ମୋତେ କାହିଁକି କେମିତି କେମିତି ଲାଗୁଛି: ଦାମ

ଭୁବନେଶ୍ୱର (ଓଡ଼ିଶା ରିପୋର୍ଟର): ‘ମୋ ଆସନରେ କ’ଣ ହେବ, ତାହା ମୁଁ କଳନା କରିପାରୁନି। ମୋତେ କାହିଁକି କେମିତି କେମିତି ଲାଗୁଛି। ତେବେ ମୋ ସମର୍ଥକ କହୁଛନ୍ତି ୪/୫ ହଜାର ଭୋଟରେ ଜିତିବି।” ସାରା ରାଜ୍ୟର ନିର୍ବାଚନୀ ଗଣିତ କଳନା କରିଥିବା ବିଜେପିର ବରିଷ୍ଠ ନେତା ଡାକ୍ତର ଦାମୋଦର ରାଉତ ନିଜ ଆସନର କଳନା ନ କରିପାରି ଆଜି ଏମିତି ମନ୍ତବ୍ୟ ଦେଇଛନ୍ତି।

ଅନ୍ୟପକ୍ଷରେ ସେ କହିଛନ୍ତି, ଓଡ଼ିଶାରେ ଏଥର ଝୁଲା ବିଧାନସଭା ହେବ। ବିଜେଡି ୬୦ରୁ ଅଧିକ ଆସନ ପାଇବ। ବିଜେଡିର ଆସନ ସଂଖ୍ୟା ୭୩ ଛୁଇଁବନି। ସେହିଭଳି ବିଜେପି ୫୦ରୁ ୫୫ ଏବଂ କଂଗ୍ରେସ ୨୫ରୁ ୩୦ଟି ଆସନ ପାଇବ। ଏଭଳି ସ୍ଥିତିରେ ଓଡ଼ିଶାରେ ମିଳିତ ସରକାର ସମ୍ଭାବନା ଦେଖାଦେଇଛି।”

ଡା. ରାଉତ ଆହୁରି କହିଛନ୍ତି, ଉପକୂଳ ଓଡ଼ିଶାରେ ବିଜେପି ୭୩ଟି ଆସନରୁ ୩୦ଟିରେ ଜିତିବ। ପାରାଦୀପରେ ବିଜେଡି ଓ ତିର୍ତ୍ତୋଲରେ ବିଜେପି ଜିତିବ। ସୂଚନାଯୋଗ୍ୟ, ପାରାଦୀପରୁ ତାଙ୍କ ପୁଅ ବିଜେଡି ଟିକେଟ୍‌ରେ ପ୍ରାର୍ଥୀ ହୋଇଛନ୍ତି।

ସେହିଭଳି ଲୋକସଭା ଆସନକୁ ନେଇ ସେ କହିଛନ୍ତି ଯେ, ଏଥର ବିଜେପି ୧୩ରୁ ୧୪ଟି ଆସନ ଜିତିବ।

ସୂଚନାଯୋଗ୍ୟ, ଦାମୋଦର ରାଉତ ଏଥର ବିଜେପି ଟିକେଟ୍‌ରେ ବାଲିକୁଦା-ଏରସମା ଆସନରୁ ପ୍ରାର୍ଥୀ ହୋଇଛନ୍ତି।