ତେଲକୋଇ(ଚିନ୍ମୟ ସାହୁ): ଭୋଜି ଖାଇ ଫେରୁଥିବା ବେଳେ ବୃଦ୍ଧାଙ୍କ ଉପରେ ଗଛ ଭାଙ୍ଗି ପଡ଼ିଲା। ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଛି। ଆଜି ଅପରାହ୍ନରେ ଏପରି ଦୁର୍ଘଟଣା କେନ୍ଦୁଝର ଜିଲ୍ଲାରେ ଘଟିଛି।
ତେଲକୋଇ ଥାନା ରାସସୁଆଁ ପଞ୍ଚାୟତ ମାରଦା ଗାଁରେ ଜଣଙ୍କ ଘର ପ୍ରତିଷ୍ଠା ଉତ୍ସବ ଥିଲା। ସେଥିପାଇଁ ସେ ଭୋଜି ଆୟୋଜନ କରିଥିଲେ। ତେଣୁ ଭୋଜି ଖାଇବା ପାଇଁ ସେହି ଗାଁର ରାଶ ବେହେରା ଯାଇଥିଲେ। ଭୋଜି ଖାଉଥିବା ବେଳେ ଅପରାହ୍ନ ପ୍ରାୟ ୪ଟା ବେଳେ ଆକାଶରେ ଘୋଟି ଆସିଥିଲା କଳାହାଣ୍ଡିଆ ବାଦଲ। ତା’ପରେ ପ୍ରବଳ ବେଗରେ ପବନ ବୋହିବା ସହିତ ମେଘ ଓ ଘଡଘଡ଼ି ମାରିଥିଲା।
କାଳବୈଶାଖୀର ତାଣ୍ଡବ ରୂପ ଦେଖି ଭୋଜି ଖାଇବାକୁ ଯାଇଥିବା ଲୋକମାନେ ନିରାପଦ ସ୍ଥାନରେ ଆଶ୍ରୟ ନେଇଥିଲେ। ବର୍ଷା ଓ ପବନ କମିବା ପରେ ରସ ଚାଲି ଚାଲି ଘକରୁ ଫେରୁଥିଲେ। ଠିକ୍ ଏହି ସମୟରେ ତାଙ୍କ ଉପରେ ଗୋଟିଏ ଗଛ ଭାଙ୍ଗି ପଡ଼ିଥିଲା। ଫଳରେ ଘଟଣା ସ୍ଥଳରେ ତାଙ୍କର ପ୍ରାଣବାୟୁ ଉଡି ଯାଇଥିଲା।