ଭୁବନେଶ୍ୱର (ଓଡ଼ିଶା ରିପୋର୍ଟର): ଉତ୍ତର-ପଶ୍ଚିମ ବଙ୍ଗୋପସାଗର ଆଖପାଖ ଅଞ୍ଚଳରେ ଘୁର୍ଣ୍ଣିବଳୟ ସୃଷ୍ଟି ହୋଇଛି। ମନ୍ସୁନ୍ ଟ୍ରଫ୍ ଲାଇନ୍ ଓ ଘୁର୍ଣ୍ଣିବଳୟ ପ୍ରଭାବରେ ସାରା ରାଜ୍ୟରେ ବର୍ଷା ହେଉଛି। ଆସନ୍ତା ୨୪ଘଣ୍ଟା ପର୍ଯ୍ୟନ୍ତ ବର୍ଷା ଲାଗି ରହିବ। ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ରର ଡ୍ୟୁଟି ଅଫିସର ଚରଣ ବେହେରା ଏହି ସୂଚନା ଦେଇଛନ୍ତି।
ସେ କହିଛନ୍ତି,“ ଉତ୍ତର ଓଡ଼ିଶାର ଅଧିକାଂଶ ସ୍ଥାନରେ ଓ ଦକ୍ଷିଣ ଓଡ଼ିଶାର କିଛି କିଛି ସ୍ଥାନରେ ବର୍ଷା ଲାଗି ରହିବ। ଆଜି ସମ୍ବଲପୁର, ଦେବଗଡ଼, ସୁନ୍ଦରଗଡ଼, ବରଗଡ଼, କେନ୍ଦୁଝର, ମୟୂରଭଞ୍ଜ,ବାଲେଶ୍ୱର,ଭଦ୍ରକ, ସୋନପୁର ଓ ବଲାଙ୍ଗିର ଜିଲ୍ଲାରେ ପ୍ରବଳ ବର୍ଷା ହେବ।”
ସେ ଆହୁରି କହିଛନ୍ତି,“ଘୁର୍ଣ୍ଣିବଳୟ ପ୍ରଭାବରେ ସମୁଦ୍ରରେ ଉଚ୍ଚ ଜୁଆର ଉଠିବ। ଏନେଇ ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ଯିବା ପାଇଁ ବାରଣ କରାଯାଇଛି।”
ସାରା ରାଜ୍ୟରେ ବର୍ଷା ଲାଗି ରହିଥିବା ବେଳେ ଗତ ୨୪ ଘଣ୍ଟାରେ କଟକରେ ସର୍ବାଧିକ ୧୩୪.୪ ମି.ମି. ବର୍ଷା ହୋଇଛି। ସେହିପରି ଭୁବନେଶ୍ୱରରେ୨୪ ମିମି ବର୍ଷା ହୋଇଥିବା ବେଳେ କୋରାପୁଟରେ ୧୦୮.୨, ମାଲକାନଗିରିରେ ୪୫.୪, ଭବାନୀପାଟଣାରେ ୪୪.୪, ପୁରୀରେ ୩୫.୧, ଦେବଗଡ଼ରେ ୫୪, ଟିଟିଲାଗଡ଼ରେ ୪୪.୬ ଓ ପାରାଦୀପରେ ୫୧.୫ ମିମି ବର୍ଷା ରେକର୍ଡ କରାଯାଇଛି।
ଲଗାଣ ବର୍ଷା ଯୋଗୁ କଟକର ବିଭିନ୍ନ ଅଞ୍ଚଳ ପାଣି ଘେରରେ ରହିଛି। ସୂତାହାଟ, ମେରିଆ ବଜାର ଓ ସାଆନ୍ତସାହିରେ ପାଣି ପଶିଛି। ସେମିନାରୀ ଛକ, କାଜି ବଜାର ଓ ବାଦାମବାଡ଼ି ଅଞ୍ଚଳ ଜଳମଗ୍ନ ହୋଇଯାଇଛି।