ରାହୁଲଙ୍କୁ ଜବାବ ଦେଲେ ଧର୍ମେନ୍ଦ୍ର

ଭୁବନେଶ୍ୱର(ଓଡ଼ିଶା ରିପୋର୍ଟର): କଂଗ୍ରେସ ନେତା ରାହୁଲ ଗାନ୍ଧିଙ୍କ ମନ୍ତବ୍ୟକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସମାଲୋଚନା କରିଛନ୍ତି। ଭାରତରେ ଅବାସ୍ତବ ଗଣତନ୍ତ୍ର ନେଇ ରାହୁଲଙ୍କ ମନ୍ତବ୍ୟରେ ଧର୍ମେନ୍ଦ୍ର ବର୍ଷିଛନ୍ତି । ଧର୍ମେନ୍ଦ୍ର କହିଛନ୍ତି ଯେ, ମୁଁ ମଧ୍ୟ ଏକମତ ଯେ ଏକଦା ଭାରତରେ ଗଣତନ୍ତ୍ର ବୋଲି କିଛି ନ ଥିଲା। ମାତ୍ର ଜରୁରୀକାଳୀନ ସ୍ଥିତିର ସେହି କଳା ଦିନ ଶେଷ ହୋଇଛି। କଂଗ୍ରେସ ଅନେକ ଥର ଭାରତୀୟ ଗଣତାନ୍ତ୍ରିକ ବ୍ୟବସ୍ଥାକୁ ଉପହାସ କରିଛି । ବଂଶଗତ ଭାବେ କ୍ଷମତା ଉପଭୋଗକାରୀଙ୍କ ପାଇଁ ବିସ୍ମିତ ହେବାର ନାହିଁ । ସେମାନଙ୍କ କଥାରେ ଆମ ଗଣତନ୍ତ୍ର ନ ଚାଲିଲେ ଏପରି ଆରୋପ ନୂଆ ନୁହେଁ। ସେମାନଙ୍କ ପାଇଁ ଏହି ଅଭ୍ୟାସ ପରିତ୍ୟାଗ କରିବା କଷ୍ଟକର ବ୍ୟାପାର। ମାତ୍ର ଭାରତ ସାରା ବିଶ୍ୱକୁ ଅନେକ ଶିକ୍ଷା ଦେଇଛି ସେମାନେ ବି ଶିଖନ୍ତୁ ବୋଲି ଧର୍ମେନ୍ଦ୍ର ରିଟ୍ୱିଟ୍‌ କରି କହିଛନ୍ତି।

ରାହୁଲ ଗାନ୍ଧି ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଭେଟି କୃଷି ଆଇନ ବିରୋଧରେ କଂଗ୍ରେସ ସଂଗ୍ରହ କରିଥିବା ୨ କୋଟି ଲୋକଙ୍କ ସ୍ୱାକ୍ଷର ଥିବା ସ୍ମାରକପତ୍ର ପ୍ରଦାନ କରିଛନ୍ତି। କୃଷି ଆଇନ ଉଚ୍ଛେଦ ନ ହେବା ଯାଏ, ଚାଷୀମାନେ ଦିଲ୍ଲୀ ସୀମାରୁ ଉଠିବେ ନାହିଁ ବୋଲି ରାହୁଲ କହିଛନ୍ତି।

ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଭେଟିବା ପରେ ରାହୁଲ କହିଛନ୍ତି, ବିରୋଧୀ ଦଳଗୁଡ଼ିକ ଚାଷୀଙ୍କ ସହ ରହିଛନ୍ତି। କୃଷି ଆଇନ ସଂପୂର୍ଣ୍ଣ ପ୍ରତ୍ୟାହାର ନ ହେବା ଯାଏ, ଚାଷୀଙ୍କ ଆନ୍ଦୋଳନ ବନ୍ଦ ହେବନାହିଁ। ଭାରତରେ ବର୍ତ୍ତମାନ ଗଣତନ୍ତ୍ର ଶେଷ ହେବାକୁ ବସିଲାଣି। ମୁଁ ପ୍ରଧାନମନ୍ତ୍ରୀ ମୋଦିଙ୍କୁ କହିବାକୁ ଚାହୁଁଛି ଯେ କୃଷି ଆଇନକୁ ସେ ପ୍ରତ୍ୟାହାର କରନ୍ତୁ। ସରକାର ସଂସଦର ଯୁଗ୍ମ ଅଧିବେଶନ ଡାକନ୍ତୁ ଓ ଆଇନକୁ ବାତିଲ କରନ୍ତୁ ବୋଲି ସେ କହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।