ବ୍ରହ୍ମପୁର (ଓଡ଼ିଶା ରିପୋର୍ଟର): ବ୍ରିଟେନରେ କରୋନାର ନୂଆ ଷ୍ଟ୍ରେନ୍ ଚିହ୍ନଟ ହେବା ପରେ ଆତଙ୍କରେ ଅଛନ୍ତି ସମଗ୍ର ବିଶ୍ୱବାସୀ। ଏପରି ସ୍ଥିତିରେ କରୋନାର କୋପ ଦେଖିଥିବା ଗଞ୍ଜାମ ଜିଲ୍ଲାବାସୀଙ୍କ ପାଇଁ ଆଗୁଆ ସତର୍କବାଣୀ ଶୁଣାଇ ଦେଇଛନ୍ତି ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ।
ପୁଣି ଥରେ କରୋନା କାୟା ମେଲାଇବା ଆଶଙ୍କା କରି ସରକାରୀ କର୍ମଚାରୀ ହେଡକ୍ୱାର୍ଟର୍ସ ଛାଡ଼ିବା ଉପରେ ରୋକ୍ ଲଗାଇଛନ୍ତି ଜିଲ୍ଲାପାଳ। ବିନା ଅନୁମତିରେ ହେଡକ୍ୱାର୍ଟର୍ସ ନ ଛାଡ଼ିବାକୁ ଦିଆଯାଇଛି କଡ଼ା ନିର୍ଦ୍ଦେଶ । ପିକନିକ୍ ସ୍ପଟ୍ ଏବଂ ଗୋପାଳପୁର ବେଳାଭୂମିରେ ଯେଭଳି ଭିଡ଼ ନହୁଏ ତା ଉପରେ ମଧ୍ୟ ନଜର ରଖିବାକୁ ଜିଲ୍ଲାପାଳ ତାଗିଦ୍ କରିଛନ୍ତି।
ଏହା ସହିତ ଜିଲ୍ଲାପାଳ ଆଜି ସଚେତନତା ରଥର ଶୁଭାରମ୍ଭ କରିଛନ୍ତି। ୨୯ ତାରିଖ ଯାଏଁ ଦୈନିକ ୨ଟି ବ୍ଲକ ବୁଲିବ ସଚେତନତା ରଥ।
ଏହି ଅବସରରେ ଜିଲ୍ଲାପାଳ କହିଛନ୍ତି, ଜିଲ୍ଲାରେ ଏବେ କେବଳ ୨୧ ଆକ୍ଟିଭ କେସ୍ ରହିଛି। ପଜିଟିଭ ସଂଖ୍ୟା ବହୁତ କମିଛି। ଆଇସିୟୁ, ଜେନେରାଲ ବେଡ ବ୍ୟବସ୍ଥା ଅଛି। କରୋନା ଟିକା ନ ଆସିବା ଯାଏଁ ସତର୍କ ରହିବାକୁ ହେବ।
ସେ ଆହୁରି କହିଛନ୍ତି, ବ୍ରିଟେନରୁ ୩ ଜଣ ଜିଲ୍ଲାକୁ ଫେରିଥିବା ବେଳେ ସେମାନଙ୍କ ମଧ୍ୟରୁ ଜଣଙ୍କ ସହ ଯୋଗାଯୋଗ କରାଯାଇଛି। ସେ ହୋମ କ୍ୱାରେଣ୍ଟାନରେ ଅଛନ୍ତି। ଉକ୍ତ ବ୍ୟକ୍ତିଙ୍କର ଆରଟିପିସିଆର ଟେଷ୍ଟ ହୋଇଥିବା ବେଳେ ରିପୋର୍ଟ ନେଗେଟିଭ ଆସିଛି। ଅନ୍ୟ ୨ ଜଣଙ୍କ ସହ ଯୋଗାଯୋଗ କରାଯାଉଛି।
ଭୟ କରିବାର ନାହିଁ, ସଚେତନ ରହିଲେ ଆମେ ପୁଣି ଏହାର ମୁକାବିଲା କରିପାରିବା। ତେଣୁ ପୂର୍ବରୁ ଯେପରି କଡ଼ାକଡ଼ି ନିୟମ ପାଳନ କରାଯାଉଥିଲା , ଏବେ ବି ସେମିତ ସାମାଜିକ ଦୂରତା, ମାସ୍କ ପିନ୍ଧି ନବବର୍ଷ ପାଳନ କରିବାକୁ ଜିଲ୍ଲାବାସୀଙ୍କୁ ସଚେତନ କରିଛନ୍ତି ଜିଲ୍ଲାପାଳ। ଏଥିସହ ଗହଳିକୁ ସବୁବେଳେ ଏଡ଼ାଇବାକୁ ମଧ୍ୟ ସେ ପରାମର୍ଶ ଦେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
