ଗଣେଶ ପୂଜା ଚାନ୍ଦା ନ ଦେବାରୁ ୱେସ୍‌କୋ ଡିଜିଏମ୍‌ଙ୍କୁ କାଳିମାଡ଼

ସମ୍ୱଲପୁର(ଓଡ଼ିଶା ରିପୋର୍ଟର): ଆସନ୍ତାକାଲି ବିଘ୍ନ ବିନାଶକ ଗଣେଶଙ୍କ ପୂଜା ଉତ୍ସବ। ଏଥିପାଇଁ ପୁରପଲ୍ଲୀ ଚଳଚଞ୍ଚଳ ହୋଇ ଉଠିଛି। ପୂଜାକୁ ଧୂମ୍‌ଧାମରେ ପାଳନ କରିବା କରିବା ପ୍ରସ୍ତୁତି ଜୋରଦାର ଚାଲିଛି। ଏହା ପୂର୍ବରୁ ସମ୍ୱଲପୁର ଜିଲ୍ଲା ବୁର୍ଲା ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି। ଚାନ୍ଦା ନଦେବାରୁ ୱେସ୍‌କୋ ଅଫିସରେ ପସି ଡିଜିଏମ୍‌ଙ୍କୁ କାଳିମାଡ଼ ହୋଇଥିବା ଅଭିଯୋଗ ହୋଇଛି। ଏପରିକି ସୁରକ୍ଷା ଦାୟିତ୍ୱରେ ଥିବା ସୁରକ୍ଷା କର୍ମୀଙ୍କୁ ମଧ୍ୟ କାଳି ମାଡ଼ ହୋଇଛି। ଏନେଇ ଥାନାରେ ଅଭିଯୋଗ ହେବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।

ଆଜି ବୁର୍ଲା ୱେସ୍‌କୋ ଡିଜିଏମ୍‌(ଏଚ୍‌ଆରଡି) ରମେଶ ପ୍ରସାଦ ପତି କାର୍ଯ୍ୟାଳୟରେ ପ୍ରବେଶ କରୁଥିଲେ। ଏହି ସମୟରେ ୧୦ରୁ ୧୫ ଜଣ ଯୁବକ ତାଙ୍କୁ ଗଣେଶ ପୂଜା ଚାନ୍ଦା ମାଗିଥିଲେ। ଆମେ ସରକାରୀ ଅଫିସର, ଚାନ୍ଦା ଦେବାର କୌଣସି ବ୍ୟବସ୍ଥା ନାହିଁ ବୋଲି ଡିଜିଏମ୍‌ ପତି କହିଥିଲେ। ଏଥିରେ ଯୁବକମାନେ ରାଗିଯାଇ ତାଙ୍କୁ ଗାଳି ଗୁଲଜ କରିଥିଲେ। ପରେ ଉତ୍‌କ୍ଷିପ୍ତ ହୋଇ ସାଥୀରେ ଆଣିଥିବା କାଳି ଡିଜିଏମ୍‌ଙ୍କ ଉପରକୁ ଫିଙ୍ଗିଥିଲେ। କାଳି ଡିଜିଏମ୍‌ଙ୍କ ମୁହଁ ଓ ଦେହରେ ପଡ଼ିଥିଲା। ଏପରିକି ସୁରକ୍ଷା କର୍ମୀଙ୍କ ଉପରେ ମଧ୍ୟ ଯୁବକମାନେ କାଳି ଫିଙ୍ଗି ଥିଲେ। ଏନେଇ ଅଭିଯୋଗ ହେବା ପରେ ବୁର୍ଲା ଥାନା ପୋଲିସ ମାମଲା ରୁଜୁ କରି ୱେସ୍‌କୋ ଅଫିସ୍‌ରେ ଲାଗିଥିବା ସିସିଟିଭି ଫୁଟେଜ୍‌ ମାଗିଛି। ଏହି ଆଧାରରେ ପୋଲିସ୍‌ ତଦନ୍ତ ଆରମ୍ଭ କରିଛି। ମାତ୍ର କାଳି ଫିଙ୍ଗିଥିବା ଯୁବକଙ୍କ ସମ୍ପର୍କରେ ତଥ୍ୟ ପାଇପାରି ନାହିଁ।