ନିଆରା ବିବାହ: ଯୌତୁକ ବାବଦକୁ ୧୦୦୧ ଚାରା ନେଲେ ବର

ପଟ୍ଟାମୁଣ୍ଡାଇ (ପ୍ରବୀର କୁମାର ନାୟକ): ବିନା ରୋଷଣୀରେ ବାହାଘର। ନା ଅଛି ସୁସଜ୍ଜିତ ଗାଡି, ନା ନାଚଗୀତର ଆସର। ହାତରେ ଗୋଟିଏ ଗୋଟିଏ ଚାରା ଧରି ଖୁସି ମନରେ ବରଯାତ୍ରୀ ଆଗକୁ ବଢୁଛନ୍ତି। ବରଯାତ୍ରୀଙ୍କ ଗହଣରେ କନ୍ୟାଘର ଆଡକୁ ବିନା ଗାଡିରେ ଚାଲି ଚାଲି ଯାଉଛନ୍ତି ବର। କେବଳ ବାଜୁଛି ଶଙ୍ଖ ଓ ମହୁରୀ। ଏଭଳି ନିଆରା ବାହାଘର ଦେଖିବାକୁ ମିଳିଛି କେନ୍ଦ୍ରାପଡା ଜିଲ୍ଲା ପଟ୍ଟାମୁଣ୍ଡାଇ ବ୍ଲକ ଅନ୍ତର୍ଗତ ବଳଭଦ୍ରପୁର ଗାଁରେ। 

ଏହି ଗାଁର ସରୋଜ ବିଶ୍ୱାଳ ଜଣେ ବିଜ୍ଞାନ ଶିକ୍ଷକ। ଛାତ୍ର ଜୀବନରୁ ତାଙ୍କର ସ୍ୱପ୍ନ ଥିଲା ବିନା ଯୌତୁକରେ ବାହା ହେବେ। ଯେତେବେଳେ ନିର୍ବନ୍ଧ ହେଲା, ଯୌତୁକ ନେବେନି ବୋଲି କନ୍ୟା ଘର ପକ୍ଷକୁ କହିଥିଲେ ସରୋଜ। ହେଲେ ଦାଣ୍ଡ ସମ୍ମାନ ପାଇଁ କନ୍ୟା ଘର ଲୋକେ କିଛି ଦେବାକୁ କହିଥିଲେ। ସେହି ସମୟରେ ସରୋଜ ଯୌତୁକ ବାବଦକୁ ୧୦୦୧ ଗଛ ଚାରା ଦେବାକୁ କହିଥିଲେ। ଆଉ କନ୍ୟା ଘର ପକ୍ଷରୁ ମଧ୍ୟ ହଜାରେ ଏକ ଫଳ ଚାରା ଦିଆଯାଇଛି। ପରିବେଶ ସୁରକ୍ଷା ସଚେତନତା ସହ ଯୌତୁକ ବିରୋଧରେ ଏହା ହେଉଛି ସରୋଜଙ୍କ ଏକ ଭିନ୍ନ ପ୍ରୟାସ।

ଏମିତିକି ଏହି ବାହା ଘରରେ ପଲିଥିନ ମଧ୍ୟ ବ୍ୟବହାର କରାଯାଇ ନଥିଲା। ଭୋଜିକୁ ଆସିଥିବା ଅତିଥିମାନଙ୍କୁ ଚାରା ବଣ୍ଟନ କରାଯାଇଥିଲା। ଏଭଳି ବାହାଘରକୁ ବିଭିନ୍ନ ମହଲରୁ ପ୍ରଶଂସା କରାଯାଇଛି।

ତେବେ ଯାହା ହେଉ ଏଭଳି ବାହାଘର ସମାଜର ଅନ୍ୟମାନଙ୍କୁ ପ୍ରେରଣା ଯୋଗାଇବ।