ଜିଲ୍ଲାପାଳଙ୍କ ଭୂଗୋଳ ପ୍ରେମ: ନବମ ଶ୍ରେଣୀ ପିଲାଙ୍କୁ କଳାପଟାରେ ବୁଝାଇ ପଢ଼ାଇଲେ

ପାରଳାଖେମୁଣ୍ଡି( ଆଦର୍ଶ ଦାସ): ପିଲାଙ୍କୁ ଭୂଗୋଳ ପଢ଼ାଇଲେ ଜିଲ୍ଲାପାଳ। ଗଜପତି ଜିଲ୍ଲାପାଳ ଅନୁପମ ଶାହା ପାରାଳାଖେମୁଣ୍ଡି ସ୍ଥିତ ମହେନ୍ଦ୍ରଗିରି ପୌରପାଳିକା ଉଚ୍ଚ ବିଦ୍ୟାଳୟରେ ଛାତ୍ରଛାତ୍ରୀଙ୍କୁ ଭୂଗୋଳ ପଢ଼ାଇ ଏବେ ଚର୍ଚ୍ଚାରେ। ଶୁକ୍ରବାର ଜିଲ୍ଲାପାଳ ବିଦ୍ୟାଳୟକୁ ଯାଇ ନବମ ଶ୍ରେଣୀ ପିଲାଙ୍କୁ ପାଠ ପଢାଇଥିଲେ। ଏହାକୁ ନେଇ ଛାତ୍ରଛାତ୍ରୀ ବେଶ୍‌ ଉତ୍ସାହିତ ହୋଇଥିଲେ।

ଏନେଇ ଜିଲ୍ଲାପାଳ ଅନୁପମ ଶାହା କହିଛନ୍ତି,“ଗତବର୍ଷ ଶିଶୁ ଦିବସ ଉପଲକ୍ଷେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯେଉଁ ‘ମୋ ସ୍କୁଲ ଅଭିଯାନ’ ଆରମ୍ଭ କରିଥିଲେ ଏବେ ଏଠି ସବୁ ବିଦ୍ୟାଳୟ ମାନଙ୍କରେ ଏହି କାର୍ଯ୍ୟକ୍ରମ ଆରମ୍ଭ ହୋଇଛି। ତେବେ ‘ମୋ ସ୍କୁଲ ଆନୁକଲ୍ୟରେ ଆମେ ‘ଟିଚ୍‌ ଗଜପତି’ ନାମରେ ଏକ କାର୍ଯ୍ୟକ୍ରମ ଆରମ୍ଭ କରିଛୁ। ଯେଉଁଥିରେ ସ୍ୱେଚ୍ଛାକୃତ ଭାବରେ ଯିଏ ଶିକ୍ଷକତା କରିବା ପାଇଁ ଚାହୁଁଛନ୍ତି ନିଜର ଶିକ୍ଷାଗତ ଯୋଗ୍ୟତା ଓ ଇଚ୍ଛା ଅନୁସାରେ ସ୍କୁଲରେ  ପିଲାଙ୍କୁ ପଢ଼ାଇପାରିବେ। ଆଜି ମୁଁ ପ୍ରଥମ କ୍ଲାସ୍ ନେଲି। ମୁଁ ଦେଖିଲି ପିଲାମାନେ ଭଲ ପଢ଼ୁଛନ୍ତି। ପ୍ରଶ୍ନର ଉତ୍ତର ବି ଦେଲେ। ମୁଁ ଯାହା କିଛି ଟାକ୍ସ ଦେଲି ସେମାନେ ବହୁତ ସୁନ୍ଦର ଭାବେ କରି ଦେଖାଇଲେ। ତେଣୁ ମୁଁ ଆଶା କରୁଛି ଏହା ଦ୍ୱାରା ଛାତ୍ରଛାତ୍ରୀ ଉପକୃତ ହୋଇପାରିବେ।”