ଚାବିଚୋରି ନିଆଁରେ ଘିଅ ଢାଳିଲେ ଦାମ, କହିଲେ ଏମିତି ବିବାଦୀୟ କଥା, କାହାକୁ କରୁଛନ୍ତି ଇଙ୍ଗିତ?

ଭୁବନେଶ୍ୱର (ଓଡ଼ିଶା ରିପୋର୍ଟର) କୁଆଡ଼େ ଗଲା ଶ୍ରୀମନ୍ଦିର ରତ୍ନ ଭଣ୍ଡାରର ଚାବି। ତାକୁ ନେଇ ହୋହଲ୍ଲା ଚାଲିଥିବା ବେଳେ, ଏବେ ବିଜେଡିର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ଡାକ୍ତର ଦାମୋଦର ରାଉତ ମୁହଁ ଖୋଲି କେଇଧାଡ଼ି ବିବାଦୀୟ ମନ୍ତବ୍ୟ ଦେଇଛନ୍ତି। ସୂଚନାଯୋଗ୍ୟ ଯେ, କିଛିଦିନର ଚର୍ଚ୍ଚା ପରେ ଗତକାଲି ରାଜ୍ୟ ସରକାର ‘ଚାବି ହଜିବା’ ଘଟଣାର ‘ବିଚାର ବିଭାଗୀୟ ତଦନ୍ତ’ କରିବାକୁ ନିର୍ଦ୍ଦେଶ ଦେଇଛନ୍ତି। ଏବେ ପଢ଼ନ୍ତୁ କ’ଣ କହିଛନ୍ତି ଡାକ୍ତର ଦାମୋଦର ରାଉତ।

ଦାମ କହିଛନ୍ତି- ‘୭୪ ମସିହାରେ ସେତେବେଳର ଗଭର୍ଣ୍ଣର ବମ୍ବେରୁ ଜଣେ ଜହୁରୀଙ୍କୁ ଆଣିଥିଲେ। ସେ ଦେଢ଼ଦିନ ରହିଲା ପରେ କ’ଣ ଘଟଣା ଘଟିଲା କେହି ଜାଣନ୍ତିନି, ସେ ଛାଟିପିଟି ହେଇକି ପଳେଇଲା। ବର୍ତ୍ତମାନ କହୁଛନ୍ତି, ତିନିଜଣଙ୍କ ପାଖରେ ତିନିଟା ଚାବି ଥିଲା। ଗୋଟେ ଗଜପତିଙ୍କ ପାଖରେ, ଗୋଟେ ଭଣ୍ଡାର ରକ୍ଷକ ପାଖରେ, ଆଉଗୋଟେ କୋଉଠି, ଏମିତି ତିନିଜଣଙ୍କ ପାଖରେ ଚାବି ଥିଲା। ତିନିଜଣଙ୍କ ପାଖରେ ତିନିଟା ଚାବି ଦିଆଗଲା, ସମସ୍ତେ ଜାଣିଛନ୍ତି ଏଟା ରତ୍ନ ଭଣ୍ଡାର। କୋଟି କୋଟି ଟଙ୍କାର ସମ୍ପତ୍ତି ଥିବ। ଏ ତିନିଜଣଙ୍କୁ ଯୋଉ ଚାବି ଦିଆଯାଇଛି, ତା ଭିତରେ ଜଣେ ଯଦି କିଏ ଖୋଲିକି ନେଇ ଯାଇଥିବ। ତାକୁ କିଏ କ’ଣ କରିବ। ତିନିଜଣଙ୍କ ପାଖରେ ତିନିଟା ଚାବି ରହିଲା କେମିତି? ତା ଭିତରେ ଜଣେ ଚାବି ରଖିଲା ଲୋକ ହେଉଛନ୍ତି ଗଜପତି ମହାରାଜ, ସେ ତ ଏ ପର୍ଯ୍ୟନ୍ତ ତୁଣ୍ଡ ଖୋଲିନାହାଁନ୍ତି, ତାଙ୍କୁ ନ ପଚାରିକି ମତେ କାହିଁକି ପଚାରୁଛନ୍ତି। ଜଗତର ନାଥ ଜଗନ୍ନାଥ ହେଉଛନ୍ତି ଆମର ଆରାଧ୍ୟ ଦେବତା। ତାଙ୍କ ସମ୍ପତ୍ତିକୁ ଚୋରି କରିବା ମହାପାପ। ଓଡ଼ିଶାର ପ୍ରତ୍ୟେକ ଲୋକଙ୍କ ମନ ଭିତରେ ମହାପ୍ରଭୁ ଜଗନ୍ନାଥଙ୍କ ପ୍ରତି ଭକ୍ତି ରହିଛି। ସେ ଅବସ୍ଥାରେ ଯଦି ତାଙ୍କ ସମ୍ପତ୍ତି କିଏ ଚୋରି କରୁଛି, ସେ ନର୍କରେ ପଡ଼ିବ। ମୁଁ କିଛି କହିପାରିବିନି।’

ରତ୍ନଭଣ୍ଡାର ପ୍ରସଙ୍ଗରେ ଆନ୍ଦୋଳନ

ସେହିପରି ଚାବି ହଜିବା ଘଟଣାର ତଦନ୍ତ ପାଇଁ ରାଜ୍ୟ ସରକାର ଗଠନ କରିଥିବା ବିଚାର ବିଭାଗୀୟ ତଦନ୍ତ କମିଶନଙ୍କ ସଂପର୍କରେ ମଧ୍ୟ ଦାମ ତାଙ୍କ ମନ୍ତବ୍ୟ ଦେଇଛନ୍ତି। ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନ ଥିଲା- ତଦନ୍ତ କମିଶନ ବସିଗଲେ କ’ଣ ସମସ୍ୟାର ସମାଧାନ ହୋଇଯିବ? ଉତ୍ତରରେ ଦାମ କହିଛନ୍ତି- ବିରୋଧୀ ଦଳ ବାଲାଏ ଯେତେବେଳେ ଏତେକଥା କହୁଛନ୍ତି, ତାକୁ ଆଭଏଡ୍ କରିବାକୁ ଆମେ କମିଶନ ବସେଇବୁ ନାହିଁ ତ କ’ଣ କରିବୁ।’