ରାଜଗାଙ୍ଗପୁର (ଗୌତମ ମିଶ୍ର ): ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ଅଞ୍ଚଳରେ ହାତୀ ଆତଙ୍କ । କିଛି ଦିନ ହେଲା ଏହି ହାତୀ ପଲ ଲୋକଙ୍କ ନିଦ ହଜାଇ ଦେଇଛି । ମହାବୀର ପାହାଡ଼ରେ କିଛି ଦିନ ହେଲା ହାତୀପଲ ବିଚରଣ କରୁଛନ୍ତି । ରାତି ହେବା ମାତ୍ରେ ପାହାଡ଼ରୁ ତଳକୁ ଓହ୍ଲାଇ ଆସି ଫସଲ ନଷ୍ଟ କରୁଛନ୍ତି। ପନିପରିବା ଓ ଧାନ ସବୁ ଖାଇବା ସହ ନଷ୍ଟ ମଧ୍ୟ କରି ଦେଉଛନ୍ତି ।
ହାତୀ ପଲ ବହୁ ଲୋକଙ୍କ ଘର ଭାଙ୍ଗି ଦେଇଥିବା ଅଭିଯୋଗ ହୋଇଛି । ଅଳ୍ପ ବର୍ଷା ଯୋଗୁଁ ଧାନ ଫସଲ କ୍ଷତିଗ୍ରସ୍ତ ହୋଇଥିବା ବେଳେ ଯାହା କିଛି ଥିଲା, ତାକୁ ବି ନଷ୍ଟ କରିଦେଲେଣି ହାତୀପଲ । ବାରମ୍ବାର ଅଭିଯୋଗ ସତ୍ତ୍ୱେ ବନ ବିଭାଗ କିଛି ପଦକ୍ଷେପ ନେଉନଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ। ତେବେ ବଡ଼ଗାଁ ବନଖଣ୍ଡ ଅଧିକାରୀ କହିଛନ୍ତି, ପରିସ୍ଥିତି ଉପରେ ନଜର ରଖାଯାଇଛି । କ୍ଷତିଗ୍ରସ୍ତ ଚାଷୀଙ୍କୁ ନିୟମ ଅନୁସାରେ କ୍ଷତିପୂରଣ ଦିଆଯିବ ।