ଭୁବନେଶ୍ୱର(ଓଡ଼ିଶା ରିପୋର୍ଟର): କାଲି ସରିବ ଧନୁଯାତ୍ରା। ମୋକ୍ଷ ପାଇବେ କଂସ ମହାରାଜ। ଦୀର୍ଘ ୧୧ଦିନ ଧରି ମଥୁରା ନଗରୀରେ ବସି ତ୍ରୀପୁରକୁ ଥରହର କରୁଥିବା କଂସ ମହାରାଜ ଇତିମଧ୍ୟରେ ଅନେକ ଦୋଷିଙ୍କୁ ଦଣ୍ଡ ଦେଇଛନ୍ତି। ନେତା, ପ୍ରଶାସକ ଓ ଅନେକ ଗଣମାଧ୍ୟମ ପ୍ରତିନିଧିଙ୍କୁ ଭଲ କାମ କରିବାକୁ ପ୍ରବର୍ତ୍ତାଇଛନ୍ତି। ଆଉ ମହାରାଜଙ୍କ ସବୁଠାରୁ ବଡ଼ ଘଟଣା ମଧ୍ୟରେ ରହିଛି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନିର୍ଦ୍ଦେଶ।
ଓଡ଼ିଶା ରିପୋର୍ଟରକୁ ଦେଇଥିବା ସାକ୍ଷାତକାରରେ ସେ କହିଛନ୍ତି, “ମୁଁ ମୁଖ୍ୟମନ୍ତ୍ରୀଙ୍କୁ ମୋ ପ୍ରଜାକୁଳର ସମସ୍ତ ଦୁଃଖ ବୁଝିବା ପାଇଁ ନିର୍ଦ୍ଦେଶ ଦେବି। ମୋ ମଥୁରା ନଗରୀରେ ଯେମିତି ବେକାରି ସମସ୍ୟା ଦୂର ହେବ ସେ ବିଷୟରେ ସେ ଚିନ୍ତା କରନ୍ତୁ। ମଥୁରା ରାଜ୍ୟର ଆବାଳ ବୃଦ୍ଧ ବନିତା କେମିତି ଖୁସିରେ ରହିବେ ତାର ଦାୟିତ୍ୱ ମୁଖ୍ୟମନ୍ତ୍ରୀଙ୍କ ଉପରେ ଛାଡିଲି।”
ଏଥିସହ ଓଡ଼ିଶାରେ କାହିଁକି ଚାଷୀକୂଳ ନିରାଶ ସେ ବିଷୟରେ ପ୍ରଶ୍ନ କରିବାରୁ କଂସ ଏଥିପାଇଁ ପ୍ରଥମେ ଦେବ ଲୋକକୁ ଦାୟି କରିଛନ୍ତି। ଇନ୍ଦ୍ର ଠିକ୍ ଭାବରେ ବୃଷ୍ଟି କରୁନାହାନ୍ତି ଏବଂ ମଥୁରା ରାଜ୍ୟରେ ତ୍ରିଭୁବନ କଂସକୁ ସମସ୍ତେ ଡରୁଥିବା ବେଳେ କେବଳ ଚକଡା ପୋକ ତାଙ୍କୁ ଡରୁନାହିଁ ବୋଲି ସେ କହିଛନ୍ତି।
ତେଣୁ ସେ ଏଥିପାଇଁ ମୁଖ୍ୟମନ୍ତ୍ରୀଙ୍କୁ ଉନ୍ନତ ମାନର କୀଟନାଷକ ଔଷଧ ବ୍ୟବସ୍ଥା କରିବାକୁ ନିର୍ଦ୍ଦେଶ ଦେଇଛନ୍ତି। କୀଟନାଷକ ପ୍ରସ୍ତୁତ କରୁଥିବା କମ୍ପାନୀଗୁଡିକୁ ମଧ୍ୟ କଂସ ତାଗିଦ୍ କରିଛନ୍ତି। ଯେଉଁମାନେ ନିମ୍ନମାନର ଔଷଧ ତିଆରି କରୁଛନ୍ତି ସେମାନଙ୍କ ଲାଇସେନ୍ସ ରଦ୍ଧ କରିବାକୁ ସେ ମୁଖ୍ୟମନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି।
https://www.youtube.com/watch?v=YM2QfxBLz-w&t=270s
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
