ଭଦ୍ରକ(ଓଡ଼ିଶା ରିପୋର୍ଟର): ପୁଲିସ ଦେଖାଇଲା ମାନବିକତା। ଅନ୍ଧାର ରାତିରେ ଅସହାୟ ବୃଦ୍ଧଙ୍କୁ ଜାତୀୟ ରାଜପଥ ପାର କରାଇଲେ ଭଦ୍ରକ ଜଣେ ପୁଲିସ କର୍ମଚାରୀ । ଗତକାଲି ରାଜ୍ୟପାଳ ପ୍ରଫେସର ଗଣେଶଲାଲଜୀଙ୍କର ବାଲେଶ୍ୱର ଗସ୍ତ ଥିଲା। ଏହି ସମୟରେ ସେ ଭଦ୍ରକରେ ସ୍ୱଳ୍ପ ସମୟ ପାଇଁ ରହିଥିଲେ। ଏଥିପାଇଁ ଭଦ୍ରକ ନୂଆ ବସଷ୍ଟାଣ୍ଡ ନିକଟରେ ଦାୟିତ୍ୱରେ ଥିଲେ ଟାଉନ ଥାନା ଏଏସଆଇ ଶରତ ବେହେରା । ରାଜ୍ୟପାଳଙ୍କ ଗସ୍ତ ସମୟରେ ନୂଆ ବସଷ୍ଟାଣ୍ଡ ନିକଟରେ ସେ ଟ୍ରାଫିକ ନିୟନ୍ତ୍ରଣ ଡ୍ୟୁଟି କରୁଥିଲେ।
ଏହି ସମୟରେ ଜଣେ ବୃଦ୍ଧ ପୁଲିସକୁ ଦେଖି ଡରିଯିବା ସହ ଜାତୀୟ ରାଜପଥ ଅତିକ୍ରମ କରି ପାରୁନଥିଲେ। ବୃଦ୍ଧ ଜଣଙ୍କୁ ବି ଆଖିକୁ ସ୍ପଷ୍ଟ ଦେଖା ଯାଉ ନଥିଲା। ଦୁଇ ପାର୍ଶ୍ୱରେ ଗାଡି ଆସୁଥିବାରୁ ଅସହାୟ ବୃଦ୍ଧ ରାସ୍ତା ଅତିକ୍ରମ କରିବା ଏକ ପ୍ରକାର ମୁସ୍କିଲ ହୋଇପଡ଼ିଥିଲା। ଅସହାୟ ବୃଦ୍ଧଙ୍କୁ ଦେଖି ମାନବିକତାର ପରିଚୟ ଦେଇ ହାତ ବଢାଇଥିଲେ ପୁଲିସ କର୍ମଚାରୀ ଶରତ।
ଅନ୍ଧାର ଭିତରେ ବାଟ ଖୋଜୁଥିବା ସେହି ଅସହାୟ ବୃଙ୍କ ହାତ ଧରି ପାରି କରିଦେଇଥିଲେ ଶରତ। ପୁଲିସ ଭାଇଙ୍କ ଏଭଳି କାର୍ଯ୍ୟକୁ ସମସ୍ତେ ପ୍ରଶଂସା କରିଛନ୍ତି।