ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
<p>ଭୁବନେଶ୍ୱର(ଓଡ଼ିଶା ରିପୋର୍ଟର): କିଏ ତାଙ୍କୁ କହେ ଅନ୍ତର୍ଯ୍ୟାମୀ। ପୁଣି କାହା ବିଶ୍ୱାସରେ ସେ ପ୍ରାଣର ଦେବତା। ତାଙ୍କୁ ନେଇ ପ୍ରତିଟି ଓଡ଼ିଆଙ୍କର ରହିଛି ଅନେକ ଅଭୂଲା ଅନୁଭବ। ଆମେ କହୁଛୁ, କୋଟି ବିଶ୍ୱ ନିୟନ୍ତା ପ୍ରଭୁ ଜଗନ୍ନାଥଙ୍କ କଥା। ରଥ ଯାତ୍ରା ପାଖେଇ ଆସୁଥିବାରୁ ନିଜର ଅନୁଭୂତି ବଖାଣିଛନ୍ତି ସୁପ୍ରିମକୋର୍ଟର ପୂର୍ବତନ ପ୍ରଧାନ ବିଚାରପତି ଜଷ୍ଟିସ୍‌ ଦୀପକ ମିଶ୍ର।</p> <p>ଜଷ୍ଟିସ ମିଶ୍ର କହିଛନ୍ତି-“୧୯୬୦ ମସିହାରେ ମୁଁ ଦେଖିଛି, ମୋର ବୁଢ଼ୀମାଆ ଜଗନ୍ନାଥଙ୍କ ଫଟୋ ଓ ଶାଳଗ୍ରାମ ପୂଜା କରୁଥିଲେ। ସେ ସବୁବେଳେ ମୋତେ କହୁଥିଲେ, ଶାଳଗ୍ରାମ ଓ ଜଗନ୍ନାଥ ହେଉଛନ୍ତି ବିଷ୍ଣୁଙ୍କ ପ୍ରତୀକ। ୧୯୭୯ ମସିହାରେ ମୋ ବୋଉ ଯେତେବେଳେ କଟକରେ ମୋ ପାଖରେ ରହିଲେ, ସେ ଶାଳଗ୍ରାମ ଓ ଜଗନ୍ନାଥ ଫଟୋଙ୍କୁ ଆଣିଲେ। ସେହିଦିନଠାରୁ ମୁଁ ଯେଉଁଠି ଯେଉଁଠି ରହିଛି, ସେ ପୂଜା ପାଉଛନ୍ତି। ଆମେ ସବୁବେଳେ ଜଗନ୍ନାଥଙ୍କୁ ପୂଜା କରୁ ଏବଂ ମନେ କରୁ ଆମର କିଛି ଅସୁବିଧା ହେବନି।”</p> <p>ନିଜର ଅନୁଭୂତି ବଖାଣିବାକୁ ଯାଇ ଜଷ୍ଟିସ୍‌ ମିଶ୍ର କହିଛନ୍ତି, “ଥରେ ଗୋଟିଏ ବଡ଼ ଧରଣର ବୈଠକ ହେବାର ଥିଲା। ଏହାର ଦାୟିତ୍ୱରେ ମୁଁ ଥିଲି। ବୈଠକ ୫ଟାରେ ହେବାର ଥିଲା। ପାଣିପାଗ ବିଭାଗର ସୂଚନା ଆଧାରରେ ସମସ୍ତେ କହିଲେ ପ୍ରବଳ ବର୍ଷା ହେବ। ଦିନ ୩ଟା ପରେ ବର୍ଷା ହେବନି ବୋଲି ମୁଁ ସେମାନଙ୍କୁ ବୁଝାଇବାକୁ ଚେଷ୍ଟା କଲି। ତା’ପରେ ମୁଁ ମନେ ମନେ ଜଗନ୍ନାଥ ସ୍ୱାମୀ ନୟନ ପଥଗାମୀ... ଶ୍ଲୋକ ପ୍ରାୟ ୨୧ ଥର ପାଠ କରିଥିଲି। ୩.୨୦ ବେଳକୁ ବର୍ଷା ବନ୍ଦ ହୋଇଗଲା ଏବଂ ବୈଠକ ସୁରୁଖୁରୁରେ ହେଲା।”</p> <p>ଦ୍ୱିତୀୟ ଅନୁଭୂତିଟି ବଖାଣିବାକୁ ଯାଇ ଜଷ୍ଟିସ୍‌ ମିଶ୍ର କହିଛନ୍ତି-“ଦିନେ ମୋର ଗୋଟିଏ ଦୂର ଯାଗାକୁ ଯିବାର ଥିଲା। ସେହିଦିନ ମୋତେ ହଠାତ ଜ୍ୱର ହେଲା। ପ୍ରାୟ ୧୦୨ ଡିଗ୍ରୀ ଜ୍ୱର ରହିଥିଏ। ଡାକ୍ତର କହିଲେ ଔଷଧ ଖାଇଲେ ମଧ୍ୟ ଜ୍ୱର କମିବ ନାହିଁ। ତେଣୁ ବାହାରକୁ ନଯିବାକୁ ପରାମର୍ଶ ଦେଲେ। ମୁଁ ମନେମନେ ଜଗନ୍ନାଥଙ୍କୁ ସ୍ମରଣ କଲି। ଆଉ ତା’ପରେ କ୍ରୋସିନ୍‌ ଟ୍ୟାବଲେଟ ଖାଇଦେଲି। ଜ୍ୱର କମିଲା ଓ ମୁଁ ଗସ୍ତରେ ବାହାରି ପଡ଼ିଲି।”</p>
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
