କାମ କରିବାକୁ ଯାଉଥିଲେ, ବାଟରେ ଦନ୍ତା ଦଳି ଦେଲା

ଢେଙ୍କାନାଳ (ରାଜଶ୍ରୀ ଶତପଥୀ): ଢେଙ୍କାନାଳ ସଦର ଥାନା ଗେଙ୍ଗୁଟିଆ ଗାଁ ନିକଟରେ ଲେବଲ୍ କ୍ରସିଂ ଠାରେ ହାତୀ ଆକ୍ରମଣରେ ଜଣଙ୍କ ମୃତ୍ୟୁ ଘଟିଛି।  ମୃତକ ଜଣଙ୍କ ହେଲେ ଗେଙ୍ଗୁଟିଆର ଗାଁର ସୁଶାନ୍ତ ବେହେରା।

ଦିନ ମଜୁରିଆ ସୁଶାନ୍ତ ତାଙ୍କର ଆଉ ଦୁଇଜଣ ସାଥୀଙ୍କ ସହ କାମ କରିବା ପାଇଁ ଢେଙ୍କାନାଳ ସହର ଅଭିମୁଖେ ଆସୁଥିଲେ। ଏହି ସମୟରେ ଏକ ଦନ୍ତାହାତୀ ଆକ୍ରମଣ କରିଥିଲା।  ଦୁଇ ଜଣ ଦୌଡ଼ି ପଳାଇବାରେ ସକ୍ଷମ ହୋଇଥିଲା ବେଳେ ସୁଶାନ୍ତ ହାତୀ ହାବୁଡ଼ରେ ପଡ଼ିଯାଇଥିଲେ। ଦନ୍ତାହାତୀଟି  ସ୍ଥାନୀୟ ଅଞ୍ଚଳରେ କିଛି ଦିନ ହେବ ଘୁରି ବୁଲୁଥିବା ଗାଁ ଲୋକେ ଅଭିଯୋଗ କରିଛନ୍ତି।

ଢେଙ୍କନାଳ  ରେଞ୍ଜର ଦର୍ଶନ ଭୋଇ କହିଛନ୍ତି,“ ଏହି ଅଞ୍ଚଳରେ ହାତୀ ଅଛନ୍ତି ବୋଲି ଆମେ ଜାଣି ନଥିଲୁ।  ଏବେ ଏହି ଅଞ୍ଚଳରେ ସ୍କ୍ୱାଡ୍‌ ଦିଆଯିବ। ସେମାନେ ଡ୍ୟୁଟି କରିବେ  ଓ ଲୋକଙ୍କୁ ସୁରକ୍ଷା ଦେବେ। ମୃତକଙ୍କ ପରିବାରଙ୍କୁ ସରକାରଙ୍କ ପକ୍ଷରୁ ବର୍ତ୍ତମାନ ୪୦ ହାଜର ଟଙ୍କା ସହାୟତା ଦିଆଯିବ। ସମସ୍ତ ଡକ୍ୟୁମେଣ୍ଟ ଦେଇ ସାରିବା ପରେ ଆଉ ୩ଲକ୍ଷ ୬୦ ହଜାର ଟଙ୍କା ମିଳିବ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।