ପୁଣି ଲେଉଟିଲା ବାବାଙ୍କ ଯୌନଲୀଳା

ଭୁବନେଶ୍ୱର (ଓଡ଼ିଶା ରିପୋର୍ଟର): ବାବାଙ୍କ ଯୌନ କେଳେଙ୍କାରୀ ମାମଲା ପୁଣି ଲେଉଟିଛି! ରାତି ଅଧରେ ବନ୍ଦ କୋଠରୀରେ ଜଣେ ମହିଳାଙ୍କୁ ତ୍ରାହି ଅଚ୍ୟୁତ୍‌ ଆଶ୍ରମରେ ସୁରେନ୍ଦ୍ର ମିଶ୍ର ଓରଫ ସୁରବାବା ଯୌନ ନିର୍ଯାତନା ଦେଉଥିଲେ। ଏ ସମ୍ପର୍କରେ ମୁହଁ ଖୋଲିଲେ ଜୀବନରୁ ମାରିଦେବାକୁ ଧମକ ଦେଉଥିଲେ ବାବାଙ୍କ ଅନୁଗତ। ହେଲେ ନିର୍ଯାତନା ସୀମା ଟପିବାରୁ ପୀଡ଼ିତା ପୁଲିସର ଦ୍ୱାରସ୍ଥ ହୋଇଛନ୍ତି।

ଅଭିଯୋଗ ଅନୁସାରେ, ଗଞ୍ଜାମ ଜିଲ୍ଲା ବେଲଗୁଣ୍ଠା ଅଞ୍ଚଳର ଜଣେ ମହିଳାଙ୍କ ସହ ବାଲିପାଟଣା ତ୍ରାହିଅଚ୍ୟୁତ ନଗରର ବାସିନ୍ଦା ଦୀପ ସୁନ୍ଦର ସ୍ୱାଇଁଙ୍କ ସହ ବିବାହ ପ୍ରସ୍ତାବ ପଡ଼ିଥିଲା। ଦୀପସୁନ୍ଦର ଓ ତାଙ୍କ ମାଆ ସଂପୃକ୍ତ ମହିଳାଙ୍କୁ ଗଞ୍ଜାମରୁ ନେଇ ତ୍ରାହି ଅଚ୍ୟୁତ ନଗରର ଏକ ଭଡ଼ା ଘରେ ରଖିଥିଲେ। ପରେ ସୁଯୋଗ ଦେଖି ପୂଜା ହେବା ବାହାନାରେ ଗତ ୨୪ ତାରିଖ ରାତିରେ ଦୀପସୁନ୍ଦରଙ୍କ ମାଆ ସେହି ମହିଳାଙ୍କୁ ତ୍ରାହି ଅଚ୍ୟୁତ ଆଶ୍ରମକୁ ନେଇଯାଇଥିଲେ। ସେଠାରେ ସୁର ବାବା ତାଙ୍କୁ ଯୌନ ନିର୍ଯାତନା ଦେଇଥିଲେ ବୋଲି ପୀଡ଼ିତା ଅଭିଯୋଗ କରିଛନ୍ତି।

ଅଭିଯୋଗ ହେବା ପରେ ପୁଲିସ୍‌ ସୁର ବାବାଙ୍କ ଆଶ୍ରମକୁ ଯାଇ ତାଙ୍କୁ ପଚରାଉଚରା କରିଛି।

ସେପଟେ ଅଭିଯୋଗକୁ ନେଇ ସୁର ବାବାଙ୍କ ପ୍ରତିକ୍ରିୟା ମିଳିପାରିନି।