ରାସ୍ତା ପାର୍ଶ୍ୱ କାନ୍ଥରେ ମହାପ୍ରଭୁଙ୍କ ଲୀଳାଖେଳା: ଦେଖିଲେ ପାଦ ଅଟକି ଯାଉଛି

ପୁରୀ: ଜଗତର ନାଥ ଜଗନ୍ନାଥ। ତାଙ୍କର ଦାଣ୍ଡ ବଡ଼ଦାଣ୍ଡ। ଦେଉଳ ବଡ଼ ଦେଉଳ। ତାଙ୍କ ପାଖରେ ଛପନ ପଉଠି ଭୋଗ ଲାଗେ। ସେ କୋଟି ଓଡ଼ିଆଙ୍କ ଆରାଧ୍ୟ ଦେବତା। ମହାପ୍ରଭୁ ପ୍ରତିବର୍ଷ ଲୀଳାଖେଳା କରିବା ପାଇଁ ରଥଯାତ୍ରାରେ ବଡଦାଣ୍ଡକୁ ଆସନ୍ତି। ଅତି ସ୍ନେହରେ ଭକ୍ତ ତାଙ୍କ ରଥକୁ ଟାଣିନିଅନ୍ତି। ମହାପ୍ରଭୁଙ୍କ ଏହି ଅନନ୍ୟ ଲୀଳା ଦେଖିବା ପାଇଁ ପୃଥିବୀର କୋଣଅନୁକୋଣରୁ ଛୁଟି ଆସିଥାନ୍ତି ଭକ୍ତ। ମହୋଦଧିରେ ବୁଡ଼ ପକାଇ ବଡ଼ଦାଣ୍ଡରେ ମହାବାହୁ ହେ… ବୋଲି ଡାକିଦେଇ ତଳେ ଶୋଇଯାଆନ୍ତି। ବର୍ଷରେ ଗୋଟିଏ ଦିନ ଦେଖିବାକୁ ମିଳୁଥିବା ମହାପ୍ରଭୁଙ୍କ ଏହି ଲୀଳାକୁ ପ୍ରତିଦିନ ଦେଖିବାକୁ ପାଇବେ ଭକ୍ତ। କାରଣ  ରଥଯାତ୍ରାର ସମ୍ପୂର୍ଣ୍ଣ ବିବରଣୀ ପଟ୍ଟଚିତ୍ରରେ ଶୋଭାବର୍ଦ୍ଧନ କରୁଛି ବିଭିନ୍ନ ସ୍ଥାନରେ।

ପୁରୀ ସହରର ରାସ୍ତା ଦୁଇ ପାର୍ଶ୍ୱର ବିଭିନ୍ନ ସ୍ଥାନରେ କାନ୍ଥରେ ମହାପ୍ରଭୁଙ୍କ ଲୀଳାଖେଳାର ଚିତ୍ର ଅଙ୍କା ଯାଇଛି। ମହାପ୍ରଭୁଙ୍କ ରଥର ଅଖ, ଚକ ତିଆରି ଓ କାଠ ଆଣିବା ଦୃଶ୍ୟକୁ ଶିଳ୍ପୀମାନେ ଅତି ନିଖୁଣ ଭାବେ ଆଙ୍କିଛନ୍ତି। ଏହାଛଡ଼ା ନବକଳେବର ସମୟରେ ଦାରୁ ଅଣାଯାଉଥିବାର ଦୃଶ୍ୟ ଓ ରଥଯାତ୍ରା ସମୟରେ ଠାକୁରଙ୍କ ପ୍ରଧାନ ସେବକ ମହାରାଜା ଗଜପତିଙ୍କ ଛେରାପହଁରା ଦୃଶ୍ୟ ବେଶ୍‌ ମନୋରମ ହୋଇଛି। ଆଉ କିଛି ସ୍ଥାନରେ ଶ୍ରୀମନ୍ଦିର ଚିତ୍ର ମଧ୍ୟ ଅଙ୍କା ଯାଇଛି। ଦେଶ ବିଦେଶରୁ ଆସୁଥିବା ପର୍ଯ୍ୟଟକ ପୁରୀ ସହର କାନ୍ଥରେ ଅଙ୍କା ଯାଇଥିବା ଏହି ଚିତ୍ର ଦେଖି କିଛି ସମୟ ପାଇଁ ଅଟକି ଯାଉଛି।