ସବୁ ସୀମା ଲଂଘିଗଲା, ପଦାକୁ ଆସିଲା ଆଡ଼ପ ମଣ୍ଡପର ମହାପ୍ରଭୁଙ୍କ ଫଟୋ: ଉଠାଇଲା କିଏ?

ପୁରୀ(ଓଡ଼ିଶା ରିପୋର୍ଟର ଫଟୋ): ସୋସିଆଲ ମିଡିଆରେ ଭାଇରାଲ୍ ହୋଇଛି ଗୁଣ୍ଡିଚା ମନ୍ଦିରର ଭିତର ଫଟୋ।  ରଥଯାତ୍ରା ସମୟରେ ଆଡ଼ପ ମଣ୍ଡପରେ ଚତୁର୍ଦ୍ଧାମୂର୍ତ୍ତି ବିରାଜମାନ କରିଥିବା ସମୟର କିଛି ଫଟୋକୁ ପୁରୀର ସଙ୍କେତ ମିଶ୍ର ନାମକ ଜଣେ ନୃତ୍ୟଶିଳ୍ପୀ ଫେସ୍‌ବୁକରେ ଛାଡ଼ିଥିବା ଅଭିଯୋଗ ହୋଇଛି। ଏନେଇ ଶ୍ରୀମନ୍ଦିର ପ୍ରଶାସନ ନିକଟରେ ଅଭିଯୋଗ ହୋଇଛି।

ଶ୍ରୀମନ୍ଦିର ଲୋକସମ୍ପର୍କ ଅଧିକାରୀ କହିଛନ୍ତି, “ଉକ୍ତ ଫଟୋ ଗୁଣ୍ଡିଚା ମନ୍ଦିର ଆଡପ ମଣ୍ଡପର। କେବେ ଓ କେଉଁ ଭଳି ସ୍ଥିତିରେ ଫଟୋ ଉଠିଲା ଓ ଏହାର ଭାଇରାଲ ନେଇ ତଦନ୍ତ ପରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ।”

କିଛିଦିନ ତଳେ ଶ୍ରୀମନ୍ଦିର ଭିତର ଫଟୋ ଭାଇରାଲ୍ ହେବାକୁ ନେଇ ତୁମ୍ବି ତୋଫାନ ହୋଇଥିଲା। ଗୁଣ୍ଡିଚା ମନ୍ଦିର ଭିତରେ ଶ୍ରୀଜିଉଙ୍କ ଫଟୋ ଭାଇରାଲ୍ ହେବା ଘଟଣାକୁ ନେଇ ଜଗନ୍ନାଥ ପ୍ରେମୀ ଭକ୍ତଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।

ସୂଚନାଯୋଗ୍ୟ, ଗତ ଡିସେମ୍ୱର ୧୧ ତାରିଖରେ ଶ୍ରୀମନ୍ଦିର ଭିତର ବେଢାର ଫଟୋ ଭାଇରାଲ ହୋଇଥିଲା। ଜଣେ ଭକ୍ତ ମୋବାଇଲରେ ଫଟୋ ଉଠାଇ ଏହାକୁ ସୋସିଆଲ ମିଡିଆରେ ଭାଇରାଲ କରିଥିଲେ । ଭାଇରାଲ ହୋଇଥିବା ଏହି ଫଟୋ ଯୁଗଳ କିଶୋର ବୈଷ୍ଣବ ନାମକ ଜଣେ ବ୍ୟକ୍ତିଙ୍କ ଆକାଉଣ୍ଟରେ ଅପଲୋଡ ହୋଇଥିବା ଦେଖିବାକୁ ମିଳିଥିଲା।  ମୋବାଇଲ ନେବା କଟକଣା ଥିବା ସତ୍ତ୍ୱେ ମନ୍ଦିର ଭିତର ଫଟୋ କିଭଳି ଉଠାଇଲେ ତାହା ପ୍ରଶାସନକୁ ଚିନ୍ତାରେ ପକାଇଥିଲା ।