ଭୁବନେଶ୍ୱର(ଓଡ଼ିଶା ରିପୋର୍ଟର): ଭୁବନେଶ୍ୱର ଓ କଟକର ୫ଟି ସିନେମା ହଲ୍ରେ କାହିଁକି ସ୍କ୍ରିନିଂ ବନ୍ଦ କରାଯିବ ନାହିଁ , ତା'ର କାରଣ ଦର୍ଶାଇବା ପାଇଁ ନୋଟିସ ଜାରି କରିଛି କମିଶନରେଟ ପୁଲିସ। ଏହି ନୋଟିସ ପୁଲିସ କମିଶନରଙ୍କ କାର୍ଯ୍ୟାଳୟ ପକ୍ଷରୁ ଜାରି ହୋଇଛି। ଏହି ସିନେମା ହଲ୍ ଗୁଡିକ ହେଲା ଭୁବନେଶ୍ୱରର ସ୍ୱାତି, ସ୍ତୁତି, ମହାରାଜ, କେଶରୀ ଓ କଟକର ବୃନ୍ଦାବନ । ବାରମ୍ବାର ତାଗିଦ୍ ସତ୍ତ୍ୱେ ଏହି ହଲ ଗୁଡିକର ଫାୟାର ଏନଓସି ନଥିବାରୁ ଲାଇସେନସର ନବୀକରଣ ହୋଇନାହିଁ। ଉପଯୁକ୍ତ ଲାଇସେନ୍ସ ନଥାଇ ସେମାନେ ପ୍ରେକ୍ଷାଳୟରେ ଫିଲ୍ମ ସ୍କ୍ରିନିଂ ଜାରି ରଖିଛନ୍ତି ବୋଲି ଅଭିଯୋଗ ହେଉଛି।
୨୦୧୯ ଫେବୃୟାରୀରେ ହାଇକୋର୍ଟ ୮ ସପ୍ତାହ ଭିତରେ ଫାୟାର ସେଫ୍ଟି ସାର୍ଟିଫିକେଟ ହାସଲ କରିବାକୁ ଉକ୍ତ ହଲ ଗୁଡିକୁ ନିର୍ଦ୍ଦେଶ ଦେଇଥିଲେ। ତେବେ କୋର୍ଟଙ୍କ ଦ୍ୱାରା ଦିଆଯାଇଥିବା ଅବଧି ସରିଯାଇ ଥିବାରୁ କମିଶନରେଟ ପୁଲିସ ତରଫରୁ ଏହି ନୋଟିସ ଜାରି ହୋଇଛି। ସେହିପରି ଗ୍ରାଣ୍ଡ, ଏକାମ୍ର ଓ ଜୟଶ୍ରୀ ସିନେମା ହଲ୍ ପକ୍ଷରୁ ୨୦୧୫ରେ ହାଇକୋର୍ଟରେ କରାଯାଇଥିବା ଏକ ପିଟିସନ ଅନୁଯାୟୀ ସେମାନେ ଅନ୍ତରୀଣ ସୁରକ୍ଷାରେ ଅଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
