶାଯାଇଛି ଏମିତିକି CGST ଓ SGST ବାବଦରେ ୪୬ ହଜାରରୁ ଅଧିକ ଟଙ୍କାକୁ ମିଶାଇ ମୋଟ୍ ଖର୍ଚ୍ଚ ଦର୍ଶାଯାଇଛି ୪ଲକ୍ଷ ୩୩ ହଜାର ୨ଶହ ଟଙ୍କା । ଦିନ ଦ୍ୱିପହରେ ଆଖିରେ ଆଙ୍ଗୁଠି ଗେଞ୍ଜି ହୋଇଥିବା ଏ ଦୁର୍ନୀତିକୁ କିନ୍ତୁ ସହଜରେ ଗ୍ରହଣ କରିପାରି ନାହାନ୍ତି ସ୍ଥାନୀୟ ଲୋକେ।
ଏଠି ପ୍ରଶ୍ନ ବଲାଙ୍ଗିର ସହରରେ ବ୍ୟାରିକେଡ୍ ନାଁରେ ଏ ମହାଲୁଟ୍ ପଛରେ କେବଳ ପୂର୍ତ୍ତ ବିଭାଗ ନା ପୁରା ପ୍ରଶାସନ ସାମିଲ୍ ? କାରଣ ଶହେ କି ଦୁଇ ଶହ ଟଙ୍କାର ଛଅରୁ ୧୦ ଖଣ୍ଡ ବାଉଁଶ ଲଗାଇ ଲକ୍ଷ ଲକ୍ଷ ଟଙ୍କାର ବିଲ୍ ହେଲାବେଳେ ଇଂଜିନିୟରଙ୍କଠୁ ଉପ-ଜିଲ୍ଲାପାଳ ଏମିତିକି ଜିଲ୍ଲାପାଳଙ୍କ ଯାଏଁ କେହି ଜଣେ ହେଲେ କେମିତି ଜାଣି ପାରିଲେନି । ଆଉ ବିଲ୍ ଉପରେ ସମସ୍ତେ ବି ସହଜରେ ଦସ୍ତଖତ ଦେଇଛନ୍ତି । ଘଟଣା ସମ୍ପର୍କରେ ପୂର୍ତ୍ତ ବିଭାଗର ଅଧିକ୍ଷଣ ଯନ୍ତ୍ରୀଙ୍କୁ ପଚାରିବାରେ ସେ କୁଆଡ଼େ ସେତେବେଳେ ଏଠି ନଥିଲେ କହି ମୁଣ୍ଡରୁ ଦୋଷ ଖସାଇ ଦେଇଥିବାବେଳେ ଜିଲ୍ଲାପାଳ କହିଛନ୍ତି ଭୁଲ୍ ଥିଲେ ନିଶ୍ଚୟ କାର୍ଯ୍ୟାନୁଷ୍ଠାନ ହେବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
